(અમારા પ્રતિનિધિ તરફથી) 
મુંબઈ: મહારાષ્ટ્ર મહિલા આયોગના અધ્યક્ષ રૂપાલી ચાકણકરે તમામ જિલ્લા કલેક્ટરો અને વિભાગીય કમિશનરોને રાજ્યભરની સરકારી અને ખાનગી કચેરીઓમાં કાર્યસ્થળ પર જાતીય સતામણી સામે આંતરિક સમિતિઓનું ઓડિટ કરવાનો નિર્દેશ આપ્યો છે.

આ પગલાનો હેતુ કાર્યસ્થળ પર મહિલાઓના જાતીય સતામણી (નિવારણ, પ્રતિબંધ અને નિવારણ) અધિનિયમ, 2013 (પોશ એક્ટ)ના યોગ્ય અમલને સુનિશ્ર્ચિત કરવાનો છે, જે તમામ કચેરીઓમાં જાતીય સતામણીની ફરિયાદોને સંભાળવા માટે આંતરિક સમિતિ રાખવાનું ફરજિયાત બનાવે છે.

જિલ્લા સ્તરે, એક સત્તાવાર પ્રકાશનમાં જણાવાયું છે કે સ્થાનિક ફરિયાદ સમિતિ પણ હોવી જોઈએ.કમિશને જણાવ્યું હતું કે મુલાકાતો દરમિયાન અને મળેલી ફરિયાદોમાંથી ઘણી સમસ્યાઓ મળી આવી હતી.ઘણી કચેરીઓમાં આંતરિક સમિતિઓ હોતી નથી, કેટલીક પેનલો ફક્ત કાગળ પર જ અસ્તિત્વ ધરાવે છે, કાયદા વિશે ઓછી જાગૃતિ હોય છે, સભ્યોને તાલીમ આપવામાં આવતી નથી, વાર્ષિક અહેવાલો સબમિટ કરવામાં આવતા નથી અને જરૂરી ડિસ્પ્લે બોર્ડ ખૂટે છે, એવી નોંધ આમાં કરવામાં આવી હતી. 

અધિકારીઓને આંતરિક સમિતિઓ યોગ્ય રીતે રચાઈ રહી છે અને કાર્યરત છે કે નહીં તે તપાસવાનું કહેવામાં આવ્યું છે.કમિશને જણાવ્યું હતું કે, દરેક ઓફિસ માટે એક વિગતવાર ઓડિટ રિપોર્ટ તૈયાર કરવો આવશ્યક છે, જેમાં સમિતિના માળખા, પ્રાપ્ત અને પડતર ફરિયાદો, લેવામાં આવેલી કાર્યવાહી, જાગૃતિ પ્રવૃત્તિઓ, વાર્ષિક અહેવાલો અને ડિસ્પ્લે બોર્ડની વિગતોનો સમાવેશ થાય છે.

જો કોઈ ઓફિસે સમિતિની રચના કરી નથી અથવા અપૂર્ણ છે, તો અધિકારીઓએ ખાતરી કરવી જોઈએ કે તે તાત્કાલિક સ્થાપિત થાય. કાયદાનું પાલન ન કરનારાઓ સામે કાનૂની કાર્યવાહી કરી શકાય, એમ પણ તેમાં જણાવાયું છે.બધા વિભાગીય કમિશનરો અને જિલ્લા કલેક્ટરોને 30 દિવસની અંદર મહારાષ્ટ્ર રાજ્ય મહિલા આયોગને ઓડિટ રિપોર્ટ સબમિટ કરવા કહેવામાં આવ્યું છે.