નવી દિલ્હી: ગુપ્તચર એજન્સીઓએ ચેતવણી આપી છે કે પાકિસ્તાનની ગુપ્તચર એજન્સી ISIના ઈશારે ભારત વિરોધી તત્વો સ્વતંત્રતા દિવસની આસપાસ કોઈ ઘટનાને અંજામ આપી શકે છે.
ગુપ્તચર એજન્સીઓના સુત્રો પાસેથી પ્રાપ્ત માહિતી અનુસાર પાકિસ્તાન માત્ર સરહદી વિસ્તારોમાં જ મોટો હુમલો કરવાનો પ્રયાસ નથી કરી રહ્યું, પરંતુ દેશની અંદરના સ્થળોને પણ નિશાન બનાવી શકે છે. આ માહિતી વચ્ચે દેશની સુરક્ષા એજન્સીઓ હાઈ એલર્ટ પર છે.
ઈન્ટેલિજન્સ બ્યુરો (IB)ના એક અધિકારીએ જણાવ્યું કે ISIને લાગે છે કે દિલ્હી અને જમ્મુ-કાશ્મીરમાં સુરક્ષા એજન્સીઓનું ધ્યાન મુખ્યત્વે 15 ઓગસ્ટના સમારોહની આસપાસ રહેશે.
ISI આનો ફાયદો ઉઠાવવાનો પ્રયાસ કરી રહી છે અને સ્વતંત્રતા દિવસ પર કે તે પહેલાં કંઈક મોટું કરવાનો પ્રયાસ કરશે. તેમણે જણાવ્યું કે આ તત્વો પહેલાં જમ્મુ-કાશ્મીરમાં આતંકવાદીઓની ઘૂસણખોરી કરાવવાનો પ્રયાસ કરશે.
બાંગ્લાદેશ સરહદ મારફતે પણ આતંકવાદીઓને મોકલવાનો પ્રયાસ કરવામાં આવી શકે છે. આ ઉપરાંત, ISIનો હેતુ ટિયર-ટુ (Tier-2) શહેરોમાં પણ હુમલો કરવાનો છે, જ્યાં મેટ્રો અને અન્ય મોટા શહેરોની સરખામણીએ સુરક્ષા સામાન્ય રીતે ઓછી હોય છે.
અધિકારીએ જણાવ્યું કે સરહદ પારની વાતચીતથી સ્પષ્ટપણે ખબર પડે છે કે ISI દબાણમાં છે. ગુલામ જમ્મુ-કાશ્મીર (PoJK) અને બલૂચિસ્તાન જેવા વિસ્તારોમાં અશાંતિના કારણે પાકિસ્તાની સિસ્ટમ બેકફૂટ પર છે. તે ધ્યાન ભટકાવવાનો મોટો પ્રયાસ કરી રહ્યું છે અને સ્વતંત્રતા દિવસ પર ભારતમાં હુમલો કરવાથી તેનો આ હેતુ પૂરો થઈ જશે.
