જૂન મહિનો પૂર્ણ થવામાં છે અને 4 દિવસ બાદ જુલાઇની શરૂઆત થઇ જશે. દર મહિનાની જેમ આવતો મહિનો પણ ઘણાં મોટા ફેરફાર  (Rule Change From 1st July)ને લઇને આવવાનો છે. આમાં LPGને લઇને શરૂઆત થવા જઇ રહી છે. આ ફેરફારોમાં એલપીજી (LPG) સિલિન્ડરની કિંમતોમાં ફેરફારની સાથે જ ક્રેડિટ કાર્ડ સાથે જોડાયેલા નિયમો પણ ફેરફારા જઈ રહ્યા છે. આ સિવાય, કારના શોખીનોને પણ મોંઘવારીનો ઝટકો લાગવાનો છે. ચાલો આવા જ 5 મોટા ફેરફારો વિશે જાણીએ.

પહેલો ફેરફાર: LPG સિલિન્ડરના ભાવ બદલાશે

દર મહિનાની પહેલી તારીખે દેશના લોકોની નજર તેલ કંપનીઓ દ્વારા એલપીજી (LPG) સિલિન્ડરની કિંમતોમાં કરવામાં આવતા ફેરફાર પર ટકેલી હોય છે, કારણ કે આ બાબત સીધી ઘરના રસોડાના બજેટ સાથે જોડાયેલી છે. અમેરિકા-ઈરાન યુદ્ધના કારણે મધ્ય પૂર્વ (મિડલ ઈસ્ટ)માં વધેલા તણાવ વચ્ચે એલપીજીના ભાવ વધારા (LPG Price Hike)નો ઘણી વખત ઝટકો લાગ્યો છે.

ગત 1 જૂનના રોજ પણ કોમર્શિયલ એલપીજી સિલિન્ડર 53.50 રૂપિયા મોંઘો થયો હતો, જેના પછી દિલ્હીમાં 19 કિલોના એલપીજી સિલિન્ડરની કિંમત 3,113.50 રૂપિયા થઈ ગઈ હતી. આ સાથે જ 5 કિલોવાળા એલપીજી સિલિન્ડર પર પણ મોંઘવારીનો બોમ્બ ફૂટ્યો હતો. જો કે, 14 કિલોગ્રામવાળા રાંધણગેસ સિલિન્ડરની કિંમતો સ્થિર રાખવામાં આવી હતી.

બીજો ફેરફાર: ATFની કિંમતોમાં ફેરફાર

જુલાઈ મહિનાની પહેલી તારીખથી બીજો મોટો ફેરફાર હવાઈ સફર કરનારા મુસાફરો સાથે જોડાયેલો છે. ખરેખર તો, તેલ કંપનીઓ માત્ર એલપીજીની કિંમતોમાં જ સુધારો (LPG Price Change) નથી કરતી, પરંતુ એર ટર્બાઇન ફ્યુઅલ એટલે કે ATF (વિમાનના ઇંધણ)ના ભાવમાં પણ ફેરફાર કરે છે. આની કિંમતમાં થનારો વધારો હવાઈ મુસાફરીના ખર્ચમાં વધારો કરનારો સાબિત થાય છે, જ્યારે આમાં થનારો ઘટાડો ખર્ચમાં ઘટાડાનું કારણ બને છે.

ત્રીજો ફેરફાર: HDFC ક્રેડિટ કાર્ડનો નિયમ

જો તમે HDFC બેંકનું ક્રેડિટ કાર્ડ વાપરો છો, તો 1 જુલાઈ 2026થી તમારા માટે પણ એક નવો નિયમ (ક્રેડિટ કાર્ડ નિયમમાં ફેરફાર) આવી રહ્યો છે. વાત એમ છે કે, HDFC બેંકના 'રેગાલિયા ગોલ્ડ ક્રેડિટ કાર્ડ' (Regalia Gold Credit Card) ધારકોએ ઘરેલું એરપોર્ટ લાઉન્જ (Domestic Airport Lounge)ની ફ્રી સેવાનો લાભ ચાલુ રાખવા માટે, દર ત્રણ મહિને (ત્રિમાસિક) ખર્ચ કરવાની નવી મર્યાદા પૂરી કરવી પડશે. નવા સુધારા પ્રમાણે, હવે પછીના ત્રણ મહિનામાં આ ફ્રી સેવાનો લાભ મેળવવા માટે, ગ્રાહકોએ તેનાથી પહેલાના ત્રણ મહિનામાં ક્રેડિટ કાર્ડથી ઓછામાં ઓછો 60,000 રૂપિયાનો ખર્ચ કરવો પડશે.

ચોથો ફેરફાર: ફ્રીમાં આધાર અપડેટ

પહેલી જુલાઈથી UIDAI આધાર કાર્ડ ધારકોને મોટી રાહત આપવા જઈ રહ્યું છે. રેગ્યુલેટર દ્વારા બહાર પાડવામાં આવેલા નોટિફિકેશન મુજબ, જો તમારા આધાર કાર્ડ પર ઈમેલ આઈડી (Email ID) અપડેટ નથી થયું, તો 1 જુલાઈથી આ કામ બિલકુલ ફ્રીમાં થશે. UIDAI આધારમાં ઈમેલ અપડેટ કરવા માટે ડિસેમ્બર સુધી એટલે કે આગામી 6 મહિના માટે આ ફ્રી સર્વિસ આપી રહ્યું છે. આ પહેલાં આ કામ કરવા માટે 75 રૂપિયાનો ચાર્જ ચૂકવવો પડતો હતો.

પાંચમો ફેરફાર: કાર ખરીદવી મોંઘી પડશે

જુલાઈના પહેલા જ દિવસથી કાર ખરીદનારાઓને ઝટકો લાગવાનો છે. KIA મોટર્સ સહિત કેટલીક ઓટોમોબાઈલ કંપનીઓ પોતાની કારના ભાવ વધારવા જઈ રહી છે. કિઆ (KIA) કંપનીએ પોતાની કારની કિંમતોમાં 2% સુધીના વધારાની જાહેરાત કરી છે, તો બીજી તરફ ટાટા મોટર્સ (Tata Motors) પણ તેના ICE (પેટ્રોલ-ડીઝલ એન્જિન) અને EV (ઇલેક્ટ્રિક વ્હીકલ) મોડલ્સની કિંમતોમાં 1.5% સુધીનો વધારો કરવાની તૈયારીમાં છે.