ખાણી-પીણીની ચીજોને લિઇને મોટા મોટા દાવા કરનારી કંપનીઓ પર ફૂડ સેફ્ટી રેગ્યુલેટર FSSAIનું તાબડતોડ એક્શન જારી છે. ભ્રામક જાહેરાતો, ખોટા દાવા અને લેબલિંગ નિયમોનું પાલન ન કરવાના મામલે FSSAIએ તાજેતરના મહિનાઓમાં 150 થી વધુ નોટિસ જાહેર કરી છે. તેમાં નેસ્લે ઇન્ડિયા, પેપ્સીકો, કોકા-કોલા, રેડ બુલ જેવી મોટી કંપનીઓ સામેલ છે.
હકીકતમાં આ આખા મામલાની શરુઆત મહારાષ્ટ્રથી થઇ છે, જ્યાં ફૂડ સેફ્ટી કમિશનર તુકારામ મુંઢે કડક એકશન બાદ FDAની ટીમોએ તાબડતોડ છાપેમારી કરી.
નિયમોના ભંગને લઈને કાર્યવાહી
શનિવારે FSSAIએ એક સોશિયલ મીડિયા પોસ્ટ દ્વારા જણાવ્યું કે કેવી રીતે એક પછી એક કંપનીઓ સામે કાર્યવાહી કરવામાં આવી રહી છે. ફૂડ રેગ્યુલેટરે જણાવ્યું કે તેણે ઘણા ફૂડ બિઝનેસ ઓપરેટર્સ સામે નિયમોના ગંભીર ઉલ્લંઘનના મામલામાં કાર્યવાહી કરી છે. કંપનીઓ પર ગેરમાર્ગે દોરતી જાહેરાતો (મિસલીડિંગ એડવર્ટાઇઝમેન્ટ), ખોટા દાવાઓ (ફોલ્સ ક્લેઈમ્સ) અને લેબલિંગ સાથે જોડાયેલા નિયમોનું ઉલ્લંઘન કરવાના આરોપોમાં નોટિસ મોકલવામાં આવી છે.
આ મોટી કંપનીઓને મોકલવામાં આવી નોટિસ
FSSAIએ દેશની દિગ્ગજ FMCG અને બેવરેજ કંપનીઓ પર ચારે બાજુથી ગાળિયો કસ્યો છે. તેમાં નેસ્લે, પેપ્સિકો, કોકા-કોલા, મોન્ડેલેઝ, ફેરેરો, ડૈનોન, રેડ બુલ, મોન્સ્ટર એનર્જી અને હેલ એનર્જી જેવી દિગ્ગજ કંપનીઓ સામેલ છે. આ ઉપરાંત એબૉટ ઇન્ડિયા અને કેનવ્યૂ જેવી ન્યુટ્રિશન કંપનીઓની સાથે-સાથે ડિયાજિયો અને પેર્નોડ રિકાર્ડ જેવી દારૂ બનાવતી મલ્ટીનેશનલ કંપનીઓને પણ નિયમોની અવગણના કરવા બદલ કારણ દર્શક નોટિસ (શો કોઝ નોટિસ) જારી કરવામાં આવી છે.
રેગ્યુલેટરે ખાસ કરીને એનર્જી ડ્રિંક્સ અને આલ્કોહોલિક બેવરેજ બનાવનારી કંપનીઓ પર પણ કાર્યવાહી કરી છે. FSSAIનું કહેવું છે કે નિયમોના ઉલ્લંઘનના કારણે ઘણી કંપનીઓની પ્રોડક્ટ્સ જપ્ત પણ કરવામાં આવી છે.
Amazon-Flipkart પર પણ શિકંજો
ફૂડ કંપનીઓની સાથે સાથે FSSAIએ ઇ-કોમર્સ કંપનીઓ એમેઝોન (Amazon) અને ફ્લિપકાર્ટ (Flipkart)ને પણ 12 નોટિસ મોકલી છે. આ ઉપરાંત FSSAIએ એમેઝોનના એક વેરહાઉસનું લાયસન્સ પણ કેન્સલ કરી દીધું છે.
