મુંબઈઃ મહારાષ્ટ્રમાં ઉનાળો આકરો બનતાની સાથે જ પાણીની સમસ્યા ગંભીર બની રહી છે ત્યારે રાજ્યના પાણી પુરવઠા અને સ્વચ્છતા વિભાગના આંકડા દર્શાવે છે કે, મહારાષ્ટ્રના ગામડાઓમાં પાણીના ટેન્કરોની સંખ્યા એપ્રિલના પહેલા અઠવાડિયામાં 86થી વધીને મેના પહેલા અઠવાડિયામાં 466 થઈ ગઈ છે. પાણીના ટેન્કરનો ઉપયોગ કરતા ગામો અને ગામડાઓની સંખ્યા પણ એપ્રિલમાં 62 અને 277થી વધીને મે મહિનામાં અનુક્રમે 411 અને 1194 થઈ ગઈ છે. અલ નીનોના સંભવિત ખતરાને પગલે વહીવટીતંત્ર સતર્ક થઈ ગયું છે.

જોકે, ટેન્કરોની સંખ્યામાં આટલો વધારો થયો હોવા છતાં પાછલા વર્ષોની સરખામણીમાં ઘણો ઓછો છે. વર્ષ 2025માં મહારાષ્ટ્ર મે મહિનાના પહેલા અઠવાડિયામાં 1057 ટેન્કરોનો ઉપયોગ કરી રહ્યું હતું, જે આ વર્ષે 466 છે. 

વિભાગના એક વરિષ્ઠ અધિકારીએ જણાવ્યું હતું કે ટેન્કરોનો ઉપયોગ ઓછો થવા પાછળનું કારણ ગયા વર્ષે સારો વરસાદ અને ત્યારબાદ જળસ્ત્રોતો, ખાસ કરીને ભૂગર્ભજળના રિચાર્જ છે, જેના કારણે આ વર્ષે રાહત મળી છે.

માહિતી મુજબ, છત્રપતિ સંભાજીનગર વિભાગમાં સૌથી વધુ (138) પાણીના ટેન્કર તૈનાત છે, જેમાંથી, સૌથી વધુ (100) છત્રપતિ સંભાજીનગર જિલ્લામાં છે. ત્યાર બાદ કોંકણ વિભાગમાં 127 પાણીના ટેન્કર ઉપયોગમાં છે. દરમિયાન, નાગપુર ડિવિઝન, જે નાગપુર, ગઢચિરોલી, ભંડારા, ગોરડીતા, વર્ધા અને ચંદ્રપુરને આવરી લે છે, ત્યાં કોઈ ટેન્કર નથી. અમરાવતી ડિવિઝન, જે નાગપુર પછી વિદર્ભ ક્ષેત્રમાં બીજું ડિવિઝન છે, તેમાં ફક્ત સાત ટેન્કર ઉપયોગમાં છે.

મુખ્ય પ્રધાન દેવેન્દ્ર ફડણવીસે ગુરુવારે નિર્દેશ આપ્યો હતો કે અલ નીનોના ભયને ધ્યાનમાં રાખીને જળયુક્ત શિવાર અભિયાન 2.0 હેઠળ જળ સંરક્ષણ પ્રોજેક્ટ્સ યુદ્ધના ધોરણે પૂર્ણ કરવા જોઈએ. તેમણે વધુમાં સૂચના આપી હતી કે ભૂગર્ભજળના સ્તરમાં ઘટાડો થતા વિસ્તારોને પ્રાથમિકતા આપવી જોઈએ અને તેમને ફરીથી ભરવા માટે ધ્યાન કેન્દ્રિત કરવું જોઈએ. 

એપ્રિલની શરૂઆતમાં તેમણે અધિકારીઓને ઓગસ્ટ 2026ના અંત સુધી પૂરતા પ્રમાણમાં પીવાના પાણીનો પુરવઠો સુનિશ્ચિત કરવા માટે આયોજન અને સંરક્ષણ પગલાં લાગુ કરવાનો નિર્દેશ આપ્યો હતો, અલ-નીનોને કારણે વરસાદમાં સંભવિત વિક્ષેપની ચેતવણી પણ આપી હતી.