મુખ્ય પ્રધાન દેવેન્દ્ર ફડણવીસ સાથે મુલાકાત: 43 નવી જાતિના સમાવેશ માટે કેન્દ્ર જશે

(અમારા પ્રતિનિધિ તરફથી)
મુંબઈ: ઓબીસી સમાજને માટે એક મોટી રાહતના સમાચારમાં પેટા સમિતિના અધ્યક્ષ અને મહેસૂલ પ્રધાન ચંદ્રશેખર બાવનકુળેએ ઓબીસી કેબિનેટ સબ-કમિટીની નોન-ક્રીમી લેયર મર્યાદા આઠ થી વધારીને 15 લાખ કરવાની ભલામણ અંગે મુખ્ય પ્રધાન દેવેન્દ્ર ફડણવીસ સાથે બેઠક યોજવાનો નિર્દેશ આપ્યો છે.

આ ભલામણ સાથે એ પણ જણાવવામાં આવ્યું હતું કે કેન્દ્ર સરકારની અન્ય પછાત વર્ગોની યાદીમાં સમાવિષ્ટ ન હોય તેવી 43 જાતિઓ માટેનો પ્રસ્તાવ રાષ્ટ્રીય પછાત વર્ગ આયોગને સુપરત કરવામાં આવ્યો છે. ઓબીસી કેબિનેટ સબ-કમિટીની બેઠક મહેસૂલ પ્રધાન ચંદ્રશેખર બાવનકુળેની અધ્યક્ષતામાં મંત્રાલય ખાતે યોજાઈ હતી. આ પ્રસંગે અન્ન અને નાગરી પુરવઠા ખાતાના પ્રધાન છગન ભુજબળ, વન ખાતાના પ્રધાન ગણેશ નાઈક, પાણી પુરવઠા અને સ્વચ્છતા ખાતાના પ્રધાન ગુલાબરાવ પાટિલ, માટી અને જળ સંરક્ષણ ખાતાના પ્રધાન સંજય રાઠોડ, અન્ય પછાત વર્ગ કલ્યાણ અને ડેરી વિકાસ ખાતાના પ્રધાન અતુલ સાવે અને વિવિધ વિભાગોના વરિષ્ઠ અધિકારીઓ હાજર રહ્યા હતા.

બેઠકમાં વિવિધ ટેકનિકલ અને નીતિગત મુદ્દાઓની સમીક્ષા કરવામાં આવી હતી. જેમાં હાઇકોર્ટના નિર્ણય મુજબ જાતિ ચકાસણી સમિતિ તરફથી પડતર કેસોનો નિકાલ, ઓબીસી વિદ્યાર્થીઓ માટે શૈક્ષણિક છૂટછાટો અને વિવિધ નિગમોમાં નિમણૂકોનો મુદ્દો પ્રાથમિકતા પર ઉકેલવા, રાજ્ય પછાત વર્ગ આયોગને મજબૂત બનાવવા, નાયબ નિયામકો અને સહાયક નિયામકો માટે વાહનો ખરીદવાની મંજૂરી, હાલમાં શિબિરોનું આયોજન અને તેમના દ્વારા જાતિ પ્રમાણપત્રોનું વિતરણ, અને જિલ્લા મેજિસ્ટ્રેટ સાથે બેઠક યોજવાની ભલામણ અને પ્રમાણપત્રો ફક્ત યોગ્ય અને લાયક વ્યક્તિઓને જ આપવામાં આવે અને પ્રમાણપત્રો ખોટા લોકોને વહેંચવામાં ન આવે તેવા આદેશો આપવાનો સમાવેશ થાય છે. બાવનકુળેએ જણાવ્યું હતું કે છાત્રાલયો અને કચેરીઓ માટે 10 જિલ્લાઓમાં જગ્યા પૂરી પાડવા માટે આવતા અઠવાડિયે જિલ્લા મેજિસ્ટ્રેટની બેઠક યોજાશે.

બેઠકમાં ખાસ હાજર રહેલા લક્ષ્મણ હાકેએ વહીવટી ભૂલો તરફ ધ્યાન દોર્યું. તેમણે માગણી કરી હતી કે, ‘જોડણીની ભૂલોને કારણે રાજ્યમાં 27 થી 32 જાતિઓ સરકારી લાભોથી વંચિત છે, અને તાત્કાલિક સુધારા માટે કેન્દ્ર સરકારને દરખાસ્ત મોકલવી જોઈએ.’