વોશિંગ્ટન : અમેરિકા -ઇઝરાયલ અને ઈરાન વચ્ચે સતત એક મહિનાથી યુદ્ધ ચાલી રહ્યું છે. ઈરાનમાં સત્તા પરિવર્તનના ઉદેશ સાથે શરુ કરવામાં આવેલા યુદ્ધમાં અમેરિકા અને ઈઝરાયલને સફળતા મળી નથી. તેમજ ઈરાને પણ આ યુદ્ધમાં ઇઝરાયેલ અને અમેરિકાને જડબાતોડ જવાબ આપ્યો છે. ત્યારે હવે આ નિષ્ફળતાથી આક્રોશિત ડોનાલ્ડ ટ્રમ્પ હવે ઈરાનમાં સૈન્ય દળ ઉતારવાની તૈયારી કરી રહ્યા છે. અમેરિકા17,000 થી વધુ સૈનિકો તૈનાત કરી શકે છે.
અમેરિકાની જમીની કાર્યવાહી મહિનાઓ સુધી ચાલી શકે છે
આ અંગે પ્રકાશમાં આવેલા મીડિયા અહેવાલ મુજબ યુએસ ડિફેન્સ ડિપાર્ટમેન્ટ પેન્ટાગોન ઈરાનમાં જમીની કાર્યવાહી માટે તૈયારી કરી રહ્યું છે જે અઠવાડિયા સુધી ચાલી શકે છે. એવો દાવો કરવામાં આવે છે કે પેન્ટાગોન ઈરાનમાં જમીની કાર્યવાહી માટે વિકલ્પો વિકસાવી રહ્યું છે. આ કામગીરી પૂર્ણ-સ્તરના આક્રમણથી ઓછી હશે છતાં તેમાં હજારો સૈનિકો સામેલ થઈ શકે છે અને સંભવિત રીતે મહિનાઓ સુધી ચાલી શકે છે.
રાષ્ટ્રપતિ ડોનાલ્ડ ટ્રમ્પે હજુ સુધી કોઈ પણ યોજનાને મંજૂરી આપી નથી
આ ઉપરાંત અમેરિકન અધિકારીઓને ટાંકીને અહેવાલમાં જણાવવામાં આવ્યું છે કે રાષ્ટ્રપતિ ડોનાલ્ડ ટ્રમ્પે હજુ સુધી આમાંથી કોઈ પણ યોજનાને મંજૂરી આપી નથી. જ્યારે ઈરાનમાં અમેરિકાની જમીની કાર્યવાહીનો ઉદ્દેશ્ય ઇરાનમાં ઇસ્લામિક રિપબ્લિક દ્વારા નિયંત્રિત ટાપુઓ પર કબજો મેળવવાનો અને લાંબા સમય સુધી તેમના પર નિયંત્રણ જાળવી રાખવાનો પણ હોઈ શકે છે. નિષ્ણાતોના મતે આ પ્રદેશ પર નિયંત્રણ જાળવી રાખવાથી અમેરિકન સૈનિકોને અત્યાર સુધીના યુદ્ધ કરતાં ઘણા મોટા જોખમોનો સામનો કરવો પડશે. અત્યાર સુધી આ સંઘર્ષમાં 13 અમેરિકન સૈનિકો માર્યા ગયા છે અને 300 થી વધુ ઘાયલ થયા છે.
