નવી દિલ્હી: પાકિસ્તાન અધિકૃત કાશ્મીરમાં (PoK) સ્થિતિ સંપૂર્ણપણે બગડી ગઈ છે. છેલ્લા ત્રણ-ચાર દિવસથી ત્યાં ભીષણ હિંસા અને વિરોધ પ્રદર્શનો ચાલી રહ્યા છે, જેના કારણે પાકિસ્તાનની શાહબાઝ શરીફ સરકારની મુશ્કેલીઓ વધી ગઈ છે. તાજેતરની માહિતી મુજબ, PoKમાં સુરક્ષા દળોની અત્યાચારી કાર્યવાહીમાં અત્યાર સુધીમાં 50થી વધુ સામાન્ય નાગરિકોના મોત થયા છે, જ્યારે સેંકડો લોકો ગંભીર રીતે ઘાયલ છે. આ લોહીયાળ સંઘર્ષ વિરુદ્ધ હવે ખુદ પાકિસ્તાનની રાજધાની ઇસ્લામાબાદમાં પણ વિરોધ કરવા માટે લોકો રસ્તા પર ઉતરી આવ્યા છે.
JAACના સભ્ય કશ્મીરીએ એવો પણ દાવો કર્યો કે સેંકડો લોકો ઘાયલ થયા છે. તેમણે આને અત્યાચારી આતંકવાદ ગણાવ્યો. આ બધાની વચ્ચે પાકિસ્તાનની રાજધાની ઇસ્લામાબાદમાં 31 જુલાઈએ એક મોટું વિરોધ પ્રદર્શન થયું, જેમાં પૂર્વ સેનેટર મુશ્તાક ખાન સહિત અનેક પાકિસ્તાની અને કાશ્મીરી લોકો સામેલ થયા હતા.
ઇસ્લામાબાદમાં થયેલા વિરોધ પ્રદર્શનને લઈને ઉમર નઝીર કશ્મીરીએ આભાર વ્યક્ત કર્યો હતો. તેમણે જણાવ્યું કે તેઓ રાવલકોટના ડી-ચૌક પર પોતાના ધરણા સ્થળ પર હાજર છે અને આ ધરણા સતત ચાલુ છે. સાથે જ એવું પણ કહ્યું કે છેલ્લા ત્રણ-ચાર દિવસમાં મોટા પ્રમાણમાં લોકોના જીવ ગયા છે અને અનેક સાથીઓ ઘાયલ થયા છે. તેમનો આરોપ છે કે શાંતિપૂર્ણ રીતે પ્રદર્શન કરી રહેલા લોકો પર ગોળીબાર કરવામાં આવ્યો, જેના કારણે આટલા મોત થયા છે.
ઇસ્લામાબાદમાં થયેલા પ્રદર્શન વિશે શું કહ્યું?
તેમણે કહ્યું કે 31 જુલાઈએ સેનેટર મુશ્તાક સાહેબે ઇસ્લામાબાદના જી-10 મરકઝમાં એક મોટી રેલી કાઢી હતી. આ રેલીમાં મોટી સંખ્યામાં પાકિસ્તાની અને કાશ્મીરી લોકો સામેલ થયા હતા અને તેમણે પોતાની એકતા દર્શાવી હતી. ઉમર નઝીરે સેનેટર મુશ્તાક ખાન અને આ પ્રદર્શનનું આયોજન કરનાર તમામ લોકોનો આભાર માન્યો હતો.
ઉમર નઝીર કશ્મીરીએ પાકિસ્તાન અને કાશ્મીરના તે તમામ લોકોનો પણ આભાર વ્યક્ત કર્યો, જેમણે ઇસ્લામાબાદમાં એક થઈને આટલું મોટું પ્રદર્શન કર્યું. તેમણે કહ્યું કે આ એક ઐતિહાસિક પ્રદર્શન હતું. ઉમર નઝીરે આશા વ્યક્ત કરી છે કે આગળ પણ લોકો આ જ રીતે તેમની સાથે ઊભા રહેશે અને તેમનો અવાજ મજબૂતાઈથી ઉઠાવતા રહેશે.
