મુંબઈ : મુંબઈની લાઈફલાઈન ગણાતી BEST બસોમાં મુસાફરોની સંખ્યા ઘટી રહી છે, પરંતુ તેની સામે BESTની આવકમાં નોંધપાત્ર વધારો થયો છે. મે 2025માં બસોના ભાડામાં વધારો કર્યા બાદ 2025-26માં BESTના પરિવહન વિભાગની આવક રૂ.497.25 કરોડ વધીને રૂ.2,137 કરોડ થઈ છે. આ સાથે પરિવહન વિભાગની ખોટમાં પણ રૂ.540.46 કરોડનો ઘટાડો થયો છે.
BESTના અધિકારીઓએ બુધવારે યોજાયેલી BEST સમિતિની બેઠકમાં સંસ્થાની નાણાકીય સ્થિતિ અંગે માહિતી આપી હતી. આંકડા અનુસાર, 2024-25માં BESTના પરિવહન વિભાગની આવક રૂ.1,640 કરોડ હતી, જે 2025-26માં વધીને રૂ.2,137 કરોડ થઈ છે. બીજી તરફ, સમગ્ર BEST ઉપક્રમની ખોટ 2024-25માં આશરે રૂ.1,361 કરોડ હતી, જે ઘટીને 2025-26માં લગભગ રૂ.740 કરોડ થઈ છે. એટલે કે કુલ ખોટમાં આશરે રૂ.739.97 કરોડનો ઘટાડો થયો છે.
ભાડામાં વધારાની સીધી અસર મુસાફરોની સંખ્યા પર જોવા મળી છે. મે 2025માં BESTએ નોન-એસી બસોનું લઘુત્તમ ભાડું રૂ.5થી વધારીને રૂ.10 કર્યું હતું, જ્યારે એસી બસોનું લઘુત્તમ ભાડું રૂ.6થી વધારીને રૂ.12 કરવામાં આવ્યું હતું. ભાડું વધ્યા બાદ દરરોજ બસમાં મુસાફરી કરતા લોકોની સંખ્યા આશરે 25થી 27 લાખથી ઘટીને 21થી 23 લાખ થઈ ગઈ છે. એટલે કે દરરોજ લગભગ 2થી 4 લાખ મુસાફરો ઓછા થયા છે.
મુસાફરો ઘટ્યા હોવા છતાં ટિકિટમાંથી થતી આવકમાં વધારો થયો છે. BEST પાસે હાલમાં કુલ 2,834 બસો છે, જેમાં માત્ર 249 બસો BESTની પોતાની છે, જ્યારે બાકીની બસો વેટ લીઝ પર ચલાવવામાં આવે છે. વેટ લીઝની બસોમાંથી ટિકિટની આવકમાં રૂ.235.30 કરોડનો વધારો થયો છે. બીજી તરફ, BESTની પોતાની બસોમાંથી ટિકિટની આવક રૂ.6.31 કરોડ ઘટી છે. આરક્ષિત બસ સેવાઓની આવકમાં રૂ.2.65 કરોડ અને માસિક બસ પાસની આવકમાં રૂ.0.42 કરોડનો વધારો થયો છે.
BESTની આવક વધવામાં BMC તરફથી મળતી આર્થિક મદદનો પણ ફાળો રહ્યો છે. 2024-25માં BESTના બસ વિભાગને BMC તરફથી રૂ.794.52 કરોડનું અનુદાન મળ્યું હતું, જે 2025-26માં વધીને રૂ.1,000 કરોડ થયું છે. એટલે કે BMCની મદદમાં રૂ.205.48 કરોડનો વધારો થયો છે. જોકે BESTએ BMC પાસેથી વધુ આશરે રૂ.350 કરોડની આર્થિક મદદની પણ માંગ કરી છે. આ વર્ષે અત્યાર સુધીમાં BMC તરફથી BESTને રૂ.800 કરોડથી વધુની રકમ મળી હોવાનું જણાવાયું છે.
BESTના અધિકારીઓના જણાવ્યા અનુસાર, ભાડામાં વધારો નાણાકીય વર્ષના મધ્યમાં લાગુ કરવામાં આવ્યો હોવાથી તેની સંપૂર્ણ અસર હજુ આંકડામાં જોવા મળી નથી. BESTએ અંદાજ લગાવ્યો હતો કે ભાડામાં વધારાથી સમગ્ર વર્ષ દરમિયાન ટિકિટની આવકમાં આશરે રૂ.590 કરોડનો વધારો થઈ શકે છે. તેથી આગામી નાણાકીય વર્ષના આંકડામાં ભાડા વધારાની સંપૂર્ણ અસર વધુ સ્પષ્ટ થવાની શક્યતા છે.
