ફિલ્મ 'ધુરંધર 2' અત્યારે બોક્સ ઓફિસ પર તોફાન મચાવી રહી છે અને દરરોજ નવા રેકોર્ડ સ્થાપિત કરી રહી છે. માત્ર 24 દિવસમાં આ ફિલ્મે ભારતમાં 1050 કરોડથી વધુનો આંકડો વટાવી દીધો છે, જ્યારે વૈશ્વિક સ્તરે તેની કમાણી 1700 કરોડને પાર પહોંચી ગઈ છે. જોકે, આ જબરદસ્ત સફળતાની સાથે ફિલ્મ વિવાદોમાં પણ ઘેરાયેલી જોવા મળી રહી છે. પ્રોપેગન્ડાના આક્ષેપો બાદ હવે આ ફિલ્મ પર પ્રખ્યાત ગીતની ચોરીનો ગંભીર આરોપ લાગતા મનોરંજન જગતમાં ખળભળાટ મચી ગયો છે.

વિવાદનું મુખ્ય કારણ 1989ની સુપરહિટ ફિલ્મ 'ત્રિદેવ'નું આઇકોનિક ગીત 'તિરછી ટોપીવાલે' છે. 'ધુરંધર 2' માં આ ગીતનો ઉપયોગ કરવામાં આવ્યો છે, પરંતુ આરોપ છે કે મેકર્સે આ માટે કોઈ પરવાનગી લીધી નથી. 'ત્રિદેવ'ના નિર્દેશક રાજીવ રાયે આ મામલે કોર્ટના દરવાજા ખખડાવ્યા છે. રાજીવ રાયે એક ઇન્ટરવ્યુમાં આક્રોશ વ્યક્ત કરતા જણાવ્યું કે, કોઈની પરવાનગી વગર ગીતનો ઉપયોગ કરવો એ સ્પષ્ટપણે 'ચોરી' છે અને આ મામલે તેઓ કાયદાકીય લડત લડવા તૈયાર છે.

શું છે રાજીવ રાયનો પક્ષ?
રાજીવ રાયે જણાવ્યું કે, "આ ગીત મારુ ક્રિએશન છે. મેં આ ગીત બનાવવા માટે આનંદ બક્ષી અને સંગીતકારોને પૈસા ચૂકવ્યા હતા. 'ધુરંધર 2' ની ટીમે ન તો મારી મંજૂરી લીધી, ન તો મને કોઈ ક્રેડિટ આપી." તેમણે વધુમાં ઉમેર્યું કે ગીતને અલ્ટર કરીને બીજી ફિલ્મમાં મૂકવું એ ડબલ ચોરી સમાન છે. તેમણે આ બાબતને એક ગુનો ગણાવીને મેકર્સ સામે આકરા શબ્દોમાં નારાજગી વ્યક્ત કરી છે.

જેમને યાદ ન હોય તેમને જણાવી દઈએ કે વર્ષ 1989માં રિલીઝ થયેલી 'ત્રિદેવ' તે સમયની બ્લોકબસ્ટર ફિલ્મ હતી. સની દેઓલ, જેકી શ્રોફ, નસીરુદ્દીન શાહ અને માધુરી દીક્ષિત જેવા દિગ્ગજ કલાકારોથી સજ્જ આ ફિલ્મ તેના ગીતોને કારણે આજે પણ લોકપ્રિય છે. 'તિરછી ટોપીવાલે' ગીત તે સમયે ગલીએ-ગલીએ ગુંજતું હતું. હવે જ્યારે દાયકાઓ પછી આ ગીત ફરી ચર્ચામાં આવ્યું છે, ત્યારે કાયદાકીય ગૂંચવણોને કારણે 'ધુરંધર 2' ના મેકર્સની મુશ્કેલીઓ વધી શકે છે.