બ્રિટિશરો સામે ટી-20 પછી વન-ડે શ્રેણીમાં પણ હાર્યા, રોહિતની યાદગાર સદી પાણીમાં ગઈ
લંડનઃ વન-ડેના સાતમા નંબરના ઇંગ્લૅન્ડ (3/387) સામે વર્લ્ડ નંબર-વન ભારત (7/360)નો 27 રનથી પરાજય થયો હતો. બ્રિટિશરોએ સિરીઝ 2-1થી જીતી લીધી હતી.
લૉર્ડ્સની બૅટિંગ-પિચ પર અઢળક રન (747) બન્યા હતા અને ભારતના ટૉપ-ઑર્ડરે બ્રિટિશરોને જોરદાર લડત આપી હતી, પણ સાત બોલરના આક્રમણ વચ્ચે મિડલ-ઑર્ડરે દાટ વાળ્યો હતો અને છેવટે ભારતે મૅચમાં અને સિરીઝમાં હાર જોવી પડી. આ જ મહિનામાં ઇંગ્લૅન્ડ સામે ટી-20માં ભારતનો 0-4થી રકાસ થયો હતો.
લૉર્ડસમાં છેલ્લી વખત રમેલા રોહિત શર્મા (138 રન, 110 બૉલ, પાંચ છગ્ગા, સત્તર ચોગ્ગા) સાથે 147 રનની ભાગીદારી કરીને કૅપ્ટન શુભમન ગિલ (77 રન, 84 બૉલ, એક છગ્ગો, દસ ચોગ્ગા) આઉટ થયો ત્યાર પછી રોહિત સાથે વિરાટ કોહલી (74 રન, 60 બૉલ, ત્રણ છગ્ગા, ચાર ચોગ્ગા) જોડી જમાવી હતી. 39મી ઓવરમાં રોહિત-વિરાટની ભાગીદારી 113 રનની થઈ હતી અને વિરાટ 38 રન પર હતો ત્યારે રોહિતે પોતાના 138 રનના સ્કોર પર નૉન-રેગ્યુલર લેફ્ટ-આર્મ સ્પિનર જેકબ બેથેલના બૉલમાં સ્વીપ શૉટની લાલચમાં વિકેટ ગુમાવી હતી. કમબૅકમાં તેની યાદગાર સેન્ચુરીની સફર પૂરી થઈ હતી.
A statement innings from the Hitman. 💯
— Star Sports (@StarSportsIndia) July 19, 2026
Rohit Sharma walks back after a memorable innings, with Lord's applauding a batting masterclass.🔥#ENGvIND 3rd ODI 👉 Streaming LIVE on JioHotstar! pic.twitter.com/pi4gJtfD06
ત્યાર બાદ વિરાટને પછીના બૅટ્સમેનોનો સારો સાથ નહોતો મળ્યો. ભારત 43મી ઓવરમાં 300 રન પર પહોંચ્યું હતું અને જીતવાની આશા હતી, પરંતુ કિશન (14 રન) સૅમ કરૅન (10-0-75-4)ના ધીમા બૉલમાં રેહાન અહમદને કૅચ આપી બેઠો એના બે બૉલ બાદ કરૅનના વધુ એક સ્લો બૉલમાં શ્રેયસ ઐયર (0) પણ રેહાનને કૅચ આપી દીધો હતો. રેહાનનો આ બીજો કૅચ અદ્ભુત હતો. ટૂંકમાં, 304 રનના સ્કોર પર ભારતને એક ઓવરમાં બે ઝટકા લાગ્યા હતા. સૅમ કરૅનની પછીની ઓવરમાં વિરાટે તેના બૅક ઑફ અ લેન્ગ્થ બૉલમાં કૅચ આપી દીધો હતો અને ત્યારે જ ભારતની જીતની આશા પર પાણી ફરી વળ્યું હતું. કરૅને આઠ બૉલમાં પાંચ રનના ખર્ચે ત્રણ મહત્ત્વની વિકેટ લીધી હતી. પછીથી રાહુલ (12 રન)ની વિકેટ જોફ્રા આર્ચરે અને અક્ષર (બે રન) કરૅને લીધી હતી.
A statement 1️⃣0️⃣0️⃣ from the HITMAN! 😍
— Star Sports (@StarSportsIndia) July 19, 2026
Rohit Sharma brings up a sensational century and becomes the first Indian to score an ODI hundred at Lord's! 🇮🇳#ENGvIND 3rd ODI 👉 Streaming LIVE on JioHotstar! pic.twitter.com/sFnq0hRAHq
એ પહેલાં, ઇંગ્લૅન્ડે બૅટિંગ લીધા બાદ 50 ઓવરમાં ત્રણ વિકેટે 387 રન બનાવ્યા હતા. ઓપનર બેન ડકેટ (141 રન, 135 બૉલ, એક છગ્ગો, અઢાર ચોગ્ગા) અને જેકબ બેથેલ (91 રન, 93 બૉલ, બે છગ્ગા, અગિયાર ચોગ્ગા)ની જોડીએ 181 બૉલમાં 192 રનની ભાગીદારી કરી હતી. જૉ રૂટ (74 અણનમ, 48 બૉલ, નવ ચોગ્ગા) અને વિકેટકીપર જૉસ બટલર (41 અણનમ, 13 બૉલ, ત્રણ છગ્ગા, ચાર ચોગ્ગા)એ પણ ટીમને ઉપયોગી યોગદાન આપ્યા હતા. જસપ્રીત બુમરાહ ઈજાને કારણે આ મૅચમાં નહોતો રમ્યો. બ્રિટિશરોની ત્રણમાંથી બે વિકેટ પેસ બોલર પ્રસિદ્ધ ક્રિષ્ના (10-2-69-2)એ અને એક વિકેટ પ્રિન્સ યાદવે (10-0-79-1) લીધી હતી. બાકીના ત્રણ ભારતીય બોલરને વિકેટ તો નહોતી મળી, તેમની બોલિંગમાં બ્રિટિશ બૅટ્સમેનોએ પુષ્કળ રન બનાવ્યા હતાઃ ગુરનૂર બ્રાર (10-0-97-0), અર્શદીપ સિંહ (10-0-72-0) અને અક્ષર પટેલ (10-0-61-0).
