(અમારા પ્રતિનિધિ તરફથી)

અમદાવાદ:  ગુજરાતમાં ચોમાસું શરૂ થવાના કોઇ પાક્કા એંધાણ નથી, પરંતુ પ્રી-મોન્સૂન એક્ટિવિટીની શરૂઆત થઈ ચૂકી છે. હવામાન વિભાગના જણાવ્યા અનુસાર, દેશમાં નૈઋત્યનું ચોમાસું ધીમે-ધીમે આગળ વધી રહ્યું છે. જો કે ગુજરાતમાં ચોમાસું આવતા હજુ લાંબી રાહ જોવી પડશે. હાલમાં એક ટ્રફ રેખા ઉત્તર ગુજરાતથી સૌરાષ્ટ્ર થઈને પશ્ચિમ-મધ્ય અરબી સમુદ્ર સુધી સમુદ્રની સપાટીથી 5.8 કિમીની ઊંચાઈ પર સક્રિય છે, જ્યારે ગુજરાત અને તેની આસપાસના વિસ્તારોમાં રહેલું સાયક્લોનિક સર્ક્યુલેશન હવે નબળું પડ્યું છે. આ સિસ્ટમોની અસર હેઠળ પ્રદેશમાં નીચલા સ્તરે દક્ષિણ-પશ્ચિમથી પશ્ચિમ દિશાના પવનો ફૂંકાઈ રહ્યા છે, જે આગામી દિવસોમાં વરસાદી માહોલ જાળવી રાખશે.

રાજ્યમાં આગામી 5 દિવસના વરસાદની વિગતવાર આગાહી જોઈએ તો, 22 અને 23 જૂન દરમિયાન ઉત્તર ગુજરાતના ખેડા, અમદાવાદ, આણંદ, પંચમહાલ, મહીસાગર અને દાહદ જિલ્લાના છૂટાછવાયા સ્થળોએ ગાજવીજ સાથે હળવોથી મધ્યમ વરસાદ પડવાની સંભાવના છે. જ્યારે દક્ષિણ ગુજરાતના તમામ જિલ્લાઓ જેવા કે વડોદરા, છોટાઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ તેમજ દમણ અને દાદરા નગર હવેલીમાં અને સૌરાષ્ટ્રના રાજકોટ, જૂનાગઢ, અમરેલી, ભાવનગર, ગીર સોમનાથ, બોટાદ અને દીવમાં પણ આ બે દિવસ દરમિયાન હળવા વરસાદી ઝાપટાં પડી શકે છે. આ સિવાયના ઉત્તર ગુજરાત, સૌરાષ્ટ્ર અને કચ્છના બાકીના જિલ્લાઓમાં હવામાન મુખ્યત્વે સૂકું રહેવાની શક્યતા છે.

બીજી તરફ, 24 જૂનથી લઈને 28 જૂન સુધીના સમયગાળા દરમિયાન વરસાદનું જોર અમુક વિસ્તારોમાં સીમિત થશે. આ દિવસોમાં ઉત્તર ગુજરાતના તમામ જિલ્લાઓમાં હવામાન સંપૂર્ણપણે સૂકું થઈ જશે. જો કે, દક્ષિણ ગુજરાતના દરિયાકાંઠાના અને દક્ષિણી વિસ્તારો જેવા કે સુરત, ડાંગ, તાપી, નવસારી, વલસાડ, દમણ, દાદરા નગર હવેલી તેમજ સૌરાષ્ટ્રના માત્ર અમરેલી, ભાવનગર, ગીર સોમનાથ અને દીવના છૂટાછવાયા વિસ્તારોમાં 28 જૂન સવાર સુધી હળવોથી મધ્યમ વરસાદ કે ગાજવીજ સાથે ઝાપટાં પડવાનું ચાલુ રહેશે.