ભુજઃ ભુજ નજીક આવેલા માધાપરના ઐશ્વર્યાનગર વિસ્તારમાં એક ધાર્મિક ઉત્સવ દરમિયાન યોજાયેલા બટુકભોજનમાં છાશ પીવાના કારણે ૪૦ જેટલા માસૂમ બાળકોને ફૂડ પોઇઝનિંગ (ઝેરી અસર) થવાની ગંભીર ઘટના સામે આવી હતી. ભોજન લીધા બાદ એકાએક બાળકોની તબિયત લથડતાં તમામને તાત્કાલિક ભુજની જી.કે. જનરલ હોસ્પિટલમાં સારવાર અર્થે ખસેડવામાં આવ્યા હતા.
શું છે મામલો
મળતી માહિતી અનુસાર, માધાપરના ઐશ્વર્યાનગર સ્થિત એક મંદિરમાં અધિક માસની પુર્ણાહુતી નિમિતે આયોજિત ધાર્મિક પ્રસંગમાં બાળકો માટે સામૂહિક બાલ ભોજન એટલે કે 'બટુકભોજન'નું આયોજન કરવામાં આવ્યું હતું. આ ધાર્મિક કાર્યક્રમમાં આસપાસના પરિવારોના અંદાજે ૪૦ થી વધુ બાળકો ઉત્સાહભેર ભોજન પ્રસાદ લેવા માટે એકઠા થયા હતા. જોકે, ભોજન દરમિયાન પીરસવામાં આવેલી છાશ બાળકો માટે હાનિકારક સાબિત થઈ હતી.
પ્રાથમિક તપાસમાં બહાર આવ્યું છે કે, છાશ બનાવવા માટે મોટી માત્રામાં દહીં બહારથી મંગાવવામાં આવ્યું હતું. ચાલુ ઉનાળાની અતિશય ગરમી અને ભેજયુક્ત વાતાવરણના કારણે આ દહીં લાંબો સમય ફ્રિજ વગર બહાર ખુલ્લું રહ્યું હતું અથવા તે પહેલેથી જ વાસી હોવાની આશંકા છે. આ દહીંમાંથી બનેલી છાશ પીધાના થોડા જ સમયમાં બાળકોને પેટમાં સખત દુખાવો, ચક્કર આવવા અને સામૂહિક ઉલ્ટી-ઝાડાની તકલીફ શરૂ થઈ ગઈ હતી. એકસાથે આટલી મોટી સંખ્યામાં બાળકોની સ્થિતિ બગડતાં જ આયોજકો અને વાલીઓમાં ભારે નાસભાગ અને ચિંતાનો માહોલ સર્જાયો હતો.
ઘટનાની ગંભીરતાને પગલે આયોજકો અને વાલીઓએ ખાનગી વાહનો તેમજ એમ્બ્યુલન્સ મારફતે તમામ અસરગ્રસ્ત બાળકોને તાત્કાલિક ભુજની સરકારી જી.કે. જનરલ હોસ્પિટલ ખાતે રવાના કર્યા હતા. હોસ્પિટલ પ્રશાસન દ્વારા તાકીદની પરિસ્થિતિને ધ્યાને રાખી બાળરોગ નિષ્ણાતોની વિશેષ ટુકડીને તૈનાત કરી ઇમરજન્સી સારવાર શરૂ કરવામાં આવી હતી. હોસ્પિટલના સત્તાધીશોના જણાવ્યા અનુસાર, સદનસીબે સમયસર તબીબી સહાય મળી જતાં હાલ તમામ બાળકોની સ્થિતિ સ્થિર અને જોખમથી બહાર છે.
બીજી તરફ, ઘટનાની જાણ થતાં જ સ્થાનિક આરોગ્ય વિભાગ અને ફૂડ ઇન્સ્પેક્ટરોની ટુકડી સક્રિય થઈ છે અને જે દહીં તેમજ છાશનો ઉપયોગ કરવામાં આવ્યો હતો, તેના સેમ્પલ મેળવી લેબોરેટરી ટેસ્ટિંગ માટે મોકલવાની પ્રક્રિયા હાથ ધરી હોવાનું જાણવા મળી રહ્યું છે.
(ઉત્સવ વૈદ્ય)
