અમદાવાદઃ રાજ્ય પર 3 વરસાદી સિસ્ટમ સક્રિય છે. જે પૈકી બે સાઇક્લોનિક સર્ક્યુલેશન અને એક વેસ્ટર્ન ડિસ્ટર્બન્સ છે. જેના કારણે રાજ્યમાં 5 જૂન સુધી વરસાદી માહોલ રહેશે. તેમજ 50 થી 60 કિમી પ્રતિ કલાકની ઝડપે પવન ફૂંકાશે.  અમદાવાદ, ગાંધીનગર સહિત સૌરાષ્ટ્ર-કચ્છમાં ઓરેન્જ એલર્ટ જાહેર કરામાં આવ્યું છે.

હવામાન વિભાગે 7 જૂન સુધી જાહેર કરેલા પૂર્વાનુમાન મુજબ, ઉત્તર ગુજરાતના બનાસકાંઠા, પાટણ, મહેસાણા, સાબરકાંઠામાં આજે અને આવતીકાલે છૂટાછવાયા સ્થળોએ તીવ્ર મેઘગર્જના સાથે હળવાથી મધ્યમ વરસાદની વધારે શક્યતા છે. આ દરમિયાન પવનની ગતિ 50-60 કિમી/કલાક રહેવાની સંભાવના છે. 4 જૂને છૂટાછવાયા સ્થળોએ મેઘગર્જના સાથે હળવાથી મધ્યમ વરસાદની વધારે શક્યતા છે તેમ જ પવનની ગતિ 40-50 કિમી/કલાક રહી શકે છે. 5 થી 8 જૂન  હવામાન સંપૂર્ણપણે સુકું રહેવાની વધારે શક્યતા છે.

મધ્ય ગુજરાતમાં ગાંધીનગર, અરવલ્લીમાં 2 અને 3 જૂનના રોજ છૂટાછવાયા સ્થળોએ મધ્યમ મેઘગર્જના સાથે હળવાથી મધ્યમ વરસાદની વધારે શક્યતા છે. તેમજ 50-60 કિમી/કલાકની ઝડપે પવન ફૂંકાઈ શકે છે. 4 જૂને વરસાદની તીવ્રતા ઘટશે અને પવનની ગતિ થોડી ઘટીને 40-50 કિમી/કલાક રહી શકે છે. 5 થી 8 જૂન સુધી હવામાન સુકું રહેશે.

અમદાવાદ, આણંદ, દાહોદમાં 2 જૂને છૂટાછવાયા સ્થળોએ તીવ્ર મેઘગર્જના અને 50-60 કિમી/કલાકની ઝડપે ફૂંકાતા પવન સાથે હળવાથી મધ્યમ વરસાદની વધારે શક્યતા છે. 3 અને 4 જૂનના રોજ વરસાદ પડી શકે છે, પરંતુ પવનની ગતિ ઘટીને 40-50 કિમી/કલાક થશે. 5 થી 8 જૂન હવામાન સુકું રહેવાની વધારે શક્યતા છે.

ખેડા, પંચમહાલ, મહીસાગર, વડોદરામાં 2થી 4 જૂન આ ત્રણેય દિવસો દરમિયાન છૂટાછવાયા સ્થળોએ મેઘગર્જના સાથે હળવાથી મધ્યમ વરસાદની વધારે શક્યતા છે. પવનની ગતિ 40-50 કિમી/કલાક રહેશે. 5થી 8 જૂન સુધી હવામાન સુકું રહેશે.

દક્ષિણ ગુજરાતના છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ, દાદરા અને નગર હવેલીમાં આજથી 4 જૂન સતત ત્રણ દિવસ સુધી છૂટાછવાયા સ્થળોએ મધ્યમ મેઘગર્જના અને 40-50 કિમી/કલાકની ઝડપે ફૂંકાતા પવન સાથે હળવાથી મધ્યમ વરસાદની વધારે શક્યતા છે. 5 અને 6 જૂને વરસાદની તીવ્રતા ઘટશે પરંતુ છૂટાછવાયા સ્થળોએ ગાજવીજ સાથે હળવાથી મધ્યમ વરસાદ પડવાની શક્યતા છે. 7 અને 8 જૂને હવામાન સુકું રહેવાની વધારે શક્યતા છે.

