અમદાવાદઃ બેફામ ડ્રાઈવ કરી લક્ઝુરિયસ કાર અમદાવાદના રસ્તઓ પર ચલાવતા એક 24 વર્ષીય પાયલોટને નવરંગપુરા પોલીસે પકડી પાડ્યો હતો. લો ગાર્ડન નજીક પોર્શ કાર ખૂબ જ ઝડપે ચલાવવાના આરોપસર નવરંગપુરા પોલીસે એક 24 વર્ષીય પાયલોટ સામે કેસ કર્યો હતો. આ ઘટનાનો ડેશકેમ વીડિયો સોશિયલ મીડિયા પર વાયરલ થયા બાદ પોલીસે લક્ઝરી કાર જપ્ત કરી હતી, તેવી માહિતી સૂત્રોએ આપી હતી. 

ગાંધીનગરના લીંબડિયા ગામના રહેવાસી અરકન તિરમિઝી નામના આરોપીની એક યુવકે ફરિયાદ નોંધાવી હતી કે પોર્શ કાર લગભગ 110 કિમી/કલાકની ઝડપે ચલાવવામાં આવી રહી હતી, જેના કારણે તેનો જીવ જોખમમાં મૂકાયો હતો અને અકસ્માત થતો બચી ગયો હતો. 

શ્રેયાંશ કામ પૂરું કરીને એચસીજી હોસ્પિટલ નજીક પોતાની કારમાં પરત ફરી રહ્યો હતો ત્યારે આ ઘટના પ્રકાશમાં આવી હતી. તેણે પોર્શ કારને પોતાની તરફ ઝડપથી આવતી જોઈ. કાર એટલી ઝડપથી ચાલી રહી હતી કે તે ટક્કરથી બચી ગયો. આ ઘટના તેની કારના ડેશકેમમાં કેદ થઈ ગઈ હતી.

વીડિયો અને ફરિયાદના આધારે, નવરંગપુરા પોલીસે વાહનના રજીસ્ટ્રેશન નંબરનો ઉપયોગ કરીને વાહનને ટ્રેસ કર્યું હતું. કારમાલિકને પોલીસ સ્ટેશન બોલાવવામાં આવ્યો હતો, ત્યારબાદ પોર્શ કાર જપ્ત કરવામાં આવી હતી અને ડ્રાઇવર વિરુદ્ધ બેદરકારીથી વાહન ચલાવવા અને અન્ય લોકોના જીવ જોખમમાં મૂકવાનો કેસ નોંધવામાં આવ્યો હોવાનું પોલીસસૂત્રોએ જણાવ્યું હતું. 

પોલીસે બીજા એક વાયરલ વીડિયોની પણ તપાસ શરૂ કરી હતી જેમાં કથિત રીતે તે જ પોર્શ કાર લગભગ 300 કિમી/કલાકની ઝડપે ચલાવવામાં આવી રહી હોવાનું જાણમાં આવ્યું હતું. 

ફરિયાદ મુજબ, કેસ શરૂ થયા પછી, ડ્રાઇવરે શ્રેયાંશનો સંપર્ક કર્યો અને પોતાને પાઇલટ તરીકે ઓળખાવ્યો હતો. તેણે કથિત રીતે સ્વીકાર્યું હતું કે લૉ ગાર્ડન ઘટના બની ત્યારે પોર્શ કાર લગભગ 110 કિમી/કલાકની ઝડપે ચાલી રહી હતી અને વારંવાર ફરિયાદ પાછી ખેંચવાની માંગ કરી હતી. પોલીસ હવે કથિત બેદરકારીપૂર્વક ડ્રાઇવિંગ અને વાયરલ વીડિયોની આસપાસના સંજોગોની તપાસ કરી રહી છે.