મુંબઈ: મહારાષ્ટ્રના ઉદ્યોગ પ્રધાન ઉદય સામંતે સોમવારે જણાવ્યું હતું કે વિધાનભવનના કેટલાક કર્મચારીઓએ તેમના વિભાગના નકલી લેટરહેડ તૈયાર કર્યા હતા, જેમાં અધિકારીઓના નામ અને સ્કેન કરેલી સહીઓ હતી, જેથી 2,000 થી 2,500 રૂપિયામાં વેચાતા પાસ મેળવી શકાય.તેમણે વિધાન પરિષદને એવી માહિતી આપી હતી કે આ અધિકારીઓ મહારાષ્ટ્ર ઔદ્યોગિક વિકાસ નિગમ (એમઆઈડીસી)ના હતા.

‘50 અધિકારીઓના નામ અને તેમના હોદ્દા સાથે એક ડમી લેટરહેડ તૈયાર કરવામાં આવ્યો હતો અને વિધાનભવન કાર્યાલયમાંથી પાસ મેળવવા માટે સ્કેન કરેલા સહીઓનો ઉપયોગ કરવામાં આવ્યો હતો,’ એમ સામંતે જણાવ્યું હતું. મુખ્યમંત્રી કાર્યાલય (સીએમઓ)ને ફરિયાદ કરવામાં આવી હતી, જેમાં અધિકારીઓ પાસેથી ખુલાસો માગવામાં આવ્યો હતો.‘એવું જાણવા મળ્યું હતું કે રાજ્ય વિધાનસભાના કર્મચારીઓ ઘણા વિભાગોના ડમી લેટરહેડ તૈયાર કરે છે અને તેઓ પાસ તૈયાર કરવા માટે 2000-2500 રૂપિયા વસૂલ કરે છે. આ એક ગંભીર મુદ્દો છે,’ એમ પ્રધાને જણાવ્યું હતું. 

જ્યારે રાજ્ય વિધાનસભાના અધિકારીઓએ આ ડમી લેટરહેડ બનાવવામાં સામેલ લોકોને પૂછપરછ કરી, ત્યારે આ કર્મચારીઓએ એવો દાવો કર્યો હતો કે આ તેમની પહેલી અને છેલ્લી ભૂલ છે, એમ પણ સામંતે જણાવ્યું, જેમણે આ પત્ર વિધાનસભા પરિષદના અધ્યક્ષ રામ શિંદેને પણ રજૂ કર્યો હતો. ‘આવી વૃત્તિઓ સામે કડક કાર્યવાહી થવી જોઈએ અને રાજ્ય વિધાનસભાના કર્મચારીઓ આવું કરે છે તે ખોટું છે,’ એમ સામંતે કહ્યું હતું. 

‘અમને પણ આ વિશે ખબર પડી અને અમે તપાસ શરૂ કરી છે. તેમની સામે કડક કાર્યવાહી કરવામાં આવશે,’ એમ શિંદેએ ભારપૂર્વક જણાવ્યું હતું.