વડોદરા: હાલ વડોદરાની મહારાજા સયાજીરાવ (MS) યુનિવર્સિટીમાં અખિલ ભારતીય વિદ્યાર્થી પરિષદ (ABVP) દ્વારા આયોજિત 'સંસ્કાર સંગમ' કાર્યક્રમ હાલ વિવાદોના વંટોળે ચડ્યો છે. આ કાર્યક્રમ દરમિયાન એક વિદ્યાર્થિનીએ માધુરી દીક્ષિતના જાણીતા ગીત 'ધક-ધક' પર ડાન્સ કર્યો હતો, જેનો વીડિયો સોશિયલ મીડિયા પર વાયરલ થતા જ યુનિવર્સિટીની ગરિમા અને સંસ્કારોને લઈને અનેક સવાલો ઉભા થયા છે. આ વીડિયો સામે આવતા જ 'સંસ્કારી નગરી' તરીકે ઓળખાતા વડોદરાના શૈક્ષણિક વાતાવરણમાં ખળભળાટ મચી ગયો છે.
આ વીડિયોના મુદ્દે કોંગ્રેસ અને NSUI દ્વારા આક્રમક વિરોધ નોંધાવવામાં આવ્યો હતો. વિપક્ષી સંગઠનોએ સવાલ ઉઠાવ્યો હતો કે 'સંસ્કાર સંગમ' જેવા નામ હેઠળ યોજાતા કાર્યક્રમમાં આ પ્રકારનું પ્રદર્શન કેવી રીતે યોગ્ય ગણાય? સોશિયલ મીડિયા પર વીડિયો વાયરલ થયા બાદ વિદ્યાર્થિનીને ભારે ટ્રોલ કરવામાં આવી હતી, જેના કારણે મામલો વધુ ગંભીર બન્યો છે. સ્થાનિક નેતાઓ અને લોકોમાં પણ આ ઘટનાને લઈને ભારે રોષ જોવા મળી રહ્યો છે અને યુનિવર્સિટી પ્રશાસનની કામગીરી સામે આંગળી ચિંધાઈ રહી છે.
A female student of MS University - whose dance performance at an ABVP open-stage campus event was shared widely by Congress and NSUI with a press statement labelling it as ‘abhadra’ and against 'Samskar' - has come forward to present her side on social media, with tears in her… pic.twitter.com/aslRSxCEHr
— viral politics (@viral__politics) April 13, 2026
વિવાદ વકરતા સોશિયલ મીડિયા પર વિદ્યાર્થિનીનો એક રડતો વીડિયો પણ સામે આવ્યો છે, જેમાં તેણે પોતાની સફાઈ આપી છે. વિદ્યાર્થિનીએ રડતા રડતા માફી માંગતા જણાવ્યું હતું કે તેને ખ્યાલ નહોતો કે આટલો મોટો હંગામો થશે. તેણે વધુમાં ઉમેર્યું કે, "કદાચ ગીતની પસંદગી ખોટી હોઈ શકે, પરંતુ મેં સાડી પહેરી હતી અને પ્રદર્શનમાં ક્યાંય અશ્લીલતા નહોતી. તેમ છતાં સોશિયલ મીડિયા પર જે રીતે નકારાત્મક ટિપ્પણીઓ કરવામાં આવી રહી છે, તેનાથી તેને માનસિક યાતના મળી રહી છે." વિદ્યાર્થિનીએ એમ પણ સ્પષ્ટ કર્યું કે તે કોઈ પણ રાજકીય સંગઠન સાથે જોડાયેલી નથી.
બીજી તરફ, વાર્ષિક પરીક્ષાઓ નજીક હોવા છતાં યુનિવર્સિટી કેમ્પસમાં અભ્યાસને બદલે આવા કાર્યક્રમોના આયોજન બદલ સત્તાધીશોની આકરી ટીકા થઈ રહી છે. વાલીઓ અને શિક્ષણવિદો માની રહ્યા છે કે આ પ્રકારના વિવાદોથી યુનિવર્સિટીની પ્રતિષ્ઠાને નુકસાન પહોંચ્યું છે. હાલ આ સમગ્ર મામલો વડોદરાના રાજકારણ અને શિક્ષણ જગતમાં ચર્ચાનો વિષય બન્યો છે.
