મુંબઈ: મહારાષ્ટ્રમાં તહેવારોની સિઝન વચ્ચે એફડીએએ ખાદ્ય સુરક્ષાને લઈને મોટી કાર્યવાહી કરી હતી. મુંબઈ સેન્ટ્રલ સ્થિત નાયર હોસ્પિટલની કેન્ટીનમાં ફૂડ સેફ્ટી અને હાઇજીનના ગંભીર ઉલ્લંઘન સામે આવ્યા બાદ તેનું લાઇસન્સ તાત્કાલિક અસરથી સસ્પેન્ડ કરવામાં આવ્યું છે. આ ઉપરાંત મુંબઈના 7 સહિત રાજ્યભરના કુલ 14 ખાદ્ય પ્રતિષ્ઠાનોના લાઇસન્સ સસ્પેન્ડ કરવામાં આવ્યા છે. 

એફડીએના જણાવ્યા અનુસાર, 16 અને 17 સપ્ટેમ્બરે રાજ્યભરમાં 27 હોટલ, રેસ્ટોરન્ટ, ઢાબા અને અન્ય ખાદ્ય પ્રતિષ્ઠાનોનું નિરીક્ષણ કરવામાં આવ્યું હતું. તેમાંથી 14ના લાઇસન્સ સસ્પેન્ડ કરવામાં આવ્યા, જ્યારે 13 પ્રતિષ્ઠાનોને સુધારણા માટે નોટિસ આપવામાં આવી હતી. આ ઉપરાંત દૂધ અને ડેરી ઉત્પાદનોનો 7.38 લાખ રૂપિયાની કિંમતનો 2,813 કિલો જથ્થો પણ જપ્ત કરવામાં આવ્યો છે.

નાયર હોસ્પિટલની કેન્ટીનમાં ગંભીર ખામીઓ

મુંબઈ સેન્ટ્રલ સ્થિત નાયર હોસ્પિટલની કેન્ટીનનું એફડીએ દ્વારા 16 સપ્ટેમ્બરે નિરીક્ષણ કરવામાં આવ્યું હતું. તપાસ દરમિયાન ફૂડ સેફ્ટી અને હાઇજીન સંબંધિત નિયમોના ગંભીર ઉલ્લંઘન જોવા મળ્યા હતા. દર્દીઓ અને નાગરિકોના આરોગ્ય તથા સુરક્ષાને ધ્યાનમાં રાખીને કેન્ટીનનું લાઇસન્સ તાત્કાલિક અસરથી સસ્પેન્ડ કરવામાં આવ્યું છે. મામલે આગળની કાયદેસરની કાર્યવાહી ચાલુ છે.

મુંબઈમાં 7 પ્રતિષ્ઠાનોના લાઇસન્સ સસ્પેન્ડ

એફડીએએ મુંબઈમાં ઓલિમ્પિયા કોફી હાઉસ ઉપરાંત બ્લિંક કોમર્સ પ્રાઇવેટ લિમિટેડ, વિશ્વાસ સ્વીટ્સ એન્ડ સ્નેક્સ, ઘાટકોપર, A-1 જનરલ એન્ડ ડ્રાય ફ્રૂટ્સ, ઘાટકોપર;નાયર હોસ્પિટલ કેન્ટીન, મુંબઈ સેન્ટ્રલ, મિલાન પંજાબ, વર્લી અને સદગુરુ સ્વીટ્સ, માલાડ ઈસ્ટના લાઇસન્સ સસ્પેન્ડ કર્યા છે. આ પ્રતિષ્ઠાનોમાં ફૂડ સેફ્ટી અને હાઇજીનના નિયમો સંબંધિત ખામીઓ જોવા મળી હતી.

ખોયા-માવા અને મીઠાઈઓ પર પણ એફડીએની નજર

મીરા રોડના કાશીમીરા વિસ્તારમાં બે વાહનોમાંથી મોટી માત્રામાં ખોયા અને માવા જપ્ત કરવામાં આવ્યા હતા. એક વાહનમાંથી 479 કિલો ખુલ્લો ખોયા અને 958 કિલો સ્વીટ માવો, જ્યારે બીજા વાહનમાંથી 659 કિલો ખુલ્લો ખોયા અને 220 કિલો સ્વીટ માવો મળી આવ્યો હતો. એફડીએના જણાવ્યા અનુસાર, આ ખાદ્ય પદાર્થોને અસ્વચ્છ પરિસ્થિતિમાં રાખવામાં આવ્યા હતા અને તેમનું પરિવહન પણ કરવામાં આવી રહ્યું હતું.

પાલઘરના ચારોટી ટોલ પ્લાઝા પર પણ 174 કિલો સ્વીટ માવો જપ્ત કરવામાં આવ્યો હતો. આ ઉપરાંત પુણે, કોલ્હાપુર, સાંગલી, સોલાપુર, છત્રપતિ સંભાજીનગર, અહિલ્યાનગર અને નાસિક રોડ વિસ્તારમાં પણ શંકાસ્પદ, લેબલ વિનાના અથવા અસ્વચ્છ પરિસ્થિતિમાં રાખવામાં આવેલા ખાદ્ય પદાર્થો સામે કાર્યવાહી કરવામાં આવી છે. એફડીએ કમિશનર તુકારામ મુંડેએ જણાવ્યું છે કે ખાદ્ય પદાર્થોની ગુણવત્તા અને કાયદાના પાલનને લઈને સરકાર કડક છે. ગ્રાહકોના આરોગ્ય સાથે કોઈપણ પ્રકારનું સમાધાન કરવામાં આવશે નહીં અને એક્સપાયર્ડ અથવા ભેળસેળયુક્ત ખાદ્ય પદાર્થો સામે કાર્યવાહી ચાલુ રહેશે.