(અમારા પ્રતિનિધિ તરફથી)
મુંબઈ: ગુજરાતથી મુંબઈ જતી લાંબા અંતરની મેલ-એક્સપ્રેસ ટ્રેનો મારફતે ગુટખાની હેરાફેરીમાં કથિત રીતે મદદ કરવાના આરોપસર બે સરકારી રેલવે પોલીસ (જીઆરપી) કોન્સ્ટેબલોને સસ્પેન્ડ કરવામાં આવ્યા છે. રેલવે પોલીસ કમિશનર રાકેશ કલાસાગરે બંને કર્મચારીઓના સસ્પેન્શનના આદેશ જારી કર્યા છે. સસ્પેન્ડ કરાયેલા કર્મચારીઓમાં બોરીવલી જીઆરપીના અનિલ ગુજર અને વસઈ જીઆરપીના તુષાર ઠાકુરનો સમાવેશ થાય છે.
આ મામલો એક નાગરિકની ફરિયાદ બાદ સામે આવ્યો હતો. ફરિયાદમાં આરોપ મૂકવામાં આવ્યો હતો કે બંને કોન્સ્ટેબલો કથિત રીતે ગુટખાના સપ્લાયરોના સંપર્કમાં હતા અને ગુજરાતથી મુંબઈ સુધી ગુટખાનો જથ્થો ટ્રેન મારફતે પહોંચાડવામાં મદદ કરતા હતા. ફરિયાદ બાદ આ મામલે વિભાગીય તપાસ હાથ ધરવામાં આવી હતી અને તપાસના આધારે બંને સામે સસ્પેન્શનની કાર્યવાહી કરવામાં આવી છે.
સૂત્રોના જણાવ્યા મુજબ, ગુટખાનો જથ્થો કથિત રીતે ટ્રેનના એસી કોચમાં છુપાવીને લઈ જવામાં આવતો હતો. કાળા રંગની બેગમાં ભરેલો જથ્થો સ્ટોરેજ કમ્પાર્ટમેન્ટ તેમજ બેડરોલ રાખવાના વિસ્તારોમાં સંતાડવામાં આવતો હોવાનો દાવો કરાયો છે. આ સમગ્ર વ્યવસ્થામાં કેટલાક સ્ટોરેજ કોન્ટ્રાક્ટરોની ભૂમિકા હોવાની પણ તપાસ કરવામાં આવી રહી છે.
આ ઉપરાંત, ગુટખાના સપ્લાયરો કથિત રીતે સ્ટોરેજ કોન્ટ્રાક્ટરોને નાણાં ચૂકવતા હોવાના આક્ષેપો છે. જથ્થાની હેરાફેરીને સરળ બનાવવા માટે રેલવે પ્રોટેક્શન ફોર્સ (આરપીએફ) સહિતના કેટલાક અન્ય કર્મચારીઓને પણ કથિત રીતે નાણાં આપવામાં આવતા હોવાના દાવાની તપાસ ચાલી રહી છે.
મળતી માહિતી મુજબ, ગુટખાના કન્સાઇનમેન્ટને કથિત રીતે વસઈ અથવા બોરીવલી વિસ્તારમાં લાવવામાં આવતાં હતાં અને ત્યારબાદ ટેક્સી મારફતે ટ્રેન સુધી પહોંચાડવામાં આવતાં હતાં.
આ હેરાફેરી માટે સૂર્યનગરી એક્સપ્રેસ, ગોલ્ડન ટેમ્પલ મેલ, ગરીબ રથ એક્સપ્રેસ, અવધ એક્સપ્રેસ, ભાવનગર એક્સપ્રેસ અને હરિદ્વાર એક્સપ્રેસ જેવી લાંબા અંતરની ટ્રેનોનો ઉપયોગ કરવામાં આવતો હોવાના આક્ષેપો છે. આમાંથી કેટલીક ટ્રેનો બાંદ્રા ટર્મિનસ સુધી પહોંચે છે.
એક નાગરિકની ફરિયાદ બાદ શરૂ થયેલી વિભાગીય તપાસમાં સામે આવેલા આક્ષેપોને ગંભીરતાથી લઈ રેલવે પોલીસ કમિશનર રાકેશ કલાસાગરે અનિલ ગુજર અને તુષાર ઠાકુરને સસ્પેન્ડ કર્યા છે. હવે તપાસ એ દિશામાં પણ આગળ વધી રહી છે કે ગુટખાની હેરાફેરીમાં અન્ય કોઈ પોલીસ અથવા રેલવે કર્મચારીની સંડોવણી હતી કે નહીં. તપાસ પૂર્ણ થયા બાદ સમગ્ર મામલે વધુ વિગતો સામે આવવાની શક્યતા છે.
