કોલકાતા: બે દિવસ પહેલા બંગાળના પૂર્વ બર્ધમાન જિલ્લામાંથી ઝડપાયેલો જૈશ-એ-મોહમ્મદનો શંકાસ્પદ આતંકવાદી હમીમ મંડલ જંતર-મંતર પર થતા પ્રદર્શનમાં ઘૂસણખોરી કરવાની યોજના બનાવી રહ્યો હતો. હમીમ હાલમાં બંગાળ STFની કસ્ટડીમાં છે. તેની પૂછપરછ બાદ STFએ ઝારખંડના સાહેબગંજથી તેની કથિત ગર્લફ્રેન્ડ અર્પિતા સરકારની પણ ધરપકડ કરી છે.

આ બંનેની પૂછપરછ દરમિયાન અત્યંત ખતરનાક ઇરાદાઓ થતા થયા છે. ઝડપાયેલો શંકાસ્પદ આતંકી હમીમ મંડલ બંગાળના મુખ્યમંત્રી શુભેન્દુ અધિકારીને નિશાન બનાવવાની સાથે સાથે તાજેતરમાં દિલ્હીના જંતર-મંતર પર થયેલા પ્રદર્શનમાં ઘૂસણખોરી કરવાનું પણ ષડયંત્ર રચી રહ્યો હતો.

પોલીસનો યુનિફોર્મ પહેરી CJP વિરોધ પ્રદર્શનમાં ઘૂસવાનું હતું ષડયંત્ર: IG

હમીમના ખતરનાક મનસૂબાઓ વિશે STFના ઇન્સ્પેક્ટર જનરલ ગૌરવ શર્માએ જણાવ્યું કે, હમીમના પાકિસ્તાનમાં બેઠેલા હેન્ડલર્સ ઇચ્છતા હતા કે તે પોલીસનો યુનિફોર્મ પહેરીને જંતર-મંતર પર થઈ રહેલા વિરોધ પ્રદર્શનના સ્થળે ઘૂસે અને અશાંતિ ફેલાવે.

તેમણે એક પત્રકાર પરિષદમાં જણાવ્યું, "પાકિસ્તાની હેન્ડલર્સે હમીમ મંડલને કહ્યું હતું કે તે પોલીસનો યુનિફોર્મ પહેરીને દિલ્હીના જંતર-મંતર પર વિદ્યાર્થીઓના વિરોધ પ્રદર્શનમાં સામેલ થાય અને અશાંતિ ઊભી કરે." આ ઉપરાંત, STFના જણાવ્યા અનુસાર, હમીમને મુખ્યમંત્રીની પ્રવૃત્તિઓ પર પણ નજર રાખવાનું કામ સોંપવામાં આવ્યું હતું.

સુરક્ષા વગર ક્યાં-ક્યાં રહે છે શુભેન્દુ, એ શોધી રહ્યો હતો હમીમ

IG શર્માએ જણાવ્યું, "મુખ્યમંત્રી પણ એ લોકોમાં સામેલ હતા જેમને નિશાન બનાવવામાં આવનાર હતા." સીનિયર અધિકારીએ વધુમાં જણાવ્યું, "હમીમને એવી જગ્યાઓ વિશે માહિતી એકઠી કરવા માટે કહેવામાં આવ્યું હતું જ્યાં મુખ્યમંત્રી સુરક્ષા વગર હોઈ શકે." મંડલની પૂછપરછ દરમિયાન, STFને પશ્ચિમ બંગાળમાં JeM (જૈશ-એ-મોહમ્મદ) આતંકી સંગઠનના ઘણા હેન્ડલર્સ સાથે તેના કનેક્શન હોવાની ખબર પડી. અદાલતે તેને 14 દિવસ માટે STF કસ્ટડીમાં મોકલી દીધો છે.

ઝારખંડના સાહેબગંજથી ગર્લફ્રેન્ડ અર્પિતાની ધરપકડ કરાઈ

શુક્રવારે ઝારખંડથી તેની ગર્લફ્રેન્ડ અર્પિતા સરકારની પણ ધરપકડ કરવામાં આવી હતી. આરોપ છે કે બંને રાજ્યના મંત્રી ઉમેશ રાયના પુત્રને હનીટ્રેપમાં ફસાવીને અપહરણ કરવાનું અને તેમના પરિવાર પાસેથી ખંડણી વસૂલવાનું ષડયંત્ર રચી રહ્યા હતા.

UK, મેક્સિકોના ઇન્ટરનેશનલ સિમ પણ મળ્યા

હમીમના WhatsApp ચેટમાંથી પાકિસ્તાન સાથે જોડાયેલા હોવાના સંકેત પણ મળ્યા છે. STFએ તેની પાસેથી UK અને મેક્સિકોમાં ઇશ્યૂ કરાયેલા ઇન્ટરનેશનલ સિમ કાર્ડ પણ જપ્ત કર્યા છે. એજન્સીને શંકા છે કે તેણે આ સિમ કાર્ડનો ઉપયોગ પોતાના હેન્ડલર્સ અને સ્લીપર સેલ્સ સાથે એન્ક્રિપ્ટેડ વાતચીત કરવા માટે કર્યો હતો.