નવી દિલ્હી: દિલ્હી હાઇકોર્ટે સામાજિક કાર્યકર્તા સોનમ વાંગચૂકને જંતર મંતર પરથી હટાવવા અને સંસદ માર્ચ દરમિયાન પોલીસ કાર્યવાહી અંગેની બે જાહેર હિતની અરજીની સુનાવણી કરી હતી. આ દરમિયાન કોર્ટે પોલીસને નોટિસ ફટકારીને ચાર અઠવાડિયામાં જવાબ માંગ્યો છે.તેમજ કાર્યવાહી દરમિયાનના બોડી કેમેરા અને સીસીટીવી ફૂટેજ સાચવવા નિર્દેશ આપ્યો છે.
આ અરજીની સુનાવણી દરમિયાન અરજદારો વતી વરિષ્ઠ વકીલ એન. હરિહરને કોર્ટને માહિતી આપી હતી કે વિરોધ શાંતિપૂર્ણ રીતે ચાલી રહ્યો હતો જ્યારે કોઈ પણ પૂર્વ ચેતવણી વિના લાઠીચાર્જ કરવામાં આવ્યો હતો. તેમણે દલીલ કરી હતી કે બંધારણની કલમ 14 હેઠળ રાજ્યની મનમાનીના માપદંડ સામે કાર્યવાહીની તપાસ થવી જોઈએ.
હિલા વિદ્યાર્થીઓ સાથે છેડતીની ઘટનાઓ બની
તેમણે આરોપ લગાવ્યો હતો કે વિરોધ દરમિયાન મહિલા વિદ્યાર્થીઓ સાથે છેડતીની ઘટનાઓ બની હતી અને સંબંધિત અધિકારીઓ સામે કાર્યવાહી કરવાની માંગ કરી હતી.
20 દિવસથી જંતર-મંતર પર શાંતિપૂર્ણ પ્રદર્શન
અરજદારોનું પ્રતિનિધિત્વ કરતા અન્ય વકીલ વિકાસ સિંહે કોર્ટને જણાવ્યું હતું કે વિરોધ કરનારાઓ લગભગ 20 દિવસથી જંતર-મંતર પર શાંતિપૂર્ણ રીતે છે. તેમણે નોંધ્યું હતું કે સોનમ વાંગચુકે 20 જુલાઈ માટે 'સંસદ માર્ચ'ની જાહેરાત કરી હતી, અને તે સમય સુધી કોઈપણ પ્રકારની હિંસાના કોઈ અહેવાલ નથી.
તેમણે જણાવ્યું હતું કે વિવિધ રાજ્યોના વિદ્યાર્થીઓ, ડોકટરો, પેરામેડિકલ સ્ટાફ અને સામાન્ય નાગરિકો વિરોધ સ્થળ પર હાજર હતા. તેમણે દાવો કર્યો હતો કે વિરોધ કરનારાઓએ હિંસામાં ભાગ લીધો હતો તે સાબિત કરવા માટે અત્યાર સુધી કોઈ પુરાવા બહાર આવ્યા નથી.
પોલીસ વિરુદ્ધ એફઆઈઆર નોંધવાની માંગ
એડવોકેટ એન. હરિહરને કોર્ટને વિનંતી કરી કે ઓળખી શકાય તેવા પોલીસ કર્મચારીઓ સામે એફઆઈઆર નોંધવાનો નિર્દેશ આપવામાં આવે. તેમણે આરોપ લગાવ્યો કે વિરોધ દરમિયાન ઉપયોગમાં લેવાયેલા લાઠીઓ ખીલાથી જડેલી હતી. જેના કારણે ઘણા વિદ્યાર્થીઓને ગંભીર ઇજાઓ થઈ હતી.
DCPએ મહિલા પ્રોટેસ્ટરને લાફો માર્યો? સોશિયલ મીડિયા પર વીડિયો વાયરલ! Sandeep Lamba Viral Video
— Mumbai Samachar Official (@Samachar_Mumbai) July 22, 2026
દિલ્હીમાં CJPના પ્રદર્શન દરમિયાન ઉત્તર-પૂર્વ દિલ્હીના એડિશનલ DCP સંદીપ લાંબાનો એક મહિલા દેખાવકાર સાથેનો વીડિયો સોશિયલ મીડિયા પર વાયરલ થઈ રહ્યો છે. વીડિયોમાં DCP મહિલા પર હાથ ઉપાડતા… pic.twitter.com/rIX1T14XRJ
આ ઘટનામાં 90 થી વધુ વિદ્યાર્થીઓ ઘાયલ થયા
તેમણે કોર્ટને વિનંતી કરી કે સમગ્ર ઘટનાની સ્વતંત્ર તપાસનો આદેશ આપવામાં આવે અને ટીયર ગેસ અને અન્ય સામગ્રીના ઉપયોગ સંબંધિત રેકોર્ડની જાળવણી તેમજ CCTV ફૂટેજ અને અન્ય વિડિયો પુરાવાઓની સુરક્ષાનો નિર્દેશ આપવામાં આવે. અરજદારોના મતે આ ઘટનામાં 90 થી વધુ વિદ્યાર્થીઓ ઘાયલ થયા હતા અને ઘાયલોની સંખ્યા સતત વધી રહી છે.
