(અમારા પ્રતિનિધિ તરફથી)

મુંબઈ: કલ્યાણ-ડોંબિવલીના નાગરિકોને હાલ પબ્લિક ટ્રાન્સપોર્ટની બસને બદલે મોટા ભાડા વસૂલનારી ખાનગી ટેક્સી અને રિક્ષામાં પ્રવાસ કરવો પડી રહ્યો છે. કૉન્ટ્રેકટરે પગાર કાપી લેતા તેના વિરોધમાં કર્મચારીઓએ કામબંધ આંદોલન છેડતા કલ્યાણ-ડોંબિવલી પાલિકાના ડેપોમાંથી એક પણ બસ રસ્તા પર નહીં ઊતરતા પ્રવાસીઓ હેરાન-પરેશાન થઈ ગયા છે. 

કલ્યાણ-ડોંબિવલી મહાનગરપાલિકા (કેડીએમસી)ની પરિવહન સેવા સોમવારે પણ સંપૂર્ણપણે બંધ રહી હતી. કર્મચારીઓએ અનિશ્ર્ચિત સમય માટે હડતાળનું એલાન કર્યું છે, જેમાં આરોપ લગાવવામાં આવ્યો છે કે કૉન્ટ્રાક્ટરે કોઈપણ પૂર્વ સૂચના આપ્યા વિના કૉન્ટ્રાક્ટ પર રહેલા ડ્રાઇવરો, કેરિયર્સ અને કર્મચારીઓના પગારમાંથી પૈસા કાપી લીધા છે. આને કારણે કેડીએમસી ડેપોમાંથી એક પણ બસ રસ્તા પર બહાર આવી નહોતી અને મુસાફરોને ભારે મુશ્કેલીનો સામનો કરવો પડી રહ્યો છે.

આ દરમ્યાન મનસેના કલ્યાણ જિલ્લાના પ્રમુખે વહીવટીતંત્રને કૉન્ટ્રાક્ટરને બ્લેકલિસ્ટ કરવાની માગણી કરી હતી. કલ્યાણ-ડોંબિવલી મહાનગરપાલિકાના પરિવહન વિભાગમાં કૉન્ટ્રાક્ટ  પર રહેલા કર્મચારીઓના પગારમાંથી મોટી રકમ કાપવામાં આવી હોવાનો આરોપ થઈ રહ્યો છે. મહારાષ્ટ્ર નવનિર્માણ સેનાએ આ કાપ અંગે સંબંધિત અધિકારી અને કૉન્ટ્રાક્ટર પાસેથી લેખિતમાં ખુલાસો માંગ્યો હતો. જોકે, તેમને કોઈ જવાબ મળ્યો ન હોવાનો કહેવામાં આવે છે. આનાથી ગુસ્સે ભરાયેલા ડ્રાઇવરો, ટ્રાન્સપોર્ટરો અને અન્ય કૉન્ટ્રાક્ટ કર્મચારીઓએ સામૂહિક રજા લીધી છે અને અનિશ્ર્ચિત સમય માટે કામ બંધ કરી દીધું છે. હડતાળને કારણે કેડીએમસીની ટ્રાન્સપોર્ટની બસ સેવાઓ સંપૂર્ણપણે ખોરવાઈ ગઈ છે અને એક પણ બસ ડેપોમાંથી બહાર નીકળી નહોતી.

આ મામલે મનસે કલ્યાણ જિલ્લા પ્રમુખ  કામદારો સાથે અન્યાય કરનાર કૉટ્રાક્ટરને તાત્કાલિક બ્લેકલિસ્ટ કરવામાં આવે એવી માગણી પ્રશાસનને કરી હતી. તેમ જ આક્રમક ચેતવણી પણ આપી હતી  કે જો કર્મચારીઓના બાકી પગાર તાત્કાલિક ચૂકવવામાં નહીં આવે તો અધિકારીઓ અને કૉન્ટ્રાક્ટરોને કેડીએમસી ટ્રાન્સપોર્ટની બસ ડેપોમાં પ્રવેશવા દેવામાં આવશે નહીં. હવે નાગરિકોનું ધ્યાન આ અંગે વહીવટીતંત્ર અને કૉન્ટ્રાક્ટર શું વલણ અપનાવશે તેના પર છે.