નવી દિલ્હીઃ અમેરિકાના રાષ્ટ્રપતિ ડોનાલ્ડ ટ્રમ્પ અને ઇટાલીના વડાપ્રધાન જ્યોર્જિયા મેલોનીના સંબંધો બગડ્યા છે. બન્ને સંબંધો બગડવાનું કારણ ટ્રમ્પનું એ નિવેદન છે, જેમાં તેમણે દાવો કર્યો હતો કે G-7માં મેલોની તેમની સાથે ફોટો પડાવવા માટે વિનંતીઓ કરી રહી હતી. જો કે મેલોનીએ પલટવાર કરતા કહ્યું કે હું અને ઇટાલી ક્યારેય કોઈની સામે કરગરતા નથી. વાત એટલી વધી ગઈ છે કે ઇટાલીના વિદેશ મંત્રી એન્ટોનિયો તાયાનીએ પોતાનો અમેરિકા પ્રવાસ રદ્દ કરી દીધો છે.

પરંતુ પરિસ્થિતિ હંમેશા આવી નહોતી. આ એ જ મેલોની છે, જેઓ 2025માં ટ્રમ્પના શપથ ગ્રહણ સમારોહમાં હાજર રહેનારા એકમાત્ર યુરોપિયન નેતા હતા. પરંતુ હવે નિષ્ણાતોનું માનવું છે કે દોઢ વર્ષ પછી મેલોનીના ટ્રમ્પ સાથેના સંબંધો ખરાબ રીતે બગડી ચૂક્યા છે. જોકે, ઈરાન વિરુદ્ધ અમેરિકા-ઈઝરાયેલ યુદ્ધની શરૂઆત સાથે જ બંને જમણેરી (દક્ષિણપંથી) નેતાઓ વચ્ચે તણાવ વધી ગયો હતો. આ યુદ્ધના કારણે યુરોપના અર્થતંત્રને પણ નુકસાન પહોંચ્યું અને ઇટાલીમાં યુદ્ધ-વિરોધી લાગણીઓ ફરીથી જોર પકડવા લાગી.

ફ્રાન્સમાં આ અઠવાડિયે યોજાયેલી G7 સમિટના વીડિયો પરથી એવું લાગતું હતું કે કદાચ બંનેએ પોતાના મતભેદો ઉકેલી લીધા છે. પરંતુ શુક્રવારે આ આશા ત્યારે તૂટી ગઈ, જ્યારે અમેરિકાના રાષ્ટ્રપતિએ ઇટાલીની એક ટીવી ચેનલને જણાવ્યું કે મેલોનીએ તેમની સાથે ફોટો પડાવવા માટે 'વિનંતી' કરી હતી.

મેલોનીએ આના પર વળતો પ્રહાર કરતા કહ્યું કે ટ્રમ્પે આ વાર્તા મનઘડંત રીતે ઉપજાવી કાઢી છે. તેમણે એવો પણ આરોપ લગાવ્યો કે ટ્રમ્પ જૂના મિત્રોની સરખામણીમાં પશ્ચિમી દેશોના દુશ્મનોને વધુ સન્માન આપે છે. તેમણે આકરા શબ્દોમાં કહ્યું કે , 'તેમણે એક વાત યાદ રાખવી જોઈએ - હું કે ઇટાલી ક્યારેય કોઈની સામે ભીખ નથી માંગતા.'

ટ્રમ્પ-મેલોનીની મિત્રતામાં ભંગાણ

સોશિયલ મીડિયા પર મેલોનીના કડક જવાબનું રાજકીય જગતના મોટાભાગના પક્ષોએ સ્વાગત કર્યું છે. તેઓએ ટ્રમ્પની ટિપ્પણીઓને ઇટાલીનું અપમાન ગણાવ્યું છે.

ઈરાન યુદ્ધે મુશ્કેલી સર્જી

ટ્રમ્પની 2024ની ચૂંટણી જીતથી મેલોની માટે એક એવા રાજકીય સહયોગી સાથે ખાસ સંબંધો બનાવવાનો રસ્તો ખુલતો દેખાઈ રહ્યો હતો, જેમની વિચારધારા તેમની સાથે મળતી આવતી હતી. આનાથી તેઓ અમેરિકા અને ઘણી હદ સુધી શંકા-કુશંકામાં રહેતા યુરોપ વચ્ચે એક સેતુ (પુલ) તરીકેનું કામ કરી શકતા હતા.

તો પછી વાત કેમ બગડી?

ઈરાનમાં ચાલી રહેલી લડાઈએ મેલોનીને મુશ્કેલ પરિસ્થિતિમાં મૂકી દીધા. એપ્રિલમાં સ્થિતિ ત્યારે વધુ બગડી ગઈ જ્યારે ટ્રમ્પે સંઘર્ષની ટીકા કરવા બદલ પોપ લીઓ પર આકરા પ્રહારો કર્યા. મેલોનીએ લીઓનો બચાવ કર્યો, ત્યાર બાદ ટ્રમ્પે તેમના પર 'હિંમતનો અભાવ' હોવાનો આરોપ લગાવ્યો.