ભુજઃ કચ્છની સંવેદનશીલ દરિયાઈ સરહદ પરથી બિનવારસી હાલતમાં કેફી દ્રવ્યો મળવાનો સિલસિલો યથાવત્ રહ્યો છે. ગત બુધવારે જખૌ મરીન પોલીસ અને એસઓજીની ટીમને પેટ્રોલિંગ દરમિયાન વધુ ૨૦ ચરસના બિનવારસુ પેકેટો મળી આવ્યા છે. છેલ્લા ૧૨ દિવસમાં વિવિધ એજન્સીઓએ કુલ ૧૪૧ કિલો ચરસ ઝડપી પાડ્યું છે, જેની આંતરરાષ્ટ્રીય બજારમાં કિંમત અંદાજે રૂા. ૭૦.૫૦ કરોડ આંકવામાં આવી રહી છે.
પ્રાપ્ત વિગતો મુજબ, કોઠારા પોલીસ અને એસઓજીના કર્મચારીઓ ખુઅડાના દરિયાકિનારે પેટ્રોલિંગમાં હતા ત્યારે ૧૦ માદક પદાર્થના પેકેટ મળી આવ્યા હતા, જયારે જખૌ મરીન પોલીસ, એસઓજી અને સ્ટેટ આઈબીની ટીમે સૈયદ સુલેમાન પીર ટાપુ પર બાઈક પેટ્રોલિંગ દરમિયાન અન્ય ૧૦ પેકેટ કબજે કર્યા હતા.
અત્રે નોંધનીય છે કે, ૧લી તારીખથી શરૂ થયેલા સર્ચ ઓપરેશન દરમ્યાન જખૌ પોલીસને ખિદરત ટાપુ પરથી ૧૦, શિયાળબારા ટાપુ પરથી ૧૦ અને રાપર ગઢમાંથી ૨ ચરસના પેકેટ મળ્યાં હતા. જયારે સીમા સુરક્ષા દાળને મોટા પીર બેટ પરથી ૭, સુગર બેટ પરથી ૨૦ અને અતિ દુર્ગમ શિયાળ ક્રીક પરથી ૧૦ જેટલા પેકેટ મળ્યાં હતા. આ ઉપરાંત કોસ્ટગાર્ડને પેટ્રોલિંગ દરમ્યાન શેખરણપીરમાંથી ૨૦ અને બોયા ટાપુ પરથી ૨૦ પેકેટ હાથ લાગ્યાં હતા.જયારે માંડવી ૭, નલિયા ૧૦, અને નારાયણ સરોવર પોલીસને ૩ બિનવારસુ ચરસના પેકેટ મળી આવ્યાં હતા.
પાકિસ્તાનને અડીને આવેલો કચ્છનો દરિયાકાંઠો અને ક્રીક વિસ્તાર ડ્રગ્સ સ્મગલિંગ માટે સોફ્ટ ટાર્ગેટ બની રહ્યો છે. સામાન્ય રીતે આંતરરાષ્ટ્રીય જળસીમામાં પકડાઈ જવાની બીકે સ્મગલરો દ્વારા દરિયામાં ફેંકી દેવાયેલો જથ્થો ભરતીના પાણી સાથે કિનારે તણાઈ આવતો હોય છે. વારંવાર મળી રહેલા આ પેકેટો પાછળ કયું આંતરરાષ્ટ્રીય નેટવર્ક સક્રિય છે, તે શોધવા માટે કેન્દ્રીય અને રાજ્યની એજન્સીઓએ ઊંડાણપૂર્વક તપાસ હાથ ધરી છે. હાલમાં સમગ્ર દરિયાઈ પટ્ટી પર સુરક્ષા એજન્સીઓ દ્વારા સઘન સર્ચ ઓપરેશન શરૂ રાખવામાં આવ્યું છે.
(ઉત્સવ વૈદ્ય)
