(અમારા પ્રતિનિધિ તરફથી)

અમદાવાદઃ ગાંધીનગરના ગિફ્ટ સિટી ક્લબ ખાતે ઇન્ટરનેશનલ ફાઇનાન્શિયલ સર્વિસીસ સેન્ટર્સ ઓથોરિટી અને મિનિસ્ટ્રી ઓફ પોર્ટ્સ, શિપિંગ એન્ડ વોટરવેઝના સંયુક્ત ઉપક્રમે 'ઇન્ડિયા શિપ લીઝિંગ એન્ડ ફાઇનાન્શિયલ સમિટ'નું આયોજન કરવામાં આવ્યું હતું. આ કાર્યક્રમમાં કેન્દ્રીય પ્રધાન સર્વાનંદ સોનોવાલે મુખ્ય અતિથિ તરીકે હાજરી આપી હતી. આ પ્રસંગે તેમણે એમઓપીએસડબલ્યુ ના નેજા હેઠળ ગુજરાતની ગણપત યુનિવર્સિટી ખાતે યોજાનારી 'રાષ્ટ્રીય દરિયાઈ રમતો 2027' ના બ્રોશરનું પણ અનાવરણ કર્યું હતું.

'ઇન્ડિયા શિપ લીઝિંગ એન્ડ ફાઇનાન્શિયલ સમિટ'નું આયોજન

ગિફ્ટ સિટી અને મેરીટાઇમ ઇકોસિસ્ટમની વાત કરવામાં આવે તો, આ દરમિયાન સોનોવાલે ભારતની સમુદ્રી વિરાસતનો ઉલ્લેખ કર્યો અને તેને સિંધુ ખીણની સંસ્કૃતિ તથા ગુજરાતના પ્રાચીન બંદર લોથલ સાથે સાંકળી હતી. વધુમાં સોનોવાલે કહ્યું કે, ‘આ સભા ભારતને અને ખાસ કરીને ગિફ્ટ સિટીને એક વ્યાપક સમુદ્રી મૂલ્ય શૃંખલા ઇકોસિસ્ટમ (જેમાં જહાજનું લીઝિંગ, માલિકી, ધિરાણ, વીમો, બ્રોકરેજ અને અન્ય આનુષંગિક સેવાઓનો સમાવેશ થાય છે) માટે વૈશ્વિક સમુદ્રી કેન્દ્ર તરીકે સ્થાપિત કરવાની આપણી સામૂહિક યાત્રામાં એક મહત્વપૂર્ણ સીમાચિહ્નરૂપ છે’

આ સમિટમાં નીતિ નિર્માતાઓ, જહાજ માલિકો, ભાડે આપનારાઓ, ચાર્ટરર્સ, ફાઇનાન્સર્સ અને દરિયાઈ હિસ્સેદારોને એક વ્યાપક જહાજ માલિકી, ભાડાપટ્ટા અને ધિરાણ ઇકોસિસ્ટમ બનાવવાના ભારતના પ્રયાસ પર ચર્ચા કરવા માટે એકસાથે લાવવામાં આવ્યા હતા, જેમાં ગિફ્ટ સિટી આ મહત્વાકાંક્ષાને સક્ષમ બનાવતું પ્લેટફોર્મ તરીકે સ્થાન ધરાવે છે. આ ક્ષેત્રમાં હાલ 38 શિપ લેસર્સ નોંધાયેલા છે, જેઓ સામૂહિક રીતે 2.99 મિલિયન ડીડબલ્યુટીથી વધુ ક્ષમતા ધરાવતા 43 જહાજો લીઝ પર ચલાવી રહ્યા છે. આમાંથી 24 જહાજો ભારતીય ધ્વજ ધરાવે છે, તેવું પ્રધાન સોનોવાલે જણાવ્યું હતું. 

મોદી સરકારની નાણાકીય પ્રતિબદ્ધતાઓનો પણ ઉલ્લેખ કર્યો

કેન્દ્રીય પ્રધાને આ ક્ષેત્ર માટે મોદી સરકારની નાણાકીય પ્રતિબદ્ધતાઓનો પણ ઉલ્લેખ કર્યો હતો. જેમાં રૂપિયા 25,000 કરોડનો 'મેરીટાઇમ ડેવલપમેન્ટ ફંડ' અને રૂપિયા 24,736 કરોડની સુધારેલી ફાળવણી સાથે 2036 સુધી લંબાવવામાં આવેલી 'શિપબિલ્ડિંગ ફાઇનાન્શિયલ આસિસ્ટન્સ સ્કીમ' 2.0નો સમાવેશ થાય છે. આ બંનેનો ઉદ્દેશ્ય ભારતીય શિપયાર્ડ્સ અને જહાજની માલિકીને મજબૂત બનાવવાનો છે. આ સાથે 'મેરીટાઇમ ઇન્ડિયા વિઝન 2030' અને 'મેરીટાઇમ અમૃત કાલ વિઝન 2047'નો ઉલ્લેખ કરતા તેને ભારતનો જહાજોનો કાફલો વિસ્તારવા, બંદરોની ક્ષમતા અને દરિયાકાંઠાના જહાજ-પરિવહનને વેગ આપવા તેમજ ભારતને વિશ્વના ટોચના પાંચ જહાજ નિર્માણ કરતા દેશોમાં સ્થાન અપાવવા માટેના રોડમેપ ગણાવ્યો હતો.