ભારતના 80મા સ્વાતંત્ર્ય પર્વ નિમિત્તે સર્ચ એન્જિન ગૂગલે દેશવાસીઓને એક અનોખી, ભવ્ય અને રંગબેરંગી ડિજિટલ ભેટ આપી છે. સામાન્ય રીતે ઐતિહાસિક સ્મારકો કે મહાનુભાવોને સમર્પિત થતા ડૂડલ કરતાં અલગ હટીને, આ વખતે ગૂગલે પોતાના ખાસ 'Google Doodle' દ્વારા ભારતના સમૃદ્ધ કાપડ વારસા, પ્રાચીન ટેક્સટાઈલ પરંપરા અને તેને જીવંત રાખતા સાચા શિલ્પી એવા દેશભરના વણકરોને અનોખી અંજલિ આપી છે.
આ અદ્ભુત આર્ટવર્ક નવી દિલ્હીના પ્રતિભાશાળી કલાકાર નમ્રતા કુમાર દ્વારા ડિઝાઈન કરવામાં આવ્યું છે. આ ડૂડલની સૌથી મોટી વિશેષતા એ છે કે તેમાં ભારતના જુદા-જુદા પ્રદેશોમાંથી 22 જેટલી પરંપરાગત ટેક્સટાઈલ કળાઓને એક સુંદર પેચવર્ક સ્વરૂપે ગૂંથીને રજૂ કરવામાં આવી છે.
પશ્ચિમ બંગાળની જામદાની:
બારીક મલમલના કાપડ પર હાથેથી જટિલ અને પારદર્શક ભાત વણવાની આ પ્રાચીન ટેકનિક મુઘલ કાળથી તેના શાહી ઠાઠ અને અત્યંત હળવા વજન માટે વિશ્વભરમાં વિખ્યાત છે.
ઓડિશા, તેલંગાણા અને ગુજરાતનું ઈકત (Ikat / પટોળા):
તેલંગાણાના પોચમપલ્લી, ઓડિશાના ઈકત અને ગુજરાતના જગપ્રસિદ્ધ પાટણના પટોળા ની ઓળખ સમાન આ કળા 'ટાઈ એન્ડ ડાઈ' પદ્ધતિ પર આધારિત છે. જેમાં કાપડ વણતા પહેલાં જ દોરાઓને ચોક્કસ માપથી રંગીને અદ્ભુત ભૌમિતિક ડિઝાઈન તૈયાર કરાય છે.
કચ્છ અને રાજસ્થાનની અજરખ પ્રિન્ટ:
ઈન્ડિગો અને હળદર જેવા 100 ટકા કુદરતી રંગો વડે લાકડાના બ્લોકથી થતી પ્રિન્ટિંગ કળા સિંધુ ખીણની સભ્યતા જેટલી પ્રાચીન મનાય છે.
વારાણસીનું બનારસી સિલ્ક:
શુદ્ધ સોના-ચાંદીના ઝરી વર્ક, ભારે રેશમી કાપડ અને બારીક મુઘલ મોટિફ્સથી સજ્જ બનારસી સાડીઓ ભારતીય સંસ્કૃતિ અને શુભ પ્રસંગોની શાન ગણાય છે.
અન્ય રાજ્યોની અનોખી કળાઓ:
આ સિવાય તમિલનાડુનું કાંજીવરમ સિલ્ક, કાશ્મીરનું પશ્મીના અને કસીદાકારી, પંજાબની ફૂલકારી તેમજ લખનૌની ચિકનકારી જેવી અનેક પરંપરાઓનો સંગમ આ ડૂડલમાં જોવા મળે છે.
વિવિધતામાં એકતાનો સુંદર સંદેશ:
આ ગૂગલ ડૂડલ માત્ર એક કલાત્મક ડિઝાઇન નથી, પરંતુ કપાસ અને રેશમ ઉગાડતા ધરતીપુત્રોથી લઈને રંગરેજો, બ્લોક પ્રિન્ટર્સ અને સાળ પર દિવસ-રાત પરસેવો પાડતા લાખો વણકરોનું રાષ્ટ્રીય સન્માન છે. જેવી રીતે વિવિધ રંગો અને દોરાઓ એકસાથે ગૂંથાઈને એક અદ્ભુત વસ્ત્ર બનાવે છે, તેવી જ રીતે આપણી આ વિવિધ સંસ્કૃતિઓ અને પરંપરાઓ ભારતની 'વિવિધતામાં એકતા' અને અખંડિતતાનું સાચું પ્રતીક છે.