સૌરાષ્ટ્રના સુરેન્દ્રનગર, રાજકોટ, ભાવનગર, મોરબી, બોટાદમાં છૂટાછવાયા સ્થળોએ મધ્યમ મેઘગર્જના અને 50-60 કિમી/કલાકના તીવ્ર પવન સાથે હળવાથી મધ્યમ વરસાદની વધારે શક્યતા છે. 3 અને 4 જૂને પવનની ગતિ ઘટીને 40-50 કિમી/કલાક થશે અને હળવોથી મધ્યમ વરસાદ ચાલુ રહેશે. પાંચથી 8 જૂન હવામાન સુકું થઈ જશે.

અમરેલીમાં 2 જૂને  50-60 કિમી/કલાકની ઝડપે પવન અને મેઘગર્જના સાથે હળવોથી મધ્યમ વરસાદ પડી શકે છે. 3 અને 4 જૂનના રોજ  40-50 કિમી/કલાકની ઝડપે પવન સાથે વરસાદની વધારે શક્યતા છે. 5 અને 6 જૂનના રોજ પવન શાંત થશે પરંતુ ગાજવીજ સાથે હળવો વરસાદ ચાલુ રહી શકે છે. 7 અને 8 જૂનના રોજ હવામાન સુકું રહેશે.

Gujarat Weather Forecast | Gujarat Rain Update હવામાન વિભાગની નવી આગાહી મુજબ આજે ગુજરાતના મોટાભાગના જિલ્લાઓમાં મેઘરાજા ધમાકેદાર બેટિંગ કરી શકે છે. દ્વારકા, જામનગર અને પોરબંદર સિવાયના વિસ્તારોમાં ભારે પવન સાથે વરસાદની સંભાવના છે. જાણો તમારા વિસ્તારમાં હવામાન કેવું રહેશે અને તંત્ર… pic.twitter.com/g56yulHrjz

— Mumbai Samachar Official (@Samachar_Mumbai) June 2, 2026

જામનગર, કચ્છમાં 2 જૂને છૂટાછવાયા સ્થળોએ 40-50 કિમી/કલાક ની ઝડપે પવન અને મેઘગર્જના સાથે હળવોથી મધ્યમ વરસાદ પડી શકે છે. ૩ જૂને જામનગરમાં વરસાદ ચાલુ રહેશે, જ્યારે કચ્છમાં હવામાન સુકું રહેશે. 4 થી 8 જૂન બંને જિલ્લાઓમાં હવામાન સુકું રહેવાની વધારે શક્યતા છે. 

પોરબંદર, જૂનાગઢ, દેવભૂમિ દ્વારકા, ગિર સોમનાથ, દીવમાં 2 અને 3 જૂને દરિયાકાંઠાના વિસ્તારોમાં છૂટાછવાયા સ્થળોએ 40-50 કિમી/કલાકની ઝડપે પવન ફૂંકાવા સાથે હળવોથી મધ્યમ વરસાદ પડશે. 4 જૂને જૂનાગઢ અને ગિર સોમનાથમાં પણ વરસાદી માહોલ રહેશે, જ્યારે પોરબંદર, દ્વારકા અને દીવમાં હવામાન સુકું રહેવાની શક્યતા છે. ૫ થી ૮ જૂન: સમગ્ર વિસ્તારમાં હવામાન સુકું રહેવાની વધારે શક્યતા છે.
 
હવામાન વિભાગે  4 જૂન સુધી રાજ્યના મોટા ભાગના વિસ્તારોમાં વરસાદની સાથે 40 થી 60 કિમી/કલાકની ઝડપે ભારે પવન ફૂંકાવવાની શક્યતા હોવાથી નાગરિકોને સાવચેત રહેવા વિનંતી કરી છે. 5 જૂન પછી દક્ષિણ ગુજરાત સિવાય મોટાભાગના જિલ્લાઓમાં  પ્રી મોન્સૂન એક્ટિવિટી શાંત થતાં હવામાન સુકું રહેશે.