નવી દિલ્હીઃ તેલ કંપનીઓએ 19 કિલોગ્રામવાળા કોમર્શિયલ LPG સિલિન્ડરના ભાવમાં મોટો વધારો કર્યો છે. નવા ભાવો મુજબ, દિલ્હીમાં કોમર્શિયલ સિલિન્ડર 42 રૂપિયા મોંઘો થઈને હવે 3,113.50 રૂપિયાનો થઈ ગયો છે. જ્યારે કોલકાતામાં તેની કિંમત 53.50 રૂપિયા વધીને 3255.50 રૂપિયા પર પહોંચી ગઈ છે. આ ફેરફાર 1 જૂનથી લાગુ થઇ ગયો છે, જેના કારણે હોટલ, રેસ્ટોરન્ટ, ઢાબા અને અન્ય વ્યાપારી ગ્રાહકો પર આર્થિક બોજ વધી શકે છે. જો કે, ઘરવપરાશના સિલિન્ડરની કિંમતોમાં કોઈ ફેરફાર કરવામાં આવ્યો નથી.

કોમર્શિયલ વપરાશવાળા 19 કિલોગ્રામના ગેસ સિલિન્ડરના ભાવમાં અલગ-અલગ મહાનગરોમાં જુદો-જુદો વધારો કરવામાં આવ્યો છે. દિલ્હીમાં જ્યાં પ્રતિ સિલિન્ડર 42 રૂપિયા વધુ ચૂકવવા પડશે, ત્યાં કોલકાતાના વેપારીઓ પર 53.50 રૂપિયાનો વધુ આર્થિક બોજ પડશે, જેના કારણે બંને શહેરોમાં કોમર્શિયલ LPGના ભાવ રેકોર્ડ સ્તરે પહોંચી ગયા છે. કોમર્શિયલ સિલિન્ડરના ભાવમાં આ વધારો એવા સમયે થયો છે, જ્યારે વેપાર-ધંધા પહેલાથી જ ઇંધણ અને ટ્રાન્સપોર્ટેશનના વધતા ખર્ચનો સામનો કરી રહ્યા છે.

આ ઉપરાંત, ઓઇલ માર્કેટિંગ કંપનીઓએ નાના વેપારીઓ અને સામાન્ય નાગરિકો દ્વારા વપરાતા 5 કિલોગ્રામના એફટીએલ (FTL) સિલિન્ડરની કિંમતમાં પણ 11 રૂપિયાનો વધારો કર્યો છે, આ વધારા પછી દિલ્હીમાં આ 5 કિગ્રાનો સિલિન્ડર હવે 821.50 રૂપિયાના નવા ભાવે મળશે. રાહતની એકમાત્ર વાત એ છે કે ઘરોમાં વપરાતા 14.2 કિલોગ્રામના ઘરવપરાશના ગેસ સિલિન્ડરની કિંમતોમાં આ વખતે કોઈ ફેરફાર કરવામાં આવ્યો નથી.

જાન્યુઆરીથી સતત વધી રહ્યા છે ભાવ

તમને જણાવી દઈએ કે વર્ષ 2026ની શરૂઆતથી જ કોમર્શિયલ સિલિન્ડરના ભાવમાં સતત વધારો થઈ રહ્યો છે. દિલ્હીમાં જાન્યુઆરી મહિનામાં 19 કિલોના વ્યાપારી સિલિન્ડરની કિંમત 1,691.50 રૂપિયા હતી. ત્યારબાદ ફેબ્રુઆરીમાં 49 રૂપિયા, માર્ચમાં 115 રૂપિયા, એપ્રિલમાં 195.50 રૂપિયા અને મે મહિનામાં પ્રતિ સિલિન્ડરના ભાવમાં ચોંકાવનારો 993 રૂપિયાનો વધારો કરવામાં આવ્યો હતો. છેલ્લા છ મહિનામાં વારંવાર થયેલા ભાવવધારા પછી, હવે દિલ્હીમાં કોમર્શિયલ સિલિન્ડરની કિંમત 3,113.50 રૂપિયા થઈ ગઈ છે.