લખનઉઃ ઉત્તર પ્રદેશના અયોધ્યાના રામ મંદિરમાં દરરોજ લાખો ભક્તો આવે છે અને ભગવાન રામ માટે પૈસા, દાગીના તેમજ અન્ય વસ્તુઓ ચઢાવે છે. આ દાન મંદિરના દાનપાત્રો એટલે કે પેટીઓમાં જમા થાય છે. આ પેટીઓમાંથી પૈસા કાઢવા અને ગણવાનું કામ કેટલાક કર્મચારીઓને સોંપવામાં આવ્યું હતું. હવે આરોપ એવો છે કે આ જ કર્મચારીઓએ ભક્તોના ચઢાવામાંથી કરોડો રૂપિયા ચોરી લીધા. આ મામલો એટલા માટે વધુ મોટો બની ગયો કારણ કે જે કર્મચારીઓનો મહિનાનો પગાર 18 થી 20 હજાર રૂપિયા હતો, તેમણે કરોડોની જમીન અને પ્લોટ ખરીદી લીધા. બસ અહીંથી જ આખો મામલો બહાર આવ્યો અને હવે એસઆઈટી (SIT) તપાસ થઈ રહી છે.

આ મામલો ત્યારે ચર્ચામાં આવ્યો જ્યારે ઉત્તર પ્રદેશના પૂર્વ મુખ્યમંત્રી અને સમાજવાદી પાર્ટીના વડા અખિલેશ યાદવે સોશિયલ મીડિયા પ્લેટફોર્મ 'X' (ટ્વિટર) પર રામ મંદિરના ચઢાવામાં ભ્રષ્ટાચારનો મુદ્દો ઉઠાવ્યો. અખિલેશ યાદવ આ મામલાને સૌથી પહેલા સામે લાવનારા લોકોમાંના એક છે. તેમણે આ મુદ્દો ઉઠાવ્યા પછી જ રાજકીય અને વહીવટી વર્તુળોમાં દોડધામ મચી ગઈ અને ત્યારબાદ તપાસની માંગ અને કાર્યવાહી શરુ થઇ.

કર્મચારીઓની આવક અને તેમની સંપત્તિમાં આસમાન-જમીનનો તફાવત

રામ મંદિરમાં ચઢાવાના પૈસા ગણવાનું કામ કેટલાક ખાસ કર્મચારીઓને સોંપવામાં આવ્યું હતું. આ કામ ખૂબ જ જવાબદારીભર્યું હતું કારણ કે દરરોજ હજારો ભક્તો દાન આપે છે. પરંતુ તપાસ એજન્સીઓને શંકા ગઈ કે આ કર્મચારીઓની આવક અને તેમની સંપત્તિમાં આસમાન-જમીનનો તફાવત છે.

એક કર્મચારીએ આશરે દોઢ કરોડ રૂપિયાની જમીન ખરીદી અને બીજા કર્મચારીએ આશરે 40 લાખ રૂપિયાનો પ્લોટ લીધો, જ્યારે બંનેનો પગાર મહિનાનો માત્ર 18 થી 20 હજાર રૂપિયા જ હતો. શંકાના આધારે તપાસ શરૂ કરવામાં આવી. સમાજવાદી પાર્ટીના વડા અખિલેશ યાદવે પણ આ મુદ્દો ઉઠાવ્યો હતો, ત્યાર બાદ આ મામલો આખા રાજ્યમાં ચર્ચાનો વિષય બન્યો છે.

લવકુશ મિશ્રા કોણ છે અને કેમ ચર્ચામાં છે?

આ આખા મામલામાં સૌથી પહેલું નામ લવકુશ મિશ્રાનું આવ્યું છે. આ યુવક અયોધ્યા નજીક રુદૌલીના શુજાગંજ વિસ્તારના મીનાપુર ફગૌલી ગામનો રહેવાસી છે. તેની જવાબદારી રામ મંદિરમાં દાનપાત્રોમાંથી પૈસા કાઢવાની અને ગણવાની હતી.

તપાસ ટીમ જ્યારે તેના ઘરે પહોંચી તો ત્યાંથી 10 લાખ રૂપિયા રોકડા મળી આવ્યા. આમાંથી કેટલાક પૈસા ઘરની તિજોરીમાં રાખ્યા હતા અને કેટલાક પૈસા છાણ (ગોબર)ના ઢગલામાં છુપાવીને રાખવામાં આવ્યા હતા. ગામના લોકો પણ જણાવે છે કે રામ મંદિરમાં નોકરી મળ્યા પછી લવકુશની આર્થિક સ્થિતિ ખૂબ જ ઝડપથી બદલાઈ ગઈ હતી.