અમદાવાદઃ ઈંધણની બચત અને પર્યાવરણનું જતન આ બન્ને હેતુ માટે ગુજરાત યુનિવર્સિટીએ આજથી દર સોમવારે કેમ્પસમાં નૉ વ્હીકલ ડે જાહેર કર્યો છે. યુનિવર્સિટી સત્તાવાળાઓ દ્વારા જારી કરાયેલા એક સત્તાવાર પરિપત્ર દ્વારા આ નિર્ણય જાહેર કરવામાં આવ્યો છે અને આવતીકાલ સોમવારથી અમલમાં રહેશે. આ નિર્દેશ આગામી સૂચના સુધી અમલમાં રહેશે, તેવી માહિતી મળી હતી. 

સૂત્રોના જણાવ્યા અનુસાર કાર્યકારી રજિસ્ટ્રાર દ્વારા બહાર પાડવામાં આવેલા પરિપત્ર મુજબ, આ નિયમ યુનિવર્સિટીના તમામ વિભાગો અને સંલગ્ન કોલેજોને લાગુ પડશે. શૈક્ષણિક તેમજ બિન શૈક્ષણિક સ્ટાફના સભ્યોને સોમવારે તેમના ખાનગી વાહનોનો ઉપયોગ કરવાનું ટાળવાની સૂચના આપવામાં આવી છે. આ પાછળનો મુખ્ય ઉદ્દેશ્ય કેમ્પસમાં પ્રદૂષણનું સ્તર ઘટાડવાનો અને એકંદર કાર્બન ફૂટપ્રિન્ટ ઘટાડવાનો છે. 

પેટ્રોલ અને ડીઝલના વધુ પડતા વપરાશને મર્યાદિત કરવા માટે વડા પ્રધાન દ્વારા તાજેતરમાં કરવામાં આવેલી અપીલ બાદ આ પગલું લેવામાં આવ્યું છે. અગાઉ, ગુજરાત યુનિવર્સિટીએ કારપૂલિંગ પહેલ શરૂ કરી હતી, જેમાં એક જ વિસ્તારોમાંથી આવતા કર્મચારીઓને વ્યક્તિગત રીતે મુસાફરી કરવાને બદલે વાહનો શેર કરવા માટે પ્રોત્સાહિત કરવામાં આવ્યા હતા. આ પ્રયાસનો હેતુ ટ્રાફિક હળવો કરવા અને પર્યાવરણીય અસર ઘટાડવાનો હતો.

યુનિવર્સિટી વહીવટીતંત્રને આશા છે કે નો વ્હીકલ ડેની રજૂઆત સ્ટાફમાં વધુ જવાબદારી પેદા કરશે. અધિકારીઓ માને છે કે આવા પગલાંનો સતત અમલ ઇંધણનો વપરાશ ઘટાડવા અને કેમ્પસમાં પર્યાવરણની જાળવણીમાં મદદ કરશે.