નવી દિલ્હીઃ ભારતીય ક્રિકેટ ટીમના મુખ્ય કોચ ગૌતમ ગંભીરે કહ્યું છે કે તાજેતરના ઇંગ્લેન્ડ પ્રવાસ પર સંજૂ સેમસનને ટીમમાંથી બહાર રાખવાનો નિર્ણય તેમના કોચિંગ કરિયરનો "કદાચ સૌથી મુશ્કેલ નિર્ણય" હતો. 

સેમસને ભારતમાં યોજાયેલા ટી-20 વર્લ્ડ કપમાં શાનદાર પ્રદર્શન કર્યું હતું, જેના કારણે પ્લેયર ઓફ ધ ટુર્નામેન્ટનો એવોર્ડ મેળવ્યો હતો. સતત ખરાબ ઈનિંગ્સ બાદ સેમસનને ઇંગ્લેન્ડ સામેની ટી-20 શ્રેણીમાંથી બહાર કરવામાં આવ્યો હતો અને તેની ગેરહાજરીમાં યુવા બેટ્સમેન વૈભવ સૂર્યવંશીને આંતરરાષ્ટ્રીય સ્તરે ડેબ્યૂ કરવાની તક આપવામાં આવી હતી.

ત્યાર બાદ ભારતીય ટીમે તેની જૂની ઓપનિંગ જોડી અભિષેક શર્મા અને સંજૂ સેમસન પર વિશ્વાસ મૂક્યો હતો. અફઘાનિસ્તાન સામેની ત્રણ મેચની ટી-20 સીરિઝમાં બંનેએ બે-બે અડધી સદી ફટકારી હતી, 3-0થી સીરિઝ જીત્યા બાદ મીડિયા સાથે વાત કરતા ગંભીરે સેમસનની પ્રશંસા કરતા કહ્યું કે ડ્રેસિંગ રૂમમાં તેની સતત હાજરીનો શ્રેય લેવાની જરૂર નથી. 

તેમણે કહ્યું કે સેમસનની પ્રતિભા જ તેમને ટીમમાં સ્થાન અપાવવા માટે પૂરતી હતી. ગંભીરે કહ્યું હતું કે, "કોઈ પણ ખેલાડી આ રીતે વર્લ્ડ કપમાં પ્લેયર ઓફ ધ ટુર્નામેન્ટ નથી બનતો. તેમની પાસે ચોક્કસપણે પ્રતિભા છે. તેણે ઘણું બધું પ્રાપ્ત કર્યું છે."

સેમસનને ઈંગ્લેન્ડ શ્રેણીમાંથી બહાર રાખવાના નિર્ણય અંગે ગંભીરે કહ્યું હતું કે, "તે ચોક્કસપણે મુશ્કેલ હતું. મારા કોચિંગ કાર્યકાળમાં આ કદાચ સૌથી મુશ્કેલ નિર્ણય હતો, ક્યારેક તમારે ખેલાડીના વર્તમાન ફોર્મ પર વિચાર કરવો પડે છે." 

ગંભીરે સ્પષ્ટતા કરી કે વૈભવ સૂર્યવંશીને તેની આગામી તકની રાહ જોવી પડશે. તેમણે કહ્યું કે ટીમે અફઘાનિસ્તાન સામેની શ્રેણીમાં પહેલાથી જ નિર્ણય લીધો હતો કે તેઓ વર્લ્ડ કપ દરમિયાન સફળ રહેલી જોડી સાથે વાપસી કરશે. 

અમે હંમેશા સ્પષ્ટ હતા કે અમે આ શ્રેણીમાં વર્લ્ડ કપની ટીમ સાથે પરત ફરવા માંગીએ છીએ. ત્રણ કે ચાર નિષ્ફળતાઓ પછી ખેલાડીઓ નિષ્ફળ જતા નથી." સૂર્યવંશી અંગે ગંભીરે કહ્યું કે તેમની સાથે સ્પષ્ટ વાતચીત થઈ છે કે તેણે તેની તકની રાહ જોવી પડશે. ટીમ તેમની પ્રતિભા અને ક્ષમતાથી સંપૂર્ણપણે વાકેફ છે.