નવી દિલ્હી: કેન્દ્ર સરકારે સંસદમાં આ વર્ષે વડાપ્રધાન નરેન્દ્ર મોદીની વિદેશ યાત્રા પર થયેલા કુલ ખર્ચનો ખુલાસો કર્યો છે. વિદેશ મંત્રાલયે  રાજ્યસભામાં માહિતી આપી હતી કે આ વર્ષે અત્યાર સુધીમાં વડાપ્રધાનની વિદેશ યાત્રાઓ પર  રૂપિયા 74.5 કરોડનો ખર્ચ થયો છે.

ભારતમાં 381.8 બિલિયન ડોલર એફડીઆઇ આવી 

આ ઉપરાંત વિદેશ મંત્રાલયના જણાવ્યા અનુસાર, પીએમ મોદીની આ વિદેશ મુલાકાતોએ દ્વિપક્ષીય અને વૈશ્વિક સંબંધોને મજબૂત બનાવવામાં મદદ કરી છે, જેના પરિણામે એપ્રિલ 2021 થી ડિસેમ્બર 2025 વચ્ચે ભારતમાં 381.8 બિલિયન ડોલર એફડીઆઇ આવી છે. 

સાંસદ સંજય સિંહે વિદેશ યાત્રાના ખર્ચ અંગે સવાલ કર્યો 

આ અંગે આમ આદમી પાર્ટીના સાંસદ સંજય સિંહ અને સીપીઆઈ(એમ)ના સાંસદ ડૉ. વી. શિવદાસને રાજ્યસભામાં વડાપ્રધાનની વિદેશ મુલાકાતો અંગે એક અતારાંકિત પ્રશ્ન  રજૂ કર્યો હતો. સાંસદોએ વર્ષ અને મુલાકાતો દ્વારા વિભાજિત ખર્ચ, હસ્તાક્ષરિત સમજૂતી કરાર અને 2021 થી અત્યાર સુધી દેશમાં વિદેશી સીધા રોકાણ (FDI)ના પ્રવાહની વિગતો માંગી હતી.

કુલ ખર્ચની વ્યાપક વિગતો પૂરી પાડવામાં આવી 

વિદેશ રાજ્યમંત્રી પાબિત્રા માર્ગેરિતાએ રાજ્યસભામાં લેખિત જવાબ રજૂ કર્યો.  તેમણે જણાવ્યું હતું કે 2021 થી પ્રધાનમંત્રી દ્વારા કરવામાં આવેલી તમામ વિદેશી મુલાકાતો અને તેના પર થયેલા કુલ ખર્ચની વ્યાપક વિગતો પૂરી પાડવામાં આવી છે.

વર્ષ 2011 માં અમેરિકાની મુલાકાત પર ₹10.74 કરોડ નો ખર્ચ 

જેમાં  સરકારે ભૂતકાળની યાત્રાના ખર્ચના આંકડા પણ રજૂ કર્યા હતા. જેમાં વર્ષ 2011 માં અમેરિકાની મુલાકાત પર ₹10.74 કરોડ, 2013 માં રશિયાની મુલાકાત પર ₹9.95 કરોડ, 2011 માં ફ્રાન્સની મુલાકાત પર ₹8.33 કરોડ અને 2013 માં જર્મનીની મુલાકાત પર ₹6.02 કરોડ ખર્ચવામાં આવ્યા હતા.