નવી દિલ્હીઃ અમેરિકા અને ઇરાન વચ્ચે થનારી પીસ ડીલ પહેલા આઈઆરઆઈબી (IRIB) એ બહેરીનના માઉન્ટ અલ-દુખાન પર આવેલા અમેરિકી રડાર સિસ્ટમની સેટેલાઇટ તસવીરો જાહેર કરીને તણાવ વધારી દીધો છે. આ તસવીરોમાં અમેરિકી રડાર સિસ્ટમ હુમલા બાદ તબાહ થયેલી જોવા મળી રહી છે.

ઇસ્લામિક રિપબ્લિક ઓફ ઇરાન બ્રોડકાસ્ટિંગે સેટેલાઇટ તસવીર શેર કરીને જણાવ્યું કે થોડા દિવસો પહેલા ઇરાની મિસાઇલોએ બહેરીનમાં આવેલા અમેરિકી રડાર સિસ્ટમને નિશાન બનાવ્યું હતું. આ હુમલામાં માઉન્ટ અલ-દુખાન પર વ્યૂહાત્મક રીતે તૈનાત અમેરિકી સેનાનું ટીએપીએસ-59 (TPS-59) અર્લી વોર્નિંગ રડાર સંપૂર્ણપણે નાશ પામ્યું છે.

કુવૈતમાં ASR-1000 રડાર પણ તબાહ

આ સિવાય, કુવૈતના અલી અલ-સાલેમમાં આવેલા ASR-1000 રડારને પોતાના સચોટ હુમલાઓથી સંપૂર્ણપણે કાટમાળમાં ફેરવીને નષ્ટ કરી દીધું છે.

ઈરાને સેટેલાઈટ તસવીરો જાહેર કરીને અમેરિકાના એ દાવાઓ પર કટાક્ષ કર્યો છે, જેમાં અમેરિકા કહી રહ્યું હતું કે તેમણે ઈરાનના તમામ હુમલાઓને નિષ્ફળ બનાવી દીધા છે અને દુશ્મન (ઈરાન)ને ધૂળ ચટાડી દીધી છે. પરંતુ બહરીનથી સામે આવેલી તાજી સેટેલાઈટ તસવીરોએ આ તમામ દાવાઓની પોલ ખોલી દીધી છે. જમીની હકીકત એ છે કે અમેરિકાનું 'અર્લી વોર્નિંગ રડાર' હવે માત્ર કાટમાળનો ઢગલો બનીને રહી ગયું છે.

રવિવારે થશે ડીલ (કરાર)

આ પહેલા શનિવારે અમેરિકાના રાષ્ટ્રપતિ ડોનાલ્ડ ટ્રમ્પે દાવો કર્યો હતો કે, અમેરિકા અને ઈરાન વચ્ચે થનારો બહુપ્રતીક્ષિત કરાર 14 જૂનના રોજ સાઈન (હસ્તાક્ષર) થવાનો છે. તેમણે એવું પણ કહ્યું કે બંને દેશો વચ્ચે કરાર થયા બાદ 'સ્ટ્રેટ ઓફ હોર્મુઝ' (હોર્મુઝની સામુદ્રધુની)ને તાત્કાલિક અસરથી ખોલી દેવામાં આવશે.

ટ્રમ્પે એવો પણ દાવો કર્યો છે કે આ કરાર એ વાતની ગેરંટી હશે કે ઈરાન ક્યારેય પરમાણુ હથિયાર નહીં બનાવે. તેનાથી આ વિસ્તારમાં શાંતિ અને સ્થિરતા વધશે. જોકે, ઈરાનના વિદેશ મંત્રી સૈયદ અબ્બાસ અરાગચી શુક્રવારે એક ઈન્ટરવ્યુમાં જણાવ્યું હતું કે અમેરિકા-ઈરાન કરાર બે તબક્કામાં થઈ રહ્યો છે. પહેલા તબક્કાની શરતો પૂરી થયા બાદ જ અંતિમ કરાર પર સાઈન કરવામાં આવશે, જો અમેરિકા કરારની શરૂઆતી શરતો નહીં માને તો ઈરાન કરાર સાઈન કરશે નહીં.