અમદાવાદઃ શહેરમાં નર્સ અને વિદ્યાર્થિનીના ફેક આઈડી બનાવી ન્યૂડ ફોટો વાયરલ કરવામાં આવ્યા હોવાની ચોંકાવનારી ઘટના સામે આવી હતી. નવરંગપુરાની એક કોલેજ વિદ્યાર્થિની અને રાણીપની એક નર્સે પોલીસ ફરિયાદ નોંધાવી હતી. તેમના નામે ફેક ઇન્સ્ટાગ્રામ એકાઉન્ટ્સ બનાવવામાં આવ્યા હોવાના અને સોશિયલ મીડિયા પર તેમના ન્યૂડ ફોટોગ્રાફ્સ શેર કરવામાં આવ્યા હોવાનો આક્ષેપ કરવામાં આવ્યો હતો. તેમની ફરિયાદમાં જણાવાયું હતું કે આ તસવીરો મેસેજિંગ પ્લેટફોર્મ્સ દ્વારા તેમના મિત્રો અને પરિવારજનોને મોકલવામાં આવી હતી.

પ્રથમ કિસ્સો: નવરંગપુરાની પોસ્ટ ગ્રેજ્યુએટ વિદ્યાર્થિની

પ્રથમ કિસ્સામાં, પોસ્ટ ગ્રેજ્યુએટનો અભ્યાસ કરતી 24 વર્ષીય વિદ્યાર્થિનીએ આક્ષેપ કર્યો છે કે આ વર્ષે માર્ચ અને મે મહિનાની વચ્ચે તેની ઓળખનો ઉપયોગ કરીને બહુવિધ નકલી ઇન્સ્ટાગ્રામ પ્રોફાઇલ બનાવવામાં આવી હતી. તેણીની ફરિયાદ મુજબ, એક મિત્રએ તેના નામનું એક એકાઉન્ટ જોયું જેમાં ડિસ્પ્લે પિક્ચર તરીકે ન્યૂડ ફોટો રાખવામાં આવ્યો હતો, જેના વિશે તેણે વિદ્યાર્થિનીને જાણ કરી હતી. ફરિયાદમાં જણાવાયું છે કે બાદમાં તેણીને અન્ય ફેક પ્રોફાઇલ્સ પણ મળી આવી હતી, જે તેનાથી સંબંધિત ન્યૂડ ફોટોગ્રાફ્સ અને રીલ્સ શેર કરતી હતી.

વિદ્યાર્થિનીએ પોલીસને જણાવ્યું કે એક એકાઉન્ટ ઓપરેટરે તેના 'ફોલોઅર' બનવા માટે પ્રયાસ કર્યો હતો અને ધમકી આપી હતી કે જો તે તેની રિક્વેસ્ટ સ્વીકારશે નહીં, તો તે તેના ન્યૂડ ફોટોગ્રાફ્સ તેના કોન્ટેક્ટ્સમાં રહેલા લોકોને મોકલી દેશે. ત્યારબાદ આ એકાઉન્ટ્સ ડીએક્ટિવેટ થઈ ગયા હતા.

બીજો કિસ્સો: રાણીપની 26 વર્ષીય નર્સ

બીજા કિસ્સામાંમાં 26 વર્ષીય નર્સે આક્ષેપ કર્યો છે કે એક નકલી ઇન્સ્ટાગ્રામ એકાઉન્ટ દ્વારા તેના ન્યૂડ ફોટોગ્રાફ્સ તેના પતિ અને મિત્રોને મોકલવામાં આવ્યા હતા. તેણીએ પોલીસને જણાવ્યું કે અજ્ઞાત સોશિયલ મીડિયા યુઝર્સ છેલ્લા કેટલાક વર્ષોથી તેને વાંધાજનક મેસેજ મોકલી રહ્યા હતા, જેના કારણે તેના અંગત જીવનમાં વિખવાદ ઊભો થયો હતો.

ફરિયાદ અનુસાર, 2024 માં તેના પુનઃલગ્ન  થયા પછી પણ આ હેરાનગતિ ચાલુ રહી હતી. ફરિયાદમાં જણાવાયું છે કે આ વર્ષે માર્ચ મહિનામાં તેના પતિને એક ફેક ઇન્સ્ટાગ્રામ એકાઉન્ટ પરથી મેસેજ મળ્યા હતા જેમાં તેના ન્યૂડ ફોટા હતા. આવું જ કન્ટેન્ટ તેના કેટલાક મિત્રોને પણ મોકલવામાં આવ્યું હતું.

નર્સે તેની ફરિયાદમાં જણાવ્યું કે તે આ એકાઉન્ટ પાછળ કઈ વ્યક્તિ છે તેને ઓળખતી નથી. કોઈએ માત્ર તેને હેરાન કરવાના હેતુથી જ આ પ્રોફાઈલ બનાવી હોવાની આશંકા છે. તેણીએ અગાઉ સાયબર ક્રાઇમ પોર્ટલ દ્વારા ફરિયાદ સબમિટ કરી હતી અને બાદમાં રાણીપ પોલીસનો સંપર્ક કર્યો હતો.