જયપુર: રાજસ્થાનની રાજધાની જયપુરમાં આજે સાંજે આરક્ષણની માંગણીને લઈને જોરદાર હોબાળો અને હિંસક પ્રદર્શન જોવા મળ્યું હતું. જયપુરમાં વિચરતી અને વિમુક્ત જ્ઞાતિઓને 10 ટકા અનામત આપવાની માંગ સાથે એક મહાપંચાયતનું આયોજન કરવામાં આવ્યું હતું. અહીંની સભા સમાપ્ત થયા બાદ પ્રદર્શનકારીઓએ અચાનક મુખ્ય પ્રધાન આવાસ તરફ કૂચ કરવાની જાહેરાત કરતાં જ વાતાવરણ તંગ બની ગયું અને મોટી સંખ્યામાં પ્રદર્શનકારીઓ રાજધાનીના રસ્તાઓ પર ઉતરી આવ્યા હતા. 

સીએમ આવાસ તરફ માર્ચ અને પથરાવની ઘટના

તંગ પરિસ્થિતિને કાબૂમાં લેવા માટે પોલીસ અને પ્રદર્શનકારીઓ વચ્ચે ભારે ઝપાઝપી થઈ હતી. જોતજોતામાં મામલો એટલો બિચક્યો કે પ્રદર્શનકારીઓએ પોલીસ પર પથ્થરમારો શરૂ કરી દીધો હતો. ભીડને વિખેરવા માટે પોલીસે શરૂઆતમાં હળવો બળપ્રયોગ કર્યો હતો, પરંતુ સ્થિતિ કાબૂ બહાર જતાં આખરે ટીયર ગેસના ગોળા છોડવાની ફરજ પડી હતી. સૂત્રો દ્વારા મળતી જાણકારી પ્રમાણે જયપુરના વિદ્યાધર નગર વિસ્તારમાં આ મહાપંચાયતનું આયોજન કરવામાં આવ્યું હતું, જેમાં મોટી સંખ્યામાં લોકો એકઠા થયા હતા.

પથરાવમાં કેટલાક પોલીસકર્મીઓને ઈજાઓ

સભા પૂર્ણ થયા બાદ પ્રદર્શનકારીઓએ સીએમ આવાસ તરફ આગળ વધવાનો પ્રયાસ કર્યો હતો. પોલીસે તેમને રસ્તામાં જ રોકવાની કોશિશ કરી, પરંતુ તેઓ આગળ વધવા પર મક્કમ રહ્યા હતા. પોલીસ અને પ્રદર્શનકારીઓ વચ્ચેની બોલાચાલી અચાનક હિંસક ઝડપમાં ફેરવાઈ ગઈ હતી. પ્રદર્શનકારીઓ તરફથી કરવામાં આવેલા પથરાવમાં કેટલાક પોલીસકર્મીઓને ઈજાઓ પહોંચી હોવાના અહેવાલ છે. પોલીસે તાત્કાલિક કાર્યવાહી કરીને ઘણા પ્રદર્શનકારીઓને કસ્ટડીમાં લીધા છે અને સમગ્ર વિસ્તારમાં ચુસ્ત પોલીસ બંદોબસ્ત ગોઠવી દીધો છે.

કાયદો-વ્યવસ્થા જાળવવા માટે પોલીસ તૈનાત

આ હંગામા અંગે વિગતો આપતા ડીસીપી નોર્થ કરણ શર્માએ જણાવ્યું હતું કે, મહાપંચાયત બાદ પ્રદર્શનકારીઓ દ્વારા હંગામો અને પથરાવ કરવામાં આવ્યો હતો, પરંતુ પોલીસ ટીમે ત્વરિત કાર્યવાહી કરીને ભીડને ત્યાંથી ખદેડી દીધી હતી. હાલમાં ઘટનાસ્થળે શાંતિ સ્થપાયેલી છે અને કાયદો-વ્યવસ્થા જાળવવા માટે પૂરતો પોલીસ કાફલો તૈનાત છે. કેટલાક તોફાની તત્વોની અટકાયત પણ કરવામાં આવી છે. પથરાવમાં કોઈ મોટી સંપત્તિનું નુકસાન થયું નથી, પરંતુ આ ઘટનામાં કેટલા લોકોને કે પોલીસકર્મીઓને સામાન્ય ઈજા થઈ છે તેની સત્તાવાર યાદી મેળવવાની પ્રક્રિયા ચાલુ છે.