નવી દિલ્હીઃ અદાણી ગ્રુપના ચેરમેન ગૌતમ અદાણીએ બુધવારે જણાવ્યું કે, ઇન્ફ્રાસ્ટ્રક્ચર અને ઇન્ટેલિજન્સને અલગ-અલગ પ્રાથમિકતા તરીકે ન જોવા જોઈએ, પરંતુ તેમને એકબીજાના પૂરક માનવા જોઈએ. સાથે જ તેમણે કહ્યું કે, આ બંને પરિબળો ભેગા મળીને ભારતની આર્થિક ક્ષમતાઓને મજબૂત કરશે, વ્યૂહાત્મક આત્મનિર્ભરતા વધારશે અને એક મોટી વૈશ્વિક શક્તિ બનવાની ભારતની મહત્વાકાંક્ષાને ટેકો આપશે. અદાણી ગ્રુપની 34મી વાર્ષિક સામાન્ય સભા (AGM)માં શેરહોલ્ડર્સને સંબોધિત કરતી વખતે, અબજોપતિ ઉદ્યોગપતિએ ઇન્ફ્રાસ્ટ્રક્ચરને વિકાસની કરોડરજ્જુ ગણાવી હતી.

અમે ન ઝૂક્યા અને ન અટક્યા

2026ની વાર્ષિક સામાન્ય સભા (AGM)માં ગૌતમ અદાણીએ જણાવ્યું કે, 'નાણાકીય વર્ષ 2025-26 એક એવું વર્ષ હતું, જ્યારે દુનિયા વધુ વહેંચાયેલી નજરે પડી. એનર્જી સિક્યોરિટી (ઊર્જા સુરક્ષા)ના મુશ્કેલ મોડલ રાષ્ટ્રીય વ્યૂહરચનાના કેન્દ્રમાં આવી ગયા અને ટેકનોલોજી દેશની સંપ્રભુતાનો એક અભિન્ન હિસ્સો બની ગઈ. જોકે, આ પડકારો હોવા છતાં, તમારું અદાણી ગ્રુપ એ અડગ વિશ્વાસ પર કાયમ રહ્યું કે ભારતનું ભવિષ્ય રાહ જોઈ શકે નહીં. જ્યારે બીજા લોકો ચર્ચા કરી રહ્યા હતા, ત્યારે તમારું ગ્રુપ નિર્માણ કાર્યમાં વ્યસ્ત રહ્યું અને એનર્જી, ટ્રાન્સપોર્ટ, લોજિસ્ટિક્સ, યુટિલિટીઝ અને ઇન્ડસ્ટ્રિયલ મેન્યુફેક્ચરિંગ જેવા ક્ષેત્રોમાં દુનિયાના સૌથી ઇન્ટિગ્રેટેડ (સંકલિત) ઇન્ફ્રાસ્ટ્રક્ચર પ્લેટફોર્મ તરીકે પોતાની સફરને આગળ વધારતું રહ્યું... અમે ન ઝૂક્યા અને ન અટક્યા, કારણ કે આપણી ઓળખ આપણી આસપાસના શોરબકોરથી નથી થતી, પરંતુ આપણી પ્રતિક્રિયાની મજબૂતીથી થાય છે.'

ભારતના નિર્માણ કાર્યને ચાલુ રાખવાનો જનાદેશ

ગૌતમ અદાણીએ જણાવ્યું કે, 'આ વિશ્વાસનું એક ઉદાહરણ આ વર્ષની શરૂઆતમાં આપણો ₹25,000 કરોડનો રાઇટ્સ ઇશ્યૂ હતો. એવા સમયે જ્યારે કેટલાક લોકોએ શંકા ઊભી કરવાનો પ્રયાસ કર્યો, ત્યારે તમે પૂરા ભરોસા સાથે જવાબ આપ્યો. તમે ભાગીદારી કરીને જવાબ આપ્યો અને અમને ભારતના નિર્માણ કાર્યને ચાલુ રાખવાનો જનાદેશ આપ્યો.'

ઇન્ફ્રાસ્ટ્રક્ચર એ વિકાસની અસલી કરોડરજ્જુ

ગૌતમ અદાણીએ ઇન્ફ્રાસ્ટ્રક્ચરને વિકાસની અસલી કરોડરજ્જુ ગણાવી હતી, જેમાં રોડ, પોર્ટ્સ (બંદરો), એરપોર્ટ્સ, વીજ મથકો, ટ્રાન્સમિશન નેટવર્ક, રિન્યુએબલ એનર્જી પાર્ક, ગેસ પાઇપલાઇન, લોજિસ્ટિક્સ હબ, પાણીની વ્યવસ્થા અને ઔદ્યોગિક સિસ્ટમ જેવી જરૂરી સંપત્તિઓ સામેલ છે. તો બીજી તરફ, તેમણે બીજા સ્તંભ એટલે કે ઇન્ટેલિજન્સનો અર્થ સમજાવતા કહ્યું કે, 'આનો સીધો સંબંધ આર્ટિફિશિયલ ઇન્ટેલિજન્સ (AI), ઓટોમેશન, ડિજિટલ પ્લેટફોર્મ અને ડેટા એનાલિસિસ જેવી એડવાન્સ ટેકનોલોજીની વધતી ભૂમિકા સાથે છે.'