જયપુરઃ ^{રાજસ્થાનમાં યોજાયેલી કોર્પોરેશનની ચૂંટણી પરિણામો જાહેર થઈ રહ્યા છે. રાજસ્થાનના પૂર્વ મુખ્ય પ્રધાન વસુંધરા રાજેના ગઢ ગણાતા ઝાલાવાડમાં ભાજપને ભૂંડી હારનો સામનો કરવો પડ્યો છે. ઝાલાવાડ નગર પરિષદની ચૂંટણીના જાહેર થયેલા પરિણામોમાં કૉંગ્રેસે 45માંથી 29 વોર્ડમાં શાનદાર જીત મેળવીને સ્પષ્ટ બહુમત હાંસ કરી છે.}

ઝાલાવાડ જિલ્લાની કુલ 8 કોર્પોરેશનમાંથી 4માં કૉંગ્રેસે પૂર્ણ બહુમત હાંસલ કરી છે. આ રીતે ઝાલાવાડ નગર પરિષદમાં ભાજપનો સૂપડાં સાફ થઈ ગયા છે અને કૉંગ્રેસે ઘણા લાંબા સમય બાદ જીતનો સ્વાદ ચાખ્યો છે. કૉંગ્રેસ ઝાલાવાડ નગર પરિષદ ઉપરાંત ભવાની મંડી, ખાનપુર અને ડગમાં પણ બહુમત હાંસલ કરી છે. જ્યારે ભાજપ ઝાલરાપાટન, અકલેરા અને મનોહરથાના કોર્પોરેશનમાં જ જીત મેળવી શકી છે. ઝાલાવાડ જિલ્લાની પિડાવા નગરપાલિકામાં કોઈને પણ સ્પષ્ટ જનાદેશ મળ્યો નથી, પરંતુ આમ આદમી પાર્ટી કિંગમેકરની ભૂમિકામાં આવી ગઈ છે.

ઝાલાવાડ નગર પરિષદ પર કૉંગ્રેસનો કબજો

ઝાલાવાડ નગર પરિષદના 45 વોર્ડ માટે જાહેર થયેલા પરિણામોમાં કૉંગ્રેસે શાનદાર પ્રદર્શન કરીને એકતરફી જીત નોંધાવી છે. કૉંગ્રેસનું બોર્ડ બનવું નક્કી છે. ઝાલાવાડ નગર પરિષદની ચૂંટણીમાં કૉંગ્રેસે 29 વોર્ડ પર કબજો કર્યો છે, જ્યારે  ભાજપ માત્ર 13 વોર્ડમાં જ ચૂંટણી જીતી શકી છે અને અપક્ષ ઉમેદવારોએ બે બેઠકો જીતી છે, જ્યારે એક બેઠક આમ આદમી પાર્ટીએ જીતી છે.

ઝાલાવાડ નગર પરિષદ પર પહેલાં ભાજપનું શાસન હતું, પરંતુ કૉંગ્રેસે તેને ઉથલાવી દીધું છે. ઝાલાવાડ નગર પરિષદની જીતથી કૉંગ્રેસ ઘણી ઉત્સાહિત છે અને તે તેને પોતાની મોટી જીત ગણાવી રહી છે.

કૉંગ્રેસના નગર પરિષદ પ્રમુખ અને ઉપપ્રમુખ બનવાનું નક્કી થઈ ગયું છે. ભાજપ માટે આ એક મોટો ઝટકો માનવામાં આવી રહ્યો છે. ઝાલાવાડ નગર પરિષદમાં કૉંગ્રેસે 29 બેઠકો જીતીને 23ના જાદુઈ આંકડાને સરળતાથી પાર કરી લીધો છે, જેનાથી હવે ઝાલાવાડ નગર પરિષદના પ્રમુખ પદ પર કૉંગ્રેસનું આવવું નક્કી થઈ ગયું છે.

વસુંધરા રાજેના રાજકીય ગઢમાં ભાજપનો સફાયો

રાજસ્થાનનો ઝાલાવાડ અને ઝાલરાપાટન વિસ્તાર દાયકાઓથી પૂર્વ મુખ્ય પ્રધાન વસુંધરા રાજે અને તેમના પુત્ર તથા સાંસદ દુષ્યંત સિંહનો અભેદ્ય કિલ્લો ગણાતો રહ્યો છે. આ ચૂંટણીમાં 45માંથી 29 વોર્ડ જીતીને કૉંગ્રેસે ભાજપના આ મજબૂત રાજકીય પાયામાં મોટું ગાબડું પાડ્યું છે, જેને વસુંધરા રાજે માટે ખૂબ મોટો ઝટકો માનવામાં આવી રહ્યો છે.

ઝાલાવાડ નગર પરિષદ ઝાલાવાડ-બારા લોકસભા બેઠકનો એક ભાગ છે. અહીંથી વસુંધરા રાજેના પુત્ર દુષ્યંત સિંહ પાંચ વખતથી સાંસદ છે. તેમના પહેલાં આ લોકસભા મતવિસ્તારમાંથી ખુદ વસુંધરા રાજે પણ પાંચ વખત સાંસદ રહી ચૂક્યાં છે.

ક્યારે યોજાઈ હતી ચૂંટણી

રાજસ્થાનની કુલ 309 નગરપાલિકાઓ/સ્થાનિક સંસ્થાઓની ચૂંટણી બે તબક્કામાં યોજાઈ હતી. પ્રથમ તબક્કાનું મતદાન 9 સપ્ટેમ્બરે થયું હતું અને  11 સપ્ટેમ્બરે બીજા તબક્કાનું મતદાન યોજાયું હતું. રાજસ્થાનમાં સ્થાનિક સંસ્થાઓની ચૂંટણીમાં 10 મહાનગરપાલિકા, 51 નગર પરિષદ અને 248 નગરપાલિકાઓ સામેલ છે. પ્રથમ તબક્કામાં 162 સંસ્થાઓમાં 76.41 ટકા મતદાન થયું હતું અને બીજા તબક્કામાં 147 સંસ્થાઓમાં 71.69 ટકા મતદાન નોંધાયું હતું. બંને તબક્કામાં મળીને કુલ 74.05 ટકા મતદાન થયું હતું. જોકે આ ચૂંટણીમાં અત્યાર સુધીના પરિણામ ઘણા ચોંકાવનારા રહ્યા છે.