નવી દિલ્હી: દિલ્હીના યુવાઓને ભવિષ્ય માટે સજ્જ કરવાના ઉદ્દેશ સાથે આજે દિલ્હીની સ્કૂલોમાં મહત્ત્વકાંક્ષી ‘AI ગ્રાઇન્ડ ઇનિશિયેટિવ’નો શુભારંભ કરવામાં આવ્યો છે. આ પહેલ હેઠળ, દિલ્હી સરકાર દ્વારા દેશનું પ્રથમ સિટી-સેન્ટ્રિક AI એન્જિન– 'Delhi AI Grind' શરૂ કરવામાં આવ્યું છે, જેનો હેતુ યુવાનોને શહેરની વાસ્તવિક સમસ્યાઓ માટે AI-આધારિત ઉકેલો વિકસાવવા માટે સક્ષમ બનાવવાનો છે. સરકારના આ વિઝનથી પ્રેરિત, હવે ક્લાસરૂમ્સ ઇનોવેશન લેબોરેટરીઝમાં પરિવર્તિત થશે, જ્યાં વિદ્યાર્થીઓ માત્ર શીખશે નહીં પણ ‘ચેન્જમેકર’ પણ બનશે, જેથી દિલ્હી જ્ઞાન અને AI ઇનોવેશનની રાજધાની તરીકે ઉભરી શકે.
આ પહેલના ઉદ્ઘાટન સમારોહનું આયોજન દિલ્હીના મુખ્ય પ્રધાન રેખા ગુપ્તાની ઉપસ્થિતિમાં સેન્ટ્રલ પાર્કમાં કરવામાં આવ્યું હતું, જેમાં ગ્રુપ કેપ્ટન શુભાંશુ શુક્લા ઉપસ્થિત રહ્યા હતા. આંતરરાષ્ટ્રીય અવકાશ સ્ટેશન (ISS) સુધી પહોંચનારા પ્રથમ ભારતીય તરીકે, શુભાંશુ શુક્લા યુવાનો માટે એક પ્રેરણાદાયી રોલ મોડેલ બની રહ્યા છે. આ પ્રસંગે કેબિનેટ પ્રધાન આશીષ સૂદ પણ ઉપસ્થિત રહ્યા હતા. કાર્યક્રમ દરમિયાન CM રેખા ગુપ્તાએ જણાવ્યું હતું કે વડાપ્રધાન નરેન્દ્ર મોદીના નેતૃત્વમાં આજે ભારત AI, ટેકનોલોજી અને ઇનોવેશનના ક્ષેત્રમાં વૈશ્વિક સ્તરે નવી ઓળખ બનાવી રહ્યું છે. આ ટેક્નોલોજી હવે સામાન્ય નાગરિકની પહોંચમાં છે અને યુવાનો માટે અનંત તકોના દરવાજા ખોલી રહી છે.
'AI ગ્રાઇન્ડ ઇનિશિયેટિવ'ના લોન્ચિંગ સાથે, દિલ્હી સરકારે તમામ યુવાનોને આહ્વાન કર્યું છે કે તેઓ નિર્ભય બનીને વિચારે, સતત પ્રયોગો કરે, ભૂલોમાંથી શીખે અને નવા ઉકેલો તૈયાર કરે. યુવાનોની કલ્પના જ દિલ્હીનું આવતીકાલ ઘડશે. આ પ્રોગ્રામ દ્વારા વિદ્યાર્થીઓમાં રચનાત્મક વિચારસરણી અને સમસ્યાનું નિરાકરણ કરવાની ક્ષમતાને પ્રોત્સાહન આપીને, દિલ્હીના યુવાઓને આર્ટિફિશિયલ ઇન્ટેલિજન્સના આ યુગમાં દેશ અને દુનિયાનું નેતૃત્વ કરવા માટે તૈયાર કરવામાં આવશે.
દિલ્હી AI ગ્રાઇન્ડ 'ભારતનું પ્રથમ સિટી સેન્ટ્રિક AI ઇનોવેશન એન્જિન' ખાતે સંબોધન કરતાં, ભારતીય અવકાશયાત્રી અને IAF ગ્રુપ કેપ્ટન શુભાંશુ શુક્લાએ જણાવ્યું હતું કે, "આર્ટિફિશિયલ ઇન્ટેલિજન્સ દરેક પાસામાં અંકિત છે. તે વસ્તુઓને પૂર્ણ કરવા માટેનું એક સાધન છે અને તેનો વ્યાપકપણે ઉપયોગ થઈ રહ્યો છે... આ એવા ક્ષેત્રો છે જેના પર આપણે ધ્યાન કેન્દ્રિત કરવાની જરૂર છે, અને તે આપણને વિકસિત ભારત 2047 ના આપણા સ્વપ્ન સુધી લઈ જશે... જો આપણી યુવા પેઢી આ સ્વપ્નને પૂર્ણ કરવાની જવાબદારી લેશે, તો આપણે તેને 2047 પહેલા જ હાંસલ કરી લઈશું."
