નવી દિલ્હી: ઝારખંડમાં વિરોધ કરી રહેલા વિદ્યાર્થીઓ સામે બળપ્રયોગની રાહુલ ગાંધીએ સોમવારે નિંદા કરી હતી અને રાજ્ય સરકારને વિરોધીઓને સાંભળવાનું ચાલુ રાખવા અને તેમના પ્રશ્નોનું તાત્કાલિક નિરાકરણ લાવવા હાકલ કરી હતી. ઝારખંડમાં કોંગ્રેસ હેમંત સોરેન સરકારનો ભાગ છે.
રાંચીમાં પોલીસે ભરતી પરીક્ષાની કથિત ગેરરીતિઓનો વિરોધ કરતા બેરિકેડ તોડીને રાજ્ય વિધાનસભા સુધી પહોંચવાનો પ્રયાસ કરતા નોકરી ઇચ્છુકો પર પાણીનો મારો ઉપયોગ કર્યો, ટીયર ગેસના શેલ છોડ્યા અને લાઠીચાર્જ કર્યો તે પછી રાહુલની આ ટિપ્પણી આવી હતી.
ઝારખંડમાં વિરોધ કરી રહેલા વિદ્યાર્થીઓ માટે મારો સંદેશ સ્પષ્ટ છે. શાંતિપૂર્ણ રીતે વિરોધ કરી રહેલા વિદ્યાર્થીઓ સામે કોઈપણ હિંસાની અમે નિંદા કરીએ છીએ,’ એવું તેણે એક પત્રકાર પરિષદ દરમિયાન કહ્યું હતું.
‘તે ક્યાં થઈ રહ્યું છે તેનાથી કોઈ ફરક પડતો નથી. અમે તેની નિંદા કરીએ છીએ, અમે તેની વિરુદ્ધ છીએ, અમે તેની ભલામણ કરતા નથી, અને અમે તેને સમર્થન આપતા નથી. અમે ખૂબ જ સ્પષ્ટ છીએ,’ તેવું તેણે કહ્યું હતું. ‘જ્યાં સુધી વિરોધ શાંતિપૂર્ણ હોય ત્યાં સુધી અમે હિંસાથી તેના પર કોઈ પણ હુમલાની વિરુદ્ધ છીએ,’ એવું તેણે ઉમેર્યું હતું.
