નવી દિલ્હી: નેપાળમાં આવેલા વિનાશક પૂરથી પ્રભાવિત લોકો પ્રત્યે સંવેદના વ્યક્ત કરતા યુરોપિયન ફૂટબોલની ટોચની સંસ્થા યુઈએફએએ જણાવ્યું હતું કે આ અઠવાડિયામાં રમાનારી તમામ ચેમ્પિયન્સ લીગ મેચો પહેલા એક મિનિટનું મૌન પાળવામાં આવશે.
નોંધનીય છે કે સોમવારે નેપાળમાં મૃત્યુઆંક વધીને 1,355 થયો હતો. અધિકારીઓએ અસરગ્રસ્ત વિસ્તારોમાંથી વધુ મૃતદેહો બહાર કાઢ્યા હતા. બચાવ ટીમો ઓછામાં ઓછા 589 વિદેશી નાગરિકો સહિત 4,996 ગુમ થયેલા લોકોને શોધી રહી છે.
નેપાળના નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટીના જણાવ્યા અનુસાર અત્યાર સુધીમાં કુલ 13,396 લોકોને બચાવી લેવામાં આવ્યા છે. યુઈએફએ ‘એક્સ’ પર એક પોસ્ટમાં લખ્યું હતું કે "આ અઠવાડિયાની તમામ યુઈએફએ ચેમ્પિયન્સ લીગ મેચો પહેલા એક મિનિટનું મૌન પાળવામાં આવશે અને એકતા અને સમર્થનના પ્રતિક તરીકે એક બેનર પ્રદર્શિત કરવામાં આવશે. બેનરમાં સંદેશ હશે "તમે એકલા નથી, નેપાળ."
યુઈએફએના પ્રમુખ એલેક્ઝાન્ડર સેફેરીને કહ્યું કે યુરોપિયન ફૂટબોલ પરિવાર આ અઠવાડિયાની મેચો પહેલા નેપાળના લોકોના સમર્થનમાં એક સાથે ઊભો રહેશે. આ દુર્ઘટનામાંથી તેઓ બહાર આવે તે માટે તેમને શક્તિ અને ધીરજ મળે તેવી શુભેચ્છા પાઠવીએ છીએ."
આ અઠવાડિયે ચેમ્પિયન્સ લીગની મેચોમાં 9 સપ્ટેમ્બરે કેમ્પ નાઉ ખાતે બાર્સેલોના ફેયેનોર્ડનો સામનો કરશે, જ્યારે 10 સપ્ટેમ્બરે એનફિલ્ડ ખાતે લિવરપૂલનો સામનો એટ્લેટિકો મેડ્રિડ સામે થશે. મંગળવારથી સમગ્ર પ્રદેશમાં કુલ 14 મેચ રમાશે.
