હૈદરાબાદ: તેલંગાણાના મુખ્ય પ્રધાન રેવંત રેડ્ડીએ સોમવારે ઉત્તર અને દક્ષિણ ભારતની ધાર્મિક અને રાજકીય ઓળખની સરખામણી કરીને એક રાજકીય વિવાદ સર્જ્યો છે. ભાજપે રેડ્ડીના આ પગલાની સખત નિંદા કરી છે અને તેને રાજકીય ફાયદા માટે સમાજને વહેંચવાનો પ્રયાસ ગણાવ્યો છે.
એક મીડિયા કાર્યક્રમ દરમિયાન રેવંત રેડ્ડીએ ભાજપ તરફથી 'જય શ્રી રામ'ના નારાના વારંવાર ઉપયોગ પર સવાલ ઉઠાવ્યા હતા. તેમણે પૂછ્યું કે વડા પ્રધાન નરેન્દ્ર મોદી અને ભાજપના નેતાઓ તે જ રીતે 'હર હર મહાદેવ'ના નારા કેમ નથી લગાવતા?
ભગવાન રામને અમીરોના અને ભગવાન શિવને ગરીબોના દેવતા ગણાવ્યા
રેડ્ડીએ કહ્યું, "આપણે દ્રવિડ છીએ, તેઓ આર્ય છે" આપણે ભગવાન શિવના ભક્ત છીએ, જ્યારે તેઓ ભગવાન રામના ભક્ત છે. તેમણે ભગવાન શિવને ગરીબોના દેવતા અને ભગવાન રામને અમીરોના દેવતા ગણાવ્યા. તેમણે એમ પણ કહ્યું કે લોકો બંને દેવતાઓની પૂજા કરે છે. તેમની આ વાતો ઉત્તર અને દક્ષિણ ભારતની રાજકીય સંસ્કૃતિઓમાં મોટો તફાવત છે તેવા તર્ક સમર્થનમાં હતી.
પરિસીમનની પ્રક્રિયા પર ઉઠાવ્યા સવાલ
રેડ્ડીએ લોકસભા બેઠકોના પરિસીમનની પ્રક્રિયા પર પણ ચિંતા વ્યક્ત કરી હતી. તેમનો તર્ક હતો કે વસ્તીના આધારે બેઠકોની સંખ્યા વધવાથી દક્ષિણી રાજ્યોનું રાજકીય મહત્વ બદલાઈ શકે છે.
ભાજપે કર્યો પલટવાર
આ નિવેદન પર ભાજપના નેતા અને કેન્દ્રીય પ્રધાન બંડી સંજય કુમારે તીખી પ્રતિક્રિયા આપી હતી. તેમણે રેડ્ડી પર ભગવાન શિવ અને ભગવાન રામ વચ્ચે રાજકીય ભાગલા પાડવાનો આરોપ લગાવ્યો હતો. સંજયે કાશી વિશ્વનાથ મંદિર સાથે વડા પ્રધાન મોદીના જોડાણનો ઉલ્લેખ કર્યો અને વેમુલાવાડાની તેમની મુલાકાતનો હવાલો આપ્યો હતો. તેમણે રેડ્ડીના એ દાવાને ફગાવી દીધો કે ભાજપના નેતાઓ ભગવાન શિવનું નામ નથી લેતા.
ભાજપના નેતાએ કહ્યું, "રેવંત રેડ્ડીએ અગાઉ કહ્યું હતું કે મુસ્લિમો જ કોંગ્રેસ છે અને કોંગ્રેસ જ મુસ્લિમ છે, અને હવે તેઓ ભગવાન રામ અને ભગવાન શિવ વચ્ચે રાજકીય રેખાઓ દોરી રહ્યા છે. તેલંગાણાના મુખ્ય પ્રધાન હોવાના નાતે, જ્યાં વેમુલાવાડામાં દક્ષિણ કાશી અને ભદ્રાચલમમાં દક્ષિણ અયોધ્યા આવેલી છે, રેડ્ડીએ ભગવાન રામ અને ભગવાન શિવને ઉત્તર અને દક્ષિણમાં વહેંચવાનો પ્રયાસ કરવો જોઈએ નહીં."
