*પ્રધાન શિવેન્દ્ર રાજે દ્વારા બુધવારે કરાયું નિરીક્ષણ: ઇમારતના તમામ સમારકામ અને નવીનીકરણના કામો વખતે ઇલેક્ટ્રિકલ સિસ્ટમ્સ, ફિટિંગ અને અન્ય તકનીકી સુવિધાઓ માટે ઉચ્ચ ગુણવત્તાની સામગ્રીનો ઉપયોગ કરવાનો નિર્દેશ*

(અમારા પ્રતિનિધિ તરફથી)
મુંબઈ: મહારાષ્ટ્રની રાજધાની મુંબઈના નરીમાન પોઈન્ટ ખાતે આવેલી ઐતિહાસિક ‘એર ઈન્ડિયા’ ઇમારત મહારાષ્ટ્ર સરકારને ટ્રાન્સફર કર્યા પછી, જાહેર બાંધકામ ખાતાના પ્રધાન શિવેન્દ્ર સિંહ રાજે ભોંસલેએ બુધવારે ઇમારતનું નિરીક્ષણ કર્યું હતું અને સંબંધિત અધિકારીઓને જરૂરી સૂચનાઓ આપી. આ પ્રસંગે, તેમણે એવા નિર્દેશ આપ્યા હતા કે સરકારી કચેરીઓ ખસેડતા પહેલા ઇમારતનું સંપૂર્ણ માળખાકીય નિરીક્ષણ કરવામાં આવે અને જરૂરી સમારકામ પૂર્ણ થયા પછી જ આંતરિક સુશોભન અને અન્ય વિકાસ કાર્યો હાથ ધરવામાં આવે.

કામની ગુણવત્તા સાથે કોઈ સમાધાન કર્યા વિના લાંબા ગાળાનું ટકાઉપણું ધ્યાનમાં રાખીને તમામ સમારકામ અને નવીનીકરણના કામો હાથ ધરવા, એમ જણાવતા તેમણે ઇલેક્ટ્રિકલ સિસ્ટમ્સ, ફિટિંગ અને અન્ય તકનીકી સુવિધાઓ માટે ઉચ્ચ ગુણવત્તાની સામગ્રીનો ઉપયોગ કરવા પર ભાર મૂક્યો. ઇમારતનું મુખ્ય પ્રવેશદ્વાર મહારાષ્ટ્રના ગૌરવને અનુરૂપ આકર્ષક અને સુશોભિત સ્વરૂપમાં વિકસાવવામાં આવે. તેમણે આ માટે દેશના પ્રખ્યાત આર્કિટેક્ટ્સ અને નિષ્ણાત સંસ્થાઓ પાસેથી માર્ગદર્શન લેવા પણ સૂચના આપી હતી. રાજ્યના ખૂણે ખૂણેથી કામ માટે મુંબઈ આવતા નાગરિકોની સલામતી, સુવિધા અને વ્યવસ્થા એ વહીવટીતંત્રની ટોચની પ્રાથમિકતા હોવાનું જણાવીને શિવેન્દ્રરાજેએ નિર્દેશ આપ્યો હતો કે તમામ કામો નિર્ધારિત સમયમર્યાદામાં અને ઉચ્ચ ગુણવત્તા સાથે પૂર્ણ થાય.

*સત્તાવાર રીતે સરકારી કબજામાં ઇમારત*
રાજ્ય પ્રધાનમંડળે 8 સપ્ટેમ્બર, 2023ના રોજ આ વ્યૂહાત્મક સ્થાન પર આવેલી ઇમારત ખરીદવાની મંજૂરી આપી હતી. વિવિધ વહીવટી પ્રક્રિયાઓ પૂર્ણ કર્યા પછી, રાજ્ય સરકારે ‘એર ઇન્ડિયા એસેટ હોલ્ડિંગ કોર્પોરેશન’ (એઆઈએએચએલ) પાસેથી રૂ. 1601 કરોડમાં ઇમારત હસ્તગત કરી હતી. જાહેર બાંધકામ ખાતાના પ્રધાન શિવેન્દ્રસિંહરાજે ભોંસલેના માર્ગદર્શન હેઠળ જાહેર બાંધકામ વિભાગ દ્વારા જરૂરી ભંડોળ ચૂકવ્યા પછી, બીજી જૂન, 2026ના રોજ મહારાષ્ટ્ર સરકાર દ્વારા આ ઇમારતને સત્તાવાર રીતે કબજે કરવામાં આવી હતી.

તેમણે સંબંધિત અધિકારીઓને આ સમારકામ અને નવીનીકરણ માટે તાત્કાલિક જરૂરી વહીવટી મંજૂરી આપવાનો પણ આદેશ આપ્યો હતો. આ ઐતિહાસિક ઇમારત રાજ્ય સરકારની વિવિધ કચેરીઓ માટે જગ્યા ધરાવતી, આધુનિક અને સુસજ્જ જગ્યા પૂરી પાડશે, જે વહીવટની કાર્યક્ષમતા વધારવામાં ઘણી મદદ કરશે. આ પ્રસંગે જાહેર બાંધકામ વિભાગના સચિવ આબાસાહેબ નાગરગોજે, મુખ્ય ઇજનેર પ્રજ્ઞા વાલ્કે અને વિભાગના વરિષ્ઠ અધિકારીઓ હાજર રહ્યા હતા. તેમણે ઇમારતની વર્તમાન સ્થિતિ, જરૂરી સમારકામ અને પ્રસ્તાવિત નવીનીકરણ કાર્યો વિશે વિગતવાર માહિતી આપી.