મુંબઈઃ મુંબઈ મેટ્રોપોલીટન રિજ્યન (MMR)માં એક લાખ સીટની ક્ષમતાવાળું વિશાળ ક્રિકેટ સ્ટેડિયમ બનવાનું છે અને એ સંબંધમાં આ સ્ટેડિયમના વિકાસ કાર્યને વેગ આપવા વિશે ચર્ચા કરવા મુંબઈ ક્રિકેટ અસોસિયેશન (MCA)ના પ્રમુખ અજિંક્ય નાઇક તાજેતરમાં રોડ-મેપ નક્કી કરવા સંબંધમાં મહારાષ્ટ્રના મુખ્ય પ્રધાન દેવેન્દ્ર ફડણવીસને તેમ જ રાજ્ય સરકારના બીજા ટોચના અધિકારીઓને મળ્યા હતા. શક્યતઃ નવી મુંબઈ-સ્થિત આ પ્રકલ્પ ફડણવીસના નેતૃત્વ હેઠળ હાથ ધરવામાં આવી રહ્યો છે.
નાઇક સિટી ઍન્ડ ઇન્ટસ્ટ્રિયલ ડેવલપમેન્ટ કોર્પોરેશન ઑફ મહારાષ્ટ્ર (સિડકો)ના મૅનેજિંગ ડિરેકટર વિજય સિંઘલ તથા અન્ય ટોચના અધિકારીઓને પણ આ મેગા પ્રૉજેક્ટ સંબંધમાં ચર્ચા માટે મળ્યા હતા. આ સ્ટેડિયમ (STADIUM) મુંબઈના હાર્દ ક્ષેત્રમાં બનશે એવી પણ અગાઉ ચર્ચા હતી. ઉલ્લેખનીય છે કે અમદાવાદમાં શ્રી નરેન્દ્ર મોદી ક્રિકેટ સ્ટેડિયમમાં 1,32,000 પ્રેક્ષકો બેસી શકે એટલી સીટ છે. વાનખેડે સ્ટેડિયમમાં 33,000-પ્લસ પ્રેક્ષકો બેસી શકે એટલી સીટ છે.
આ વર્લ્ડ ક્લાસ સ્ટેડિયમ બનવા સાથે મહારાષ્ટ્ર વૈશ્વિક ખેલજગતના નકશામાં મહત્ત્વનું સ્થાન જમાવશે. અજિંક્ય નાઇકે જણાવ્યું હતું કે `વિશાળ સ્ટેડિયમ બનાવવાની આ પહેલ મહારાષ્ટ્ર રાજ્યની ખેલકૂદ સંબંધિત અર્થવ્યવસ્થા માટે એક નવો પંથ કંડારશે. આ સ્ટેડિયમ ખેલાડીઓના પર્ફોર્મન્સના વિકાસ માટે નવી ઉચ્ચ સ્તરિય તકો ઊભી કરશે, પાયાના સ્તરેથી ઊભરતી ટૅલન્ટને નવી ઓળખ અપાવશે તેમ જ ક્રિકેટ સાથે સ્પર્શતી સમગ્ર અર્થવ્યવસ્થાને વધુ મજબૂત બનાવશે.'
નવું સ્ટેડિયમ ખેલકૂદ સાથે સંકળાયેલા પર્યટન ઉદ્યોગને પણ વેગ આપશે, મોટી આંતરરાષ્ટ્રીય ઇવેન્ટને મુંબઈ તરફ આકર્ષશે તેમ જ સમગ્ર મુંબઈ પ્રદેશને જાગતિક ખેલકૂદ સ્તરે વધુ લોકપ્રિય બનાવશે.
