(અમારા પ્રતિનિધિ તરફથી)

મુંબઈ: તબીબી શિક્ષણ ખાતાના પ્રધાન હસન મુશ્રીફે વિધાનસભામાં એવી જાહેરાત કરી હતી કે રાજ્ય સરકાર ટૂંક સમયમાં કોલેજોને શિષ્યવૃત્તિ ધારકો અને અનામત શ્રેણીના વિદ્યાર્થીઓ પાસેથી ડેવલપમેન્ટ ચાર્જ અને શૈક્ષણિક ફી અગાઉથી વસૂલવાથી રોકવા માટે સરકારી નિર્ણય જારી કરશે.
પ્રશ્ર્નકાળ દરમિયાન, વિધાનસભ્ય યોગેશ સાગરે રાજ્યમાં સરકારી અને માન્ય તબીબી રીતે પછાત વર્ગો અને આર્થિક રીતે પછાત વર્ગોની છોકરીઓને શિક્ષણ અને પરીક્ષા ફીની ભરપાઈ અંગે પ્રશ્ર્ન પૂછ્યો હતો.

મિનિસ્ટર હસન મુશ્રીફે જણાવ્યું હતું કે વિદ્યાર્થીઓ પાસેથી બિનજરૂરી ડેવલપમેન્ટ ચાર્જ વસૂલવામાં ન આવે તે સુનિશ્ર્ચિત કરવાના આદેશ જારી કરવા અંગે ઉચ્ચ અને ટેકનિકલ શિક્ષણ ખાતાના પ્રધાન સાથે ચર્ચા કરવામાં આવશે.

કેટલીક કોલેજો ફી ભરપાઈ થશે કે નહીં તે શંકાના આધારે વિદ્યાર્થીઓ પાસેથી પૈસા લે છે. જો કોલેજો ફી ભરપાઈના નામે વિદ્યાર્થીઓને અવરોધે છે તો તેમની સામે કાર્યવાહી કરવામાં આવશે.

છેલ્લા બે વર્ષના આંકડાઓ પર નજર કરીએ તો, રાજ્ય સરકારે 100 ટકા ફી ભરપાઈ કરી છે. નાણા વિભાગ પણ શૈક્ષણિક બાબતો માટે નિર્ધારિત સમયમાં ભંડોળ પૂરું પાડવાનો આગ્રહ રાખી રહ્યો છે.