તેહરાનઃ ઈરાનના ખાર્ગ ટાપુ પાસે શનિવારે વિસ્ફોટોના અવાજો સંભળાયા હતા. ખાર્ગ ટાપુ પર્શિયન અખાતમાં આવેલું એક મુખ્ય ઓઇલ ટર્મિનલ છે.  આ વિસ્ફોટોનું કારણ હજુ સુધી જાણી શકાયું નથી.

સૂત્રોના જણાવ્યા પ્રમાણે,  ખાર્ગ પાસે એક ઈરાની ટેન્કરને અમેરિકી સેના દ્વારા છોડવામાં આવેલી મિસાઇલથી નિશાન બનાવવામાં આવ્યું છે. જોકે, આની પુષ્ટિ થઈ નથી.

ખાર્ગ ટાપુ પર હાજર એક પત્રકારે જણાવ્યું કે અખાત તરફથી વિસ્ફોટોના અવાજો સંભળાયા હતા, પરંતુ ધુમાડાના કોઈ નિશાન જોવા મળ્યા ન હતા.   આ અહેવાલો અંગે ઈરાની અધિકારીઓ તરફથી તાત્કાલિક કોઈ સત્તાવાર નિવેદન બહાર પાડવામાં આવ્યું નથી. 

આ પહેલાં 31 ઓગસ્ટે અમેરિકાના રાષ્ટ્ર પ્રમુખ ડોનાલ્ડ ટ્રમ્પે સોશિયલ મીડિયા પર એક પોસ્ટ કરી હતી. આ સાથે AI દ્વારા બનાવવામાં આવેલો એક વીડિયો પણ હતો. ટ્રમ્પે કહ્યું હતું કે ખાર્ગ ટાપુને 'blown to smithereens' કરવામાં આવી રહ્યો છે. બીજી તરફ, ઈરાની અધિકારીઓએ ખાર્ગ ટાપુ પર હુમલો થવાની સ્થિતિમાં કડક જવાબ આપવાની ચેતવણી આપી છે. આ અગાઉ અઠવાડિયાઓની શાંતિ પછી અમેરિકાએ હોર્મુઝમાં ઈરાનને નિશાન બનાવ્યું હતું, જે બાદ બંને દેશો વચ્ચે ફરીથી તણાવ વધી ગયો છે.

ઉલ્લેખનીય છે કે ખાર્ગ આઇલેન્ડ ઈરાન માટે વિશેષ મહત્વ ધરાવે છે. તે દેશના અગ્રણી ઓઈલ નિકાસ કેન્દ્રો પૈકી એક છે. આવી સ્થિતિમાં, આ વિસ્તારમાં કોઈપણ લશ્કરી ઘટનાથી તેલ બજારમાં ચિંતા વધી શકે છે.

વિશ્વના ઓઈલ પુરવઠા પર શું અસર પડશે?

સામાન્ય સંજોગોમાં હોર્મુઝ સ્ટ્રેટમાંથી મોટી માત્રામાં ક્રૂડ ઓઇલ અને ઉર્જા ઉત્પાદનો વિશ્વના જુદા-જુદા બજારો સુધી પહોંચે છે. જો આ માર્ગ પર લાંબા સમય સુધી જહાજોની અવરજવર ખોરવાયેલી રહેશે, તો વૈશ્વિક ઓઈલ પુરવઠા અંગેની ચિંતા વધી શકે છે. અમેરિકા અને ઈરાન વચ્ચે વધતા હુમલા, દરિયાઈ જહાજોને લઈને સામે આવી રહેલા અહેવાલો અને ખાર્ગ આઇલેન્ડ જેવા મહત્વપૂર્ણ તેલ કેન્દ્રોની આસપાસના તણાવે બજાર માટે જોખમ વધારી દીધું છે.