મુંબઈ: ભારતના મુખ્ય ન્યાયાધીશ (સીજેઆઈ) સૂર્યકાંત દ્વારા કોંગ્રેસ નેતા રાહુલ ગાંધી અને મલ્લિકાર્જુન ખડગે સહિતના વિપક્ષી નેતાઓને મળવાનો ઈનકાર કરવામાં આવ્યા બાદ મહારાષ્ટ્રના મુખ્ય પ્રધાન દેવેન્દ્ર ફડણવીસે ઈન્ડિ ગઠબંધન પર નિશાન સાધ્યું હતું. તેમણે આરોપ લગાવ્યો કે વિપક્ષ ન્યાયિક સંસ્થાઓને બદનામ કરીને લોકોનો તેમનામાં રહેલો વિશ્વાસ ઘટાડવાનો પ્રયાસ કરી રહ્યો છે.  

નાગપુરમાં પત્રકારો સાથે વાત કરતાં ફડણવીસે જણાવ્યું હતું કે જો વિપક્ષને કોઈ ફરિયાદ કે વાંધો હોય, તો તેણે કોર્ટમાં જઈને કાયદાકીય રીતે લડત આપવી જોઈએ. તેમણે સવાલ કર્યો કે બંધારણમાં ક્યાં લખ્યું છે કે મુખ્ય ન્યાયાધીશે વિરોધ પ્રદર્શન લઈને આવતા રાજકીય નેતાઓને મળવું જ પડે? ફડણવીસે સુપ્રીમ કોર્ટના વલણને યોગ્ય ગણાવ્યું અને વિપક્ષના માર્ચ કાઢવાના નિર્ણયની ટીકા કરી હતી.

ફડણવીસે એવો પણ આરોપ લગાવ્યો કે મુખ્ય ન્યાયાધીશે મળવાનો ઈનકાર કર્યા બાદ વિપક્ષી નેતાઓએ તેમની વિરુદ્ધ અપમાનજનક ભાષાનો ઉપયોગ કર્યો. તેમના મતે, આ પ્રકારનાં પગલાંથી દેશની સંસ્થાઓ, ખાસ કરીને ન્યાયતંત્રની છબીને નુકસાન પહોંચાડવાનો અને લોકોનો વિશ્વાસ ડગમગાવવાનો પ્રયાસ થઈ રહ્યો છે. આ તમામ આરોપો ફડણવીસે વિપક્ષ સામે લગાવ્યા છે. 

અત્રે ઉલ્લેખનીય છે કે છેલ્લા કેટલાક દિવસોથી મુખ્ય ચૂંટણી કમિશનર જ્ઞાનેશ કુમારના રાજીનામા મુદ્દે વિવાદ ગરમાયો છે. વિવાદનું કેન્દ્ર ‘વોટ ચોરી’ના આરોપો છે. ઈન્ડિ ગઠબંધનના નેતાઓએ મુખ્ય ચૂંટણી કમિશનર જ્ઞાનેશ કુમાર સામે વિરોધ નોંધાવવા અને તેમના રાજીનામાની માંગ સાથે 12 ઑક્ટોબરે સુપ્રીમ કોર્ટ સુધી માર્ચ કાઢવાની જાહેરાત કરી હતી. રાહુલ ગાંધી અને મલ્લિકાર્જુન ખડગેએ મુખ્ય ન્યાયાધીશ સૂર્યકાંત પાસે મુલાકાત માટે સમય માગ્યો હતો, જેથી તેઓ ચૂંટણી પ્રક્રિયા અંગેની પોતાના દાવાઓ રજૂ કરી શકે. 

મુખ્ય ન્યાયાધીશે મુલાકાતનો સમય આપવાનો ઈનકાર કરતાં જણાવ્યું હતું કે સંબંધિત મુદ્દાઓ સુપ્રીમ કોર્ટ સમક્ષ પહેલેથી જ વિચારાધીન છે. આથી, આવા મુદ્દાઓ અંગે યોગ્ય કાયદાકીય માર્ગ અપનાવવો જોઈએ. આ ઘટનાક્રમ બાદ ફડણવીસે વિપક્ષની રણનીતિ પર સવાલ ઉઠાવ્યા છે, જ્યારે વિપક્ષે માર્ચ દ્વારા ચૂંટણી પ્રક્રિયા અંગેના પોતાના આક્ષેપો અને માંગણીઓ રજૂ કરવાની તૈયારી કરી હતી.