બરેલીઃ બુધવારે યુપીના બરેલીમાં આવેલા જોરદાર વાવાઝોડામાં એક યુવક હવામાં અંદાજે 300 મીટર સુધી ઉડ્યો. જ્યારે તે જમીન પર પડ્યો, ત્યારે તેના હાથ-પગ તૂટી ગયા. સોશિયલ મીડિયા પર આ ઘટનાનો વીડિયો ખૂબ વાયરલ થઈ રહ્યો છે.
આ વીડિયો ભમોરા વિસ્તારનો હોવાનું કહેવાય છે. પોલીસના જણાવ્યા અનુસાર, ભમોરાના બબિયાના ગામમાં રહેતા નન્હે નામનો યુવક વાવાઝોડું આવતા ગામમાં આવેલા એક સામુદાયિક ભવનમાં આશરો લેવા ઊભો રહ્યો હતો. પવનથી બચવા માટે તેણે ત્યાં લગાવેલા પાઈપ પકડી લીધા હતા.
પરંતુ પવનની ગતિ એટલી તીવ્ર હતી કે સામુદાયિક ભવનના પતરાં (ટીનશેડ) ઊડ્યા અને તેની સાથે નન્હે પણ હવામાં ઉડયો. તે લગભગ 300 મીટર દૂર એક ખેતરમાં જઈને પડ્યો. આ અકસ્માતમાં નન્હેને ગંભીર ઈજાઓ પહોંચી છે અને તેના હાથ-પગ ભાંગી ગયા છે. હાલમાં તેની સારવાર ચાલી રહી છે.
યુપીમાં આજનું હવામાન (14 May 2026)
ઉત્તર પ્રદેશમાં અત્યારે હવામાનના બે અલગ-અલગ સ્વરૂપો જોવા મળી રહ્યા છે. ક્યાંક વાવાઝોડા અને વરસાદને કારણે તબાહી મચી રહી છે, તો ક્યાંક ભીષણ ગરમી અને લૂના કારણે જનજીવન પ્રભાવિત થયું છે. બુધવારે અનેક જગ્યાએ ધૂળની ડમરીઓ અને પવન સાથે વરસાદ પડ્યો હતો, જ્યારે કેટલીક જગ્યાએ કરા પણ પડ્યા હતા.
A dramatic video from UP's Bareilly has surfaced, showing a man being violently tossed several feet into the air by powerful winds during a severe storm. Clinging desperately to a tin shade, the victim was suddenly hurled skyward before crashing back to the ground. pic.twitter.com/23InPSYN4f
— Piyush Rai (@PiyushRaiUP65) May 14, 2026
આ કુદરતી આફતો અને વરસાદને લગતી દુર્ઘટનાઓમાં કુલ 62 લોકોના મોત થયા છે. હવામાન વિભાગે આજે એટલે કે ગુરુવાર, 14 મે ના રોજ પણ 51 જિલ્લાઓમાં વાવાઝોડા અને વરસાદ માટે એલર્ટ જાહેર કર્યું છે. ખરાબ હવામાન દરમિયાન લોકોને સાવચેત રહેવાની સલાહ આપવામાં આવી છે.
ઉત્તર પ્રદેશમાં 16 મેથી લૂ લાગશે
હવામાન વિભાગના જણાવ્યા અનુસાર, આજે પૂર્વી અને પશ્ચિમી ઉત્તર પ્રદેશમાં કેટલીક જગ્યાએ વરસાદ પડવાની શક્યતા છે. આ સાથે જ 30 કિમી પ્રતિ કલાકની ઝડપે પવન ફૂંકાવાનું પણ અનુમાન છે.
15 મે ના રોજ સમગ્ર રાજ્યમાં હવામાન ચોખ્ખું રહેશે જેના કારણે તાપમાનમાં વધારો થવાની સંભાવના છે. જ્યારે 16 મેથી બુંદેલખંડ અને દક્ષિણના જિલ્લાઓમાં લૂ (Heat wave) લાગવાની અને ગરમીનું પ્રમાણ વધવાની આગાહી કરવામાં આવી છે.
