પુણેઃ એમપીએસસીના અધ્યક્ષ વિવેક ભીમનવારના રાજીનામાની માંગ સાથે પુણેમાં ચાલી રહેલું આંદોલન વધુ તીવ્ર બને તેવી શક્યતા છે, કારણ કે એનસીપી (એસપી)ના ધારાસભ્ય રોહિત પવારે મહારાષ્ટ્ર સરકારને આજે સાંજ સુધીમાં પોતાની સ્થિતિ સ્પષ્ટ કરવા કહ્યું છે.પરીક્ષાર્થીઓ છેલ્લા દસ દિવસથી પુણેના એસ. એમ. જોશી બ્રિજ પર વિરોધ પ્રદર્શન કરી રહ્યા છે. અન્ય માંગણીઓમાં મહારાષ્ટ્ર પબ્લિક સર્વિસ કમિશન (એમપીએસસી)માં સુધારાનો પણ સમાવેશ થાય છે. પવારે પત્રકારોને કહ્યું હતું કે, આગામી કાર્યવાહીની જાહેરાત રવિવારે સાંજે કરવામાં આવશે.
બે દિવસ પહેલા, પુણે પોલીસે આંદોલનના ૧૫ પ્રતિનિધિઓ સામે પરવાનગી વિના વિરોધ પ્રદર્શનનું આયોજન કરવા, ટ્રાફિકમાં અવરોધ ઊભો કરવા અને શહેરમાં પ્રતિબંધાત્મક આદેશોનું ઉલ્લંઘન કરવા બદલ કેસ નોંધ્યો હતો. આ ઉપરાંત, વિરોધ સ્થળ પર ડ્રોન ઉડાવવા બદલ પાંચ લોકો સામે પણ કેસ દાખલ કરવામાં આવ્યો હતો. કેસ નોંધાયા બાદ, પવારે વિશ્રામબાગ પોલીસ સ્ટેશનની મુલાકાત લીધી હતી અને માંગણી કરી હતી કે તેમની સામે પણ એફઆઈઆર નોંધવામાં આવે. તેમણે કહ્યું કે પોલીસે તેમને જણાવ્યું હતું કે તપાસ બાદ નિર્ણય લેવામાં આવશે.
આ મુદ્દાથી લગભગ ૨૫ લાખ વિદ્યાર્થીઓ પ્રત્યક્ષ કે પરોક્ષ રીતે પ્રભાવિત થયા હોવાનો દાવો કરતા, પવારે મુખ્ય પ્રધાન દેવેન્દ્ર ફડણવીસને કટાક્ષપૂર્ણ વિનંતી કરી કે તેઓ એમપીએસસી અધ્યક્ષ ભીમનવાર સાથેની મિત્રતા કરતાં પરીક્ષાર્થીઓની ચિંતાઓને પ્રાથમિકતા આપે. તેમણે કહ્યું કે, વિરોધ કરી રહેલા વિદ્યાર્થીઓના પ્રતિનિધિઓએ કમિશનમાં સુધારા કરવા માટેના પ્રસ્તાવિત મુસદ્દા રજૂ કર્યા છે અને વિદ્યાર્થીઓએ તે દસ્તાવેજને સમર્થન આપ્યું છે.
આંદોલનકારીઓમાંથી ઘણા ગરીબ પરિવારોના હોવાથી સરકાર તેમની અવગણના કરી રહી હોવાનો આરોપ પવારે લગાવ્યો હતો. ભાજપના નેતા ગોપીચંદ પડળકરની ટીકાનો જવાબ આપતા પવારે આરોપ લગાવ્યો કે આંદોલનમાં ભાગ લેનારા વિદ્યાર્થીઓને "શહેરી નક્સલી", "બૌદ્ધિક નક્સલી" અને વિરોધ પ્રદર્શન કરવા માટે પૈસા લેનારા કહેવામાં આવી રહ્યા છે. કમિશનની કામગીરીની વ્યાપક તપાસની માંગ કરતા પવારે કહ્યું કે તેના ચોકીદારથી લઈને અધ્યક્ષ સુધીના તમામની તપાસ થવી જોઈએ.
(પીટીઆઈ)
