અમદાવાદઃ ગ્રામીણ અને શહેરીજીવનમાં ઘણો ફરક છે. આ ફરક રહેણીકરણીથી માંડી ભાષા અને વિચારસરણીમાં પણ જોવા મળે છે. સારું શિક્ષણ અને વધું એક્સપોઝર મળવાને કારણે અમુક બાબતોમાં ગ્રામ્યજીવન પાછળ રહી જતું હોય છે. આવું એક તારણ નેશનલ ફેમિલી હેલ્થ સર્વે-6માં જાણવા મળ્યું છે. જેમાં મોબાઈલ અને ઈન્ટરનેટનો ઉપયોગ કરવામા શહેરી સ્ત્રી વધારે પાવરધી હોવાનું બહાર આવ્યું હતું. 

જોકે સરેરાશ મોબાઈલનો વપરાશ ઘણો જ વધ્યો છે. સર્વેક્ષણ દર્શાવે છે મોબાઈલનો ઉપયોગ જે સર્વે-5 માં 30.8% થી વધીને સર્વે-6 માં 65.7% થયો છે. સરળ શબ્દોમાં કહીએ તો, ગુજરાતમાં દર ત્રણમાંથી લગભગ બે મહિલા હવે ઇન્ટરનેટનો ઉપયોગ કરે છે. પુરુષોએ પણ ડિજિટલ પરિવર્તનને સ્વીકાર્યું છે, આ જ સમયગાળા દરમિયાન પુરુષોમાં ઇન્ટરનેટનો ઉપયોગ 52.6% થી વધીને 83.9% થયો છે.

શહેરી અને ગ્રામિણ મહિલાઓ વચ્ચે વપરાશમાં ઘણું અંતર છે. શહેરી વિસ્તારોમાં 81.3 ટકા મહિલાઓ ઈન્ટરનેટ સેવાનો ઉપયોગ કરે છે જ્યારે ગામડામાં આ પ્રમાણ 54.3 ટકા છે. આનો અર્થ કે હજુપણ લગભગ અડધાભાગની ગ્રામિણ મહિલાઓ ઈન્ટરનેટની સેવાથી દૂર છે. આવો જ તફાવત પોતાનો મોબાઈલ હોવામાં પણ છે. સમગ્ર ગુજરાતમાં પોતાનો મોબાઈલ હોય અને ઉપયોગ કરતી હોય તેવી મહિલાઓનું પ્રમાણ 58.8 ટકા છે, પરંતુ ગામડામાં પોતાનો મોબાઈલ હોય તેવી મહિલાઓનું પ્રમાણ 46.2 ટકા છે જ્યારે શહેરી વિસ્તારોમાં આ પ્રમાણ 76 ટકા હોવાનું અહેવાલમાં બહાર આવ્યું છે.મોબાઈલના ઉપયોગને શિક્ષણ અને વિવિધ સેવાઓ સાથે જોડવામાં આવ્યો હોવાથી મહિલાઓમાં વધી રહેલું ડિજિટલ કનેક્ટિવિટીનું પ્રમાણ આશાસ્પદ હોવાનું નિષ્ણાતો જણાવે છે.