કચ્છઃ પશ્ચિમ એશિયા (મિડલ ઈસ્ટ) માં ચાલી રહેલા ભારે તણાવ અને સંકટ વચ્ચે ભારતની ઉર્જા સુરક્ષા (Energy Security) ને લઈને વધુ એક ખૂબ જ સારા અને રાહતના સમાચાર આવ્યા છે. માર્શલ આઇલેન્ડ્સનો ધ્વજ ધરાવતું એક વિશાળ એલપીજી (LPG) ટેન્કર 'Symi' આશરે 20,000 ટન લિક્વિફાઇડ પેટ્રોલિયમ ગેસ લઈને ગુજરાતના કચ્છમાં આવેલા કંડલા પોર્ટ પર સુરક્ષિત રીતે પહોંચી ગયું છે. હાલ પોર્ટ પર પાઇપલાઇન દ્વારા આ ગેસ ખાલી કરવાની કામગીરી ચાલી રહી છે.
'સ્ટ્રેટ ઓફ હોર્મુઝ' પાર કરીને ભારત પહોંચ્યું જહાજ
સૂત્રો દ્વારા મળતી જાણકારી પ્રમાણે આ વિશાળ એલપીજી ટેન્કર રવિવારે વહેલી સવારે કંડલા પોર્ટ પર આવી પહોંચ્યું હતું. પશ્ચિમ એશિયામાં ચાલી રહેલા સૈન્ય તણાવ વચ્ચે આ જહાજે 13 મે 2026 ના રોજ વિશ્વના સૌથી સંવેદનશીલ અને જોખમી દરિયાઈ માર્ગ ગણાતા 'સ્ટ્રેટ ઓફ હોર્મુઝ' (Strait of Hormuz) ને સફળતાપૂર્વક પાર કર્યો હતો. વૈશ્વિક કટોકટીના આ સમયમાં આટલા મોટા જહાજનું સુરક્ષિત ભારત પહોંચવું એ દેશની નૌકાદળ અને રાજદ્વારી વ્યૂહરચનાની મોટી સફળતા માનવામાં આવે છે.
#WATCH | Kachchh, Gujarat: The Marshall Islands-flagged tanker Symi carrying approx 20,000 tonnes of LPG arrives at the Kandla Port.
— ANI (@ANI) May 17, 2026
Symi crossed the Strait of Hormuz on May 13. pic.twitter.com/s6GboC1T4V
ઘરગથ્થુ ગેસના ભાવો સ્થિર રાખવામાં મોટી મદદ મળી શકે છે. હાલના વૈશ્વિક ઉર્જા સંકટના સમયમાં આ ટેન્કરનું ભારત આવવું સ્થાનિક બજાર માટે ખૂબ મહત્વનું સાબિત થશે. સૂત્રો દ્વારા મળતી જાણકારી મુજબ, આ જથ્થાથી સ્થાનિક બજારોમાં એલપીજી (રાંધણ ગેસ) ની કિંમતોને સ્થિર રાખવામાં મોટી મદદ મળશે. દેશમાં રાંધણ ગેસની ઉપલબ્ધતા અને સપ્લાય ચેઇનને આનાથી મોટું પીઠબળ મળશે, જેથી આગામી દિવસોમાં અછતની કોઈ શક્યતા રહેશે નહીં.
ભારતીય કૂટનીતિની મોટી જીત
ઉલ્લેખનીય છે કે, આ પહેલા પણ અહેવાલો આવ્યા હતા કે ભારતના 15 જેટલા વ્યાપારી જહાજોએ પશ્ચિમ એશિયાના યુદ્ધગ્રસ્ત માહોલ વચ્ચે પણ 'સ્ટ્રેટ ઓફ હોર્મુઝ' સુરક્ષિત રીતે પાર કર્યો હતો. આ ઘટના વૈશ્વિક સ્તરે ભારતની મજબૂત કૂટનીતિ, આંતરરાષ્ટ્રીય પ્રભાવ અને વધતી જતી વૈશ્વિક તાકાતનો પુરાવો સાબિત થયો છે.
