નવી દિલ્હીઃ અમેરિકામાં ભારતીય IT પ્રોફેશનલ્સને લાગેલા ફટકા પર ભારતીય વિદેશ મંત્રાલયે એક મોટી ચોખવટ કરી દીધી છે. શુક્રવારે વિદેશ મંત્રાલયે જણાવ્યું હતું કે, અમેરિકાની સરકાર દ્વારા અનેક એવી ટેક કંપનીઓને રોજગાર આધારિક ગ્રીન કાર્ડ કાર્યક્રમમાંથી બાકાત કરવા માટે લેવાયેલા નિર્ણયથી H-1B વિઝા અથવા વિઝા ધારકો તથા એમના આશ્રિતોની સ્થિતિ  પર આ નિર્ણયની કોઈ અસર નહીં થાય. મંત્રાલયે એ પણ સ્પષ્ટતા કરી કે, પર્મેનન્ટ લેબર સર્ટિફિકેશન કાર્યક્રમ અંતર્ગત આવેદન કેન્સલ કરવા સંબંધિત કંપનીઓના પાત્ર કર્મચારીને સ્થાયી નિવાસ એટલે કે ગ્રીન કાર્ડ પ્રક્રિયા પર અસર થઈ શકે છે. 

આર્થિક લાભ અંગે વાત

મંત્રાલયે ભારત અને અમેરિકા વચ્ચે સ્કિલ્ડ ટેલેન્ટના મુદ્દા પર આર્થિક લાભ પર ફોક્સ કર્યું છે. મંત્રાલયે કહ્યું કે, તાજેતરના કેટલાક ઉપાયથી બન્ને દેશની મહત્ત્વકાંક્ષાને ખાસ કોઈ વેગ મળ્યો નથી. એ પણ સ્પષ્ટ થવું જોઈએ કે, દેશમાં જ્યારે કોઈ ટેલેન્ટ આવે છે ત્યારે બન્ને દેશની અર્થવ્યવસ્થાને મૂલ્યવાન રીતે વેગ મળવો જોઈએ, આનાથી ભારતીયો માટે પણ અલગ અવસર ઊભો થાય છે જે અન્યને પ્રેરે છે. બીજી તરફ અમેરિકાની કંપનીઓને એક સારી પ્રતિભા, ટેલેન્ટ, રીસર્ચ, પ્રોડક્ટિવિટી, સ્પર્ધામાં ટકી રહેવા કામ અને જોબ ક્રિએશનમાં મોટી મદદ મળી રહે છે. આનાથી અમેરિકામાં પણ શૅર ધારકોની આર્થિક સંપત્તિમાં નોંધપાત્ર રીતે વધારો થાય છે.  યુએસ ડિપાર્ટમેન્ટ ઓફ લેબરે માઈક્રોસોફ્ટ, એડોબ, કોગ્નિઝન્ટ, ઈન્ફોસીસ, ટાટા કન્સલ્ટન્સી સર્વિસીસ (TCS), વિપ્રો, એચસીએલ (HCL) ટેક્નોલોજીસ અને કેપજેમિનીને PERM પ્રોગ્રામમાંથી સ્થગિત કરી દીધા છે. 

શું છે PERM?

અમેરિકાના વિભાગે જણાવ્યું હતું કે, તે અસરગ્રસ્ત કંપનીઓ પાસેથી નવી અરજીઓ સ્વીકારશે નહીં કે તેમની પેન્ડિંગ (બાકી) અરજીઓ પર પ્રક્રિયા કરશે નહીં. યુએસ લેબર અધિકારી કીથ સોન્ડરલિંગે જણાવ્યું હતું કે, આ કંપનીઓએ સામૂહિક રીતે લાખો વિદેશી કામદારોની માંગણી કરી હતી અને રોજગાર-આધારિત ઇમિગ્રેશન પ્રોગ્રામ હેઠળ લાખોની સંખ્યામાં મંજૂરીઓ મેળવી હતી. PERM એ શ્રમ પ્રમાણપત્ર (labor certification) મેળવવાની એક પ્રક્રિયા છે, જે લાયક યુ.એસ. નોકરીદાતાને રોજગાર-આધારિત કાયમી નિવાસ (જે સામાન્ય રીતે 'ગ્રીન કાર્ડ' તરીકે ઓળખાય છે) માટે વિદેશી કામદારને પ્રાયોજિત કરવાની મંજૂરી આપે છે. અરજીને પ્રમાણિત કરતા પહેલાં, યુ.એસ. શ્રમ વિભાગ એ નિશ્ચિત કરવું પડે છે કે તે હોદ્દા માટે પૂરતી લાયકાત ધરાવતા અને ઉપલબ્ધ યુ.એસ. કામદારો નથી અને વિદેશી કામદારની નિમણૂકથી સમાન કામ કરતા યુ.એસ. કામદારોના વેતન અને કામકાજની પરિસ્થિતિઓ પર કોઈ પ્રતિકૂળ અસર પડશે નહીં.